आज दिनभर : सहकारीबारे मन्त्रिपरिषद्‌मा गम्भीर छलफल, एमाले छाेड्ने भीम रावलकाे संकेत (भिडियाे)

आज दिनभर : सहकारीबारे मन्त्रिपरिषद्‌मा गम्भीर छलफल, एमाले छाेड्ने भीम रावलकाे संकेत (भिडियाे)

A+ A A-

इलाम–२ को प्रतिनिधिसभा र बझाङको प्रदेशसभाको उपनिर्वाचनका लागि नेपाल प्रहरीले तीन चरणको सुरक्षा योजना तयार पारेकाे छ । १ हजारभन्दा बढी जनशक्ति र आवश्यकता अनुसार मोबाइल जनशक्ति पनि खटाइने भएकाे छ । दुवै क्षेत्रमा गरी ६९ मतदान केन्द्र अति संवेदनशील छन् ।

एमालेका पूर्वउपाध्यक्ष भीम रावलले पार्टी छाड्नसक्ने संकेत गरेका छन् । आफूलाई जबर्जस्ती घुम्तीमा धकेलेको महसुस भएको उनले बताए । १०औँ महाधिवेशनमा अध्यक्षमा केपी ओलीसँग प्रतिस्पर्धा गरेकै कारण महाधिवेशन प्रतिनिधि परिषद्को बैठकमा निषेध गरिएको नेता रावलको गुनासो छ ।

श्रम स्वीकृति २ मिनेट ४४ सेकेण्डमा दिइरहेको श्रममन्त्री डोलप्रसाद अर्यालको दाबी छ । श्रमिकहरूको हवाई भाडा तथा सुविधाको उचित व्यवस्थापन गर्न नेपाल नागरिक उड्डयन प्राधिकरण, वैदेशिक रोजगार व्यवासयी महासंघ र नेपाल एसोसिएसन अफ टुर एन्ड ट्राभललाई वैदेशिक रोजगार विभागले पत्र काटेकाे छ ।

सहकारीको समस्यासम्बन्धी विषयमा मन्त्रिपरिषद् बैठकमा गम्भीर छलफल भएकाे छ । फास्ट ट्र्याकबाट तत्काल कानुनी व्यवस्था गरी सहकारीका बचनकर्ताले बेहोर्नुपरेको समस्याको समाधान प्रक्रिया सुरु गर्ने निर्णय भएकाे छ ।

कर्णाली प्रदेशका मुख्यमन्त्री यामलाल कँडेलले प्रदेशसभाबाट विश्वासको मत पाएका छन् । साताको अन्तिम कारोबार दिन शेयर बजार परिसूचक नेप्सेमा ३.२४ अंकको गिरावट भएकाे छ ।

इजरायल र युक्रेनलाई ९५ अर्ब डलर सहयोग घोषणासँगै अमेरिकामा इजरायलविरुद्ध विद्यार्थीको प्रदर्शन भएकाे छ ।२५ वटा विश्वविद्यालयका विद्यार्थीहरू इजरायली हमला रोक्न माग गर्दै प्रदर्शनमा उत्रेका छन् ।

वेस्ट इन्डिज ‘ए’ विरुद्धको टी–२० शृंखलाका लागि क्यानले रोहितकुमार पौडेलको कप्तानीमा १६ सदस्यीय टोलीको घोषणा गरेकाे छ । एसीसी प्रिमियर कपमा सहभागी नभएका आरिफ शेख र आकाश चन्दलाई मौका मिलेकाे छ ।

भिडियाे :