अमेरिकाका २५ विश्वविद्यालयमा इजरायलविरुद्ध प्रदर्शन, सयभन्दा धेरै विद्यार्थी पक्राउ

अमेरिकाका २५ विश्वविद्यालयमा इजरायलविरुद्ध प्रदर्शन, सयभन्दा धेरै विद्यार्थी पक्राउ

A+ A A-

अमेरिकी सिनेटले इजरायल र युक्रेनलाई ९५ अर्ब डलर बराबरको सहायता स्वीकृत गरेकै समयमा अमेरिकामा प्यालेस्टाइनको समर्थनमा प्रदर्शन बढेको छ । अमेरिकाका कोलम्बिया, लस एन्जलस र अस्टिनसहित २५ वटा विश्वविद्यालयमा गाजामाथि इजरायली हमला रोक्न माग गर्दै प्रदर्शन भएका हुन् । प्रदर्शनका क्रममा एक सयभन्दा बढी विद्यार्थी पक्राउ परेका छन् ।

प्रदर्शन चर्किएपछि केही स्थानमा प्रहरीसँग झडपसमेत भएको छ । यस क्रममा टेक्सास विश्वविद्यालयमा ३४ विद्यार्थी पक्राउ परेका छन् भने क्यालिफोर्निया विश्वविद्यालयमा करिब ३० जनालाई पक्राउ गरिएको छ । अन्य १५० विद्यार्थीलाई कलेजबाट निकाल्ने धम्की दिइएको छ ।

इजरायली प्रधानमन्त्री बेन्जामिन नेतान्याहुले पनि अमेरिकी विश्वविद्यालयमा इजरायलको युद्धविरुद्धको प्रदर्शनले भयानक रूप लिएको बताएका छन् । उनले यहुदी विरोधीले विश्वविद्यालय कब्जा गरेको र उनीहरू इजरायललाई मेटाउनुपर्छ भन्ने पक्षमा रहेको आरोप लगाएका छन् । उनले अमेरिकामा यहुदी विद्यार्थी र प्राध्यापकसमेत निशानामा परेको भन्दै यसलाई तत्काल रोक्न माग गरेका छन् ।

प्रदर्शनका क्रममा अमेरिकी सभामुख माइक जोनसन पनि कोलम्बिया विश्वविद्यालय पुगेका थिए । उनले प्रदर्शन रोक्न ह्वाइट हाउससँग आग्रह गर्दै प्रदर्शन दबाउन नेशनल गार्ड खटाउन समेत माग गरेका छन् । जोनसनको सम्बोधनका क्रममा विद्यार्थीहरूले प्यालेस्टाइनको पक्षमा नारा लगाएका थिए ।

प्रदर्शनकारीले इजरायलबाट लाभ कमाउने विश्वविद्यालयका कम्पनीहरू त्यहाँबाट बाहिरिनुपर्ने, तेल अभिभ क्याम्पस बन्द गर्नुपर्ने लगायतका माग राखेका छन् । इजरायल हमास युद्ध यतिबेला रफाहमा पुगेको छ । जहाँ गाजाका १० लाखभन्दा बढीले शरण लिइरहेका छन् । इजरायल–हमास युद्धका क्रममा हालसम्म ३४ हजारभन्दा बढीको मृत्यु भइसकेको छ । जसमध्ये १४ हजार ५०० भन्दा बढी बालबालिका छन् ।

एकातिर अमेरिकाले युद्ध रोक्न इजरायललाई आग्रह गरिरहेको छ भने अर्कोतिर इजरायललाई नै सहयोग रकम दिइरहेको छ । बुधबारमात्रै अमेरिकी सिनेटले सहयोग प्याकेज पारित गरेपछि प्रदर्शन पनि चर्किएको हो । विरोध प्रदर्शन गरिरहेका विद्यार्थीले इजरायललाई दिएको सहयोगको विरोध गरिरहेका छन् ।

प्रकाशित मिति: बिहीबार, वैशाख १३, २०८१ १७:१०