टी- २० विश्वकपका लागि राेहित शर्माकाे कप्तानीमा भारतीय टिम घोषणा (भिडियाे)

A+ A A-

टी-२० विश्वकप क्रिकेटका लागि भारतले राष्ट्रिय टिमको घोषणा गरेको छ । राेहित शर्माकाे कप्तानीमा भारतले १५ सदस्यीय टाेलीकाे घाेषणा गरेकाे हो ।

टाेलीमा ऋषभ पन्तले पुनरागमन गरेका छन् । तर, शुभमन गिल पहिलो १५ खेलाडीकाे सूचीमा अटाएका छैनन् । उनलाई अन्य तीन खेलाडीसँगै रिजर्भमा राखिएको छ ।

शिवम दुबे र विकेटकिपर ब्याट्सम्यान सञ्जु सामसनले पनि टाेलीमा स्थान पाएका छन् । स्पिनर युजवेन्द्र चहल पनि टिममा फर्किएका छन् ।

यस्ताे छ भारतीय टिम

रोहित शर्मा (कप्तान), हार्दिक पाण्ड्या (उपकप्तान), यशस्वी जैसवाल, विराट कोहली, सूर्यकुमार यादव, ऋषभ पन्त, सञ्जु सैमसन, शिवम दुबे, रविन्द्र जडेजा, अक्षर पटेल, कुलदीप यादव, युजवेन्द्र चहल, अर्शदीप सिंह, मोहम्मद सिराज र जसप्रित बुमराह ।

यसबाहेक शुभमन गिल, रिंकु सिंह, खलील अहमद र आवेश खानलाई रिजर्भमा राखिएको छ । अधिकांश पुरानै खेलाडीहरूले मौका पाउँदा आईपीएलमा धमाका मच्चाइरहेका केही खेलाडी समावेश छैनन् । आईपीएलमै राम्रो ब्याटिङ गरिरहेका सन्जु सामसन र ऋषभ पन्तले मौका पाउँदा लखनउका कप्तान केएल राहुलले वैकल्पिक खेलाडीमा पनि स्थान बनाउन सकेनन् । टिममा हार्दिक पाण्ड्यालाई उपकप्तानको जिम्मा दिइएको छ ।

आईपीएलमा उत्कृष्ट प्रदर्शन गरिरहेका हैदरावादका अभिशेक शर्मा, गुजरातका साई सुदर्शन, चेन्नईका ऋतुराज गायकवाड, बैंग्लोरका रजत पाटिदारजस्ता खेलाडी भने टिममा पर्न असफल भए । बैंग्लोरबाट धमाकेदार खेल खेलिरहेका अनुभवी दिनेश कार्तिक पनि टोलीमा छैनन् ।

भारतले पहिलो खेल ५ जुलमा आयरल्याण्डविरुद्ध खेल्नेछ भने ९ जुनमा पाकिस्तानसँग, १२ जुनमा अमेरिका र १५ जुनमा क्यानडासँग खेल्ने तालिका छ । नेपालसमेत सहभागी हुने टी–२० विश्वकपको उद्घाटन खेलमा भने अमेरिका र क्यानडाबीच डलासमा प्रतिस्पर्धा हुनेछ । फाइनल खेल २९ जुनमा बारबाडोसमा हुनेछ । नेपाल रहेको समूहमा दक्षिण अफ्रिका, श्रीलंका, बंगलादेश, नेदरल्याण्ड छन् । इंग्ल्याण्ड प्रतियोगिताको साविक विजेता हो ।

सन् २०२२ मा फाइनलमा पाकिस्तानलाई हराएर इंग्ल्याण्डले उपाधि जितेको थियो । वेस्ट इण्डिजले सन् २०१२ र २०१६ मा लगातार दुई पटक उपाधि जितेको थियो भने भारत, पाकिस्तान, अस्ट्रेलिया र श्रीलंकाले एक एक पटक उपाधि जितेका छन् ।

भिडियाे हेर्नुहाेस् :

प्रकाशित मिति: मंगलबार, वैशाख १८, २०८१ १६:३४