असारसम्म आयोजनास्थल नछोड्न आयोजना प्रमुखहरूलाई भौतिक मन्त्रीको निर्देशन

A+ A A-

उपप्रधानमन्त्री एवं भौतिक पूर्वाधार तथा यातायातमन्त्री रघुवीर महासेठले चैत १५ सम्म भौतिक प्रगति १९ प्रतिशत मात्रै भएको भन्दै कर्मचारीहरूसँग असन्तुष्टि व्यक्त गरेका छन् । बिहीबार नेपाल निजामती कर्मचारी संगठनको क्यालेन्डर विमोचन कार्यक्रममा बोल्दै मन्त्री महासेठले चालु आर्थिक वर्षको चैत १५ सम्ममा १९ प्रतिशत मात्रै भौतिक प्रगति हुनु दयनीय अवस्था भएको बताए ।

उनले आर्थिक समस्या भएको अवस्थामा वित्तीय प्रगति त्यति हुँदा चित्त बुझाउने ठाउँ भए पनि भौतिक प्रगतिमा त्यस्तो नहुने बताए । उनले आयोजनाहरूको आगामी असार १५ गतेसम्म सबै भुक्तानी गराउने तर कार्यतालिकाअनुसार दु्रत गतिमा काम गर्न निर्देशन दिए । उनले आयोजनाहरूको एक चरणको भुक्तानी भएको भन्दै अर्को चरणको पनि चाँडै हुने विश्वास दिलाए । उनले आयोजना प्रमुख र आयोजनामा काम गर्ने कर्मचारीहरू असार मसान्तसम्म कार्यस्थल छोडेर कतै नजान पनि निर्देशन दिए ।

उनले कार्यतालिका अनुसार असार मसान्तसम्म परिणाम दिनेगरी काम गर्न निर्देशन दिए । उनले आयोजना छोडेर अनावश्यक रुपमा सरुवा गर्न वा अन्य कामका लागि काठमाडौंमा रहेका आयोजनाका प्रमुख वा कर्मचारीहरूलाई तत्काल कार्यस्थलका पठाउने सचिव तथा आयोजनाका विभागीय प्रमुखहरूलाई निर्देशन दिए । उनले आयोजनामा कार्यतालिका अनुसार काम गर्न काठमाडौं नआउने निर्देशन गरेकाले तत्काल कुनै पनि कर्मचारीहरूलाई कतै सरुवा नगर्ने प्रतिवद्धता जनाए । उनले ९८ प्रतिशत कर्मचारी सरुवा नगर्ने उल्लेख गरे ।

मन्त्री महासेठले सरकारले निजामती कर्मचारीसम्बन्धी ऐन कर्मचारीहरूको हितमा ल्याउने बताए । उनले उक्त ऐनमा आवश्यक संशोधनका लागि कानुनी विज्ञहरूसँग छलफल गरी प्रतिवेदन तयारी पारेर दिन आग्रह गरे । उनले तत्काल कर्मचारी ऐन ल्याउने पक्षमा सरकार रहेको बताए ।

प्रकाशित मिति: बिहीबार, वैशाख १३, २०८१ १९:११