कप्तान रोहित पौडेल भन्छन्– विश्वकपका लागि उत्कृष्ट १५ खेलाडी छान्न कठिन छ

A+ A A-

नेपाली क्रिकेट टोलीका कप्तान रोहितकुमार पौडेलले राष्ट्रिय टोलीका लागि सम्भावना बोकेका धेरै खेलाडी रहेकाले ट्वान्टी–२० विश्वकपका लागि अन्तिम १५ खेलाडी छनोट गर्न चुनौतीपूर्ण हुने बताएका छन् ।

शनिबार त्रिविमा वेस्टइन्डिज ‘ए’ विरुद्ध कप्तानी इनिङ खेल्दै जित दिलाएपछि पत्रकार सम्मेलनमा रोहितले आगामी जुनमा अमेरिका र वेस्टइन्डिज जाने टिमबारे भनाइ राखेका हुन् ।

आयरल्यान्डसँगको खेलबाट नै सबै खेलाडीमा राम्रो क्षमता देखिएको र सबैमा रिप्लेसमेन्ट गर्नसक्ने क्षमता रहेको रोहितले उल्लेख गरे । त्यसैले ट्वान्टी–२० विश्वकपका लागि उत्कृष्ट १५ खेलाडी छान्न चुनौती हुने उनको भनाइ छ । उनले क्षमतावान खेलाडी धेरै रहेको उल्लेख गर्दै समग्रमा सबैको प्रदर्शन राम्रो रहेको धारणा पनि राखे । तर आउने दिनमा जसले राम्रो गर्न सक्छ त्यहाँबाट उत्कृष्ट १५ खेलाडी विश्वकपका लागि छनोट हुने कप्तान रोहितको विश्वास छ । आगामी १÷२ खेलमा नै विश्वकपका लागि सबैको भूमिका तय हुने पनि रोहितले बताए ।

उनले आजको शतकीय इनिङ खेल्छु नै भन्ने योजनामा नरहेको पनि उल्लेख गरे । आफूले बलमा ध्यान दिँदै सोहीअनुरूप ब्याटिङ गरेको उनको भनाइ छ । तर रोहितले सोचेअनुरूप ब्याटिङ भएको बताए । उनँले आज आफ्नो दिन थियो जस्तो लागेको पनि उल्लेख गरे । कप्तान रोहितले प्रशिक्षक मोन्टी देसाईसँग एउटा खेलाडीले राम्रो गर्नसक्यो भने टोलीमा आत्मविश्वास बढ्छ भन्ने छलफल हुने गरेको जनाए । त्यसैले यो इनिङले टोलीमा आत्मविश्वास बढ्ने उनले आशा व्यक्त गरे ।

नेपाली टोलीका प्रशिक्षक मोन्टी देसाईले ओमान भ्रमण आशातित प्रदर्शन गर्न नसकिएको उल्लेख गर्दै त्यसको जिम्मेवारी आफूले लिने बताए । तर आज रोहितले राम्रो प्रदर्शन गरेको प्रशिक्षक मोन्टीले बताए । पछिल्लो १५ महिनामा रोहितको उत्कृष्टमध्ये आज एक प्रदर्शन गरेको प्रशिक्षकको बुझाइ छ ।

उनले एउटा खेलबाट कोही पनि राम्रो र नराम्रो भन्न नसकिने पनि स्पष्ट पारे । प्रशिक्षक मोन्टीले वेस्टइन्डिजसँगको यो खेलले नेपाली टोलीमा आत्मविश्वास बढाउने आशा व्यक्त गरे । वेस्टइन्डिजका प्रशिक्षक फ्लोयड रेइफरले आजको खेलमा राम्रो गर्न नसके पनि आगामी खेलमा राम्रो गर्न आशा व्यक्त गरे । आफ्नो टोलीले राम्रो शुरुवात गरे पनि त्यसलाई सदुपयोग गर्न नसकेको बताए ।

प्रकाशित मिति: शनिबार, वैशाख १५, २०८१ १८:२८