इलाम २ काे नतिजाबारे कांग्रेस प्रवक्ताकाे निष्कर्ष– जसले गठबन्धन गर्छ, उसकै हैसियत बढ्छ

इलाम २ काे नतिजाबारे कांग्रेस प्रवक्ताकाे निष्कर्ष– जसले गठबन्धन गर्छ, उसकै हैसियत बढ्छ

A+ A A-

२०७९ मा भएको प्रतिनिधिसभा निर्वाचनमा समानुपातिकतर्फ नेपाली कांग्रेसले इलाम– २ बाट २२ हजार ३ सय ३३ मत पाएको थियो । १५ वैशाखमा भएको उपचुनावमा कांग्रेसका उम्मेदवार डम्बर खड्काले २१ हजार ९४२ मत ल्याएर दोस्रो बने । पार्टीको प्रारम्भिक विश्लेषणमा एक हजार मत कम हो । पहिचान पक्षधरका साझा उम्मेदवारका डकेन्द्रसिंह लिम्बूले ११ हजार ४ सय ५७ मत ल्याउँदा रास्वपाका मिलन लिम्बूले ५ हजार ५० मत ल्याए । कांग्रेसको बुझाइमा जित्न पर्याप्त हुने मत पहिचान पक्षधरका उम्मेदवार लिम्बूलाई गएको छ ।

इलाम– २ बाट उपचुनाव जितेका एमालेका सुहाङ नेम्वाङले २७ हजार ७७२ मत प्राप्त गरे । २०७९ को चुनावमा सुवास नेम्वाङ ३० हजार २० मत ल्याएर निर्वाचित हुँदा खड्काले २९ हजार ९ सय ६ मत पाएका थिए । त्यो मतमध्ये ७ देखि १० प्रतिशत मत काटिने अनुमान कांग्रेसको थियो । ५ वैशाखमा कांग्रेसका प्रचार विभाग प्रमुख मीन विश्वकर्माले शिलापत्रसँग भनेका थिए, ‘इलाम शिक्षित ठाउँ हो । वैदेशिक रोजगारमा पनि कम गएका छन् । खाडी मुलुकमा गएर कमाउने जति चियाबाटै कमाउँछन् । हाम्रो पार्टीबाट ७ देखि १० प्रतिशत मत बरालिने देख्छु ।’ उनले चुनावअघि पार्टीको सर्वेक्षणका आधारमा भनेका थिए । जसअनुसार डम्बरले २६ हजार ९ सयभन्दा बढी मत पाउनुपर्ने पूर्वानुमान कांग्रेसको थियो ।

कांग्रेसको मत सोचेभन्दा बढी अन्यत्र गएको इलामका नेताहरू बताउँछन् । ‘हाम्रो भोट पहिचानतिर धेरै गएको स्थिति छ । घन्टीतिर जान्छ कि भनेको त्यताभन्दा पहिचानतिर गयो,’ इलामका एक कांग्रेस नेताले शिलापत्रसँग भने, ‘हामीले सोचेभन्दा बढी भोट अन्यत्र गयो ।’

जनमतलाई स्वीकार गर्नुपर्ने कांग्रेस इलामका सचिव निरोज खड्गीले बताए । पार्टीले चुनावको हारबाट पाठ सिकेर भएका छिद्रहरू टाल्नुपर्ने उनले बताए । ‘संगठन राम्रो हुँदाहुँदै पनि हार्न पुग्यौँ । समीक्षा गर्नुपर्छ । भएका छिद्रहरू टाल्न आवश्यक छ,’ खड्गीले शिलापत्रसँग भने ।

२०७९ सालको चुनावमा समानुपातिकमा एमालेले २६ हजार ५ सय ६२, माओवादी केन्द्रले ५ हजार १ सय ५३, जनता समाजवादीले ९ सय ६, एकीकृत समाजवादीले ५ सय ८६ र स्वतन्त्रले ४ हजार ६ सय ८६ मत प्राप्त गरेका थिए । त्यो बेलामा माओवादी र कांग्रेसको गठबन्धन थियो । अहिले माओवादी गठबन्धनमा इमानदार देखिएको कांग्रेस नेताहरूको बुझाइ छ । ‘माओवादीको भोट गठबन्धनमा प्रतिबद्ध भएर एमालेमा गएको देखिन्छ,’ कांग्रेसका जिल्ला सचिव खड्गीले भने ।

अहिलेको उपचुनावमा डम्बर सुहाङभन्दा ५ हजार ८३० मतले पछि परे । सिधा रूपमा हेर्दा माओवादीको सोहीबराबरको भोटको अन्तर देखिन्छ ।

कांग्रेस एक्लै लड्दा इलामको परिणाम स्वाभाविक भएको र जित्ने चाहना पूरा हुन नसकेको पार्टी प्रवक्ता डा. प्रकाशशरण महत बताउँछन् । ‘त्यति बेला माओवादी र समाजवादीको पनि समर्थन थियो । अहिले हामी एक्लै लड्यौँ । पहिचानतिर मत गयो । यी सबै हेर्दा हामीले पाएको मत सम्मानजनक मत हो । यद्यपि हामी जित्न चाहन्थ्यौँ,’ महतले शिलापत्रसँग भने । आदिवासी जनजाति उम्मेदवार र सुवासचन्द्रका छोरा भएकाले सुहाङसँग मतदाता प्रभावित भएको हुन सक्ने उनले बताए । ‘पहिचान पक्षधरतिर केही मत गएको हुन सक्छ । हाम्रो कोर मत हामीले पाएका छौँ,’ प्रवक्ता महतले भने ।

कांग्रेस र एमालेको शक्ति उनीहरूको पक्षमा रहेकाले गठबन्धन जता हुन्छ, त्यता पल्ला भारी देखिने उनले बताए । ‘कांग्रेस र एमालेको मत स्थिर छ, जसले गठबन्धन गर्छ, त्यसको हैसियत बढ्ने हो । माओवादीको एक्लै लड्दा हैसियत तल हो । हामीसँग गठबन्धन गर्दा उहाँहरूको मत बढेको थियो,’ महतले भने ।

प्रकाशित मिति: मंगलबार, वैशाख १८, २०८१ १६:०९