सुहाङलाई बधाई दिँदै रवि लामिछानेले भने- जित्न सकिएन, सिक्न सकियो

फाइल तस्वीर ।

A+ A A-

राष्ट्रिय स्वतन्त्र पार्टीका सभापति रवि लामिछानेले इलाम-२ को उपनिर्वाचनबाट प्रतिनिधिसभा सदस्यमा निर्वाचित भएका एमालेका सुहाङ नेम्वाङलाई बधाई दिएका छन् ।

मंगलबार सामाजिक सञ्जाल एक्समा ट्वीट गर्दै उपप्रधानमन्त्री तथा गृहमन्त्रीसमेत रहेका लामिछानेले प्रतिनिधिसभा सदस्यमा निर्वाचित नेम्वाङलाई बधाई दिएका हुन् । नेम्वाङलाई बधाई दिँदै सभापति लामिछानेले आफ्ना पार्टीका उम्मेदवार मिलन लिम्बूलाई मत दिनेहरूप्रति आभार प्रकट गरेका छन् ।

उनले निर्वाचन जित्न नसकिए पनि सिक्न भने सकिएको बताएका छन् । 'इलाम २ को उपनिर्वाचनमा एमाले उमेदवार सुहाङ नेम्वाङजी विजयी हुनु भएकोमा हार्दिक बधाई ज्ञापन गर्दछु । हामीलाई मत दिनु हुने र मतसँगै ठूलो सन्देश दिनु हुने सबैप्रति आभारी छु,' उनले भनेका छन्, 'रास्वपा उम्मेदवार मिलन लिम्बुलगायत अहोरात्र खट्नु हुने सिङ्गो पार्टी पंक्तिलाई धन्यवाद । जित्न सकिएन, सिक्न सकियो ।'

इलाम २ को उपनिर्वाचनमा एमाले उमेदवार सुहाङ नेम्वाङ जी विजयी हुनु भएकोमा हार्दिक बधाई ज्ञापन गर्द्छु। हामीलाई मत दिनु हुने र मत संगै ठुलो संदेश दिनु हुने सबै प्रति आभारी छु। रास्वपा उमेदवार मिलन लिम्बु लगायत अहोरात्र खट्नु हुने सिङ्गो पार्टी पंक्तिलाई धन्यवाद। जित्न सकिएन, सिक्न…
— Rabi Lamichhane (@hamrorabi) April 30, 2024

सभापति लामिछानेले सहर्ष पराजित स्वीकार गर्दै जिम्मेवार ढंगले अभिव्यक्त हुन पनि पार्टीका सदस्यहरूलाई अनुरोध गरेका छन् । इलाम-२ मा रास्वपाका उम्मेदवार लिम्बूको जमानत नै जफत भएको छ । रास्वपाका उम्मेदवार लिम्बूले ५ हजार ५० मत मात्रै ल्याए ।

प्रतिनिधिसभा सदस्यमा निर्वाचित एमालेका सुहाङले २७ हजार ७७२ मत ल्याएका छन् । यस्तै, दोस्रो भएका कांग्रेसका डम्बर खड्काले २१ हजार ९४२ र तेस्रो भएका स्वतन्त्र उम्मेदवार डकेन्द्रसिंह थेगिमले ११ हजार ४५७ मत पाएका छन् ।

प्रकाशित मिति: मंगलबार, वैशाख १८, २०८१ १२:१३