सुर्खेतमा खुल्यो २५ शैयाको शिक्षण अस्पताल

A+ A A-

कर्णाली प्रदेशको राजधानी सुर्खेतको वीरेन्द्रनगरमा २५ शैय्याको अत्याधुुनिक अस्पताल खुलेको छ । शुभलक्ष्मी कलेज अफ हेल्थ साइन्स हस्पिटल प्रालिले २५ अस्पताल सञ्चालनमा ल्याएको हो ।

कर्णाली प्रदेशबाटै विभिन्न रोगको उपचार तथा निवारण गर्नका लागि अस्पताल सञ्चालन गरिएको हो । २५ शैय्याबाट सेवा सुरु गरेको अस्पतालले आगामी आर्थिक वर्षमा नर्सिङ पनि पढाउने तयारी गरेको छ । हाललाई मेडिकल अफिसरबाट निःशुल्क स्वास्थ्य परिक्षणको सुविधा प्रदान गरिने सञ्चालक ओमप्रसाद काफ्लेले जानकारी दिए ।

‘अहिले हामीले निःशुल्क उपचार गर्ने व्यवस्था मिलाएका छौं,’ उनले भने, ‘आगामी दिनमा हामीले नर्सिङ पढाइसमेत सञ्चालन गर्ने तयारी गरेका छौं ।’

अहिले आधारभुत स्वास्थ्य सेवामा पहुँच पुर्‍याउने उद्देश्यले मात्र सञ्चालन गरिएको भएपनि आगामी दिनमा सेवा विस्तार गरिने सञ्चालक काफ्लेले बताए ।

‘अहिले हामी कसरी सर्वसुलभ तरिका आधारभुत सेवा दिने भन्ने विषयमा केन्द्रित छौं,’ उनले भने, ‘आगामी दिनमा सबै सेवासुविधा समेटेर विस्तार गर्ने लक्ष्य राखेका छौं ।’

वीरेन्द्रनगर–८, इत्राममा सञ्चालनमा आएको अस्पतालले अत्याधुनिक सेवा दिने सञ्चालक पसल रोकायाले बताए ।

‘कर्णालीमा अहिले स्वास्थ्योपचारको सुविधा एकदमै कमजोर अवस्थामा छ,’ उनले भने, ‘कर्णालीका नागरिकको आधारभुत स्वास्थ्यसेवामा पहुँच बढाउनका लागि अस्पताल सञ्चालन गरेका हौं ।’

विद्यार्थी नेता देवीचन्द्र उपाध्यायले सेवाको गुणस्तरमा ध्यान दिन सुझाव दिए । ‘स्वास्थ्य सेवामा पहुँच वृद्धि हुनु सकारात्मक हो,’ उनले भने, ‘तर यो संवेदनशील विषय भएकाले गुणस्तरमा ध्यान दिएर काम गर्न जरुरी हुन्छ ।’

अस्पतालको उपराष्ट्रपति नन्दबहादुर पुनले उद्घाटन गर्ने कार्यक्रम रहेको थियो । तर, निर्धारित तालिका अनुसार कार्यक्रम नभएको भन्दै उनी कार्यक्रममा उपस्थित भएनन् ।

प्रकाशित मिति: बिहीबार, कात्तिक ७, २०७६ २०:४९