श्रम समस्या समाधान गर्न मन्त्री अर्याललाई सांसदहरुले गराए ध्यानाकर्षण

A+ A A-

प्रतिनिधिसभा सदस्यहरूले श्रम समस्या समाधान गर्नका लागि विभिन्न कदमहरू चाल्न श्रम, रोजगार तथा सामाजिक सुरक्षामन्त्रीको ध्यानाकर्षण गराएका छन् । बिहीबार प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा सांसदहरूले श्रम समस्या समाधानका लागि विभिन्न उपायहरू सुझाएका हुन् ।

बैठकमा प्रतिनिधिसभा सदस्य रमा कोइराला पौडेलले श्रमिकहरूको समस्या समाधानका लागि श्रम आयोग गठन गर्नुपर्ने धारणा राखिन् । उनले श्रमिक र व्यवसायीका बीचमा द्वन्द्व हुने गरेको भन्दै त्यस प्रकारका समस्या समाधानका लागि आयोग चाहिने बताइन् ।

उनले आयोगले वैदेशिक रोजगारीमा जानेहरूको समस्या पनि हेर्ने बताइन् । त्यस्तै उनले वैदेशिक रोजगारीमा जानेहरूको स्वास्थ्य परीक्षणमा सिन्डिकेट रहेको भन्दै त्यसको अन्त्य गर्नुपर्ने बताइन् । उनले प्रत्येक प्रदेशमा एउटा श्रमिक अस्पताल बताउनुपर्ने पनि बताए ।

प्रतिनिधिसभा सदस्य कान्तिका सेजुवालले प्रधानमन्त्री रोजगार कार्यक्रम विदेशीको चाहनाअनुरुप चलिरहेको बताइन् । उनले यो कार्यक्रमलाई नयाँ संरचनामा चलाइने भनिएको भन्दै कस्तो नयाँ संरचना हो स्पष्ट खाका समितिसमक्ष ल्याउन मन्त्रीलाई आग्रह गरिन् ।

प्रतिनिधिसभा सदस्य रणेन्द्र बरालीले महिला श्रमिकहरूलाई वैदेशिक रोजगारीमा पठाउने सन्दर्भमा राष्ट्रिय नीति नै बनाउनुपर्ने बताइन् । उनले वैदेशिक रोजगारीमा जाने महिलाहरूले हिंसा भोग्नुपरेको भन्दै यसलाई गम्भीर रूपमा लिनुपर्ने बताइन् ।

प्रतिनिधिसभा सदस्य सूर्यमान दोङले श्रमिकहरूको न्यूनतम पारिश्रमिक १७ हजार ५ सय रुपैयाँबाट बढाउनुपर्ने बताइन् । उनले स्वास्थ्य र शिक्षामा पूर्ण रूपमा बीमा गर्नुपर्ने धारणा राखिन् ।

प्रतिनिधिसभा सदस्य अमृतादेवी अग्रहरीले श्रमिकहरूको समस्या समाधानका लागि राजनीतिक नेतृत्वभन्दा प्रशासनिक नेतृत्व गम्भीर हुनुपर्नेमा त्यस्तो हुन नसकेको बताइन् । उनले कर्मचारीहरूले स्थायी सरकारको रूपमा देश चलाउने भन्दै श्रमिकहरूप्रति कर्मचारी संवेदनशील हुनुपर्ने बताइन् । उनले फ्रि भिसा फ्रि टिकट कार्यान्वयन हुन नसकेको भन्दै यसतर्फ मन्त्रीको ध्यानाकर्षण गराइन् ।

प्रकाशित मिति: बिहीबार, वैशाख १३, २०८१ १८:५४