जुम्ला पुर्‍याइँदै छ राष्ट्रिय प्रसारणको १३२ केभी लाइन

A+ A A-

सरकारले आगामी साढे दुई वर्षभित्र जुम्लामा विद्युत्‌को १३२ केभी प्रसारण लाइनलाई विस्तार गर्ने गरी प्रक्रिया अगाडि बढाएको छ ।

संघीय सरकारको ऊर्जा, जलस्रोत तथा सिँचाइ मन्त्रालयअन्तर्गतको विद्युत्‌ विकास विभागले दैलेख–कालीकोट–जुम्ला १३२ केभी विद्युत्‌ प्रसारण लाइन कार्यान्वयन गर्न आयोजनासम्बन्धी सार्वजनिक सूचना जारी गरेको हो । विभागले ५ वैशाखमा प्रथमपटक ३५ दिने सार्वजनिक सूचना जारी गर्दै प्रस्तावित प्रसारण लाइन निर्माण तथा सञ्चालन गर्दा उल्लेखनीय प्रतिकूल असर पर्ने भए विभाग वा प्रवर्तक नेपाल विद्युत्‌ प्राधिकरणमा आफ्नो लिखित राय तथा प्रतिक्रिया दिन भनेको छ ।

दैलेख जिल्लाको डुङ्गेश्वर गाउँपालिका– १, बेलघारीमा रहेको सबस्टेसनबाट सुरु भई कालीकोटहुँदै जुम्लाको चन्दननाथ नगरपालिका– ९ स्थित बयलकटियामा निर्माण गरिने जुम्ला सबस्टेसनसम्म विस्तार गरिने प्रसारण लाइनबाट पर्न सक्ने सामाजिक, आर्थिक तथा वातावरणीय प्रभावका बारेमा विभागले सम्बन्धित क्षेत्रका स्थानीय र सरोकारवालासँग राय मागेको हो ।

‘डब्बल सर्किटसहित ८२ दशमलव १४ किलोमिटर लामो १३२ केभी विद्युत्‌ प्रसारण लाइन निर्माण गर्न विद्युत्‌ ऐन, २०४९ को दफा ४ को व्यवस्थाअनुसार विद्युत्‌ नियमावली, २०५० को नियम १३ मा उल्लेखित विवरण खुलाई विद्युत्‌ प्रसारण लाइनको अनुमतिपत्रका लागि प्रवर्तक नेपाल विद्युत्‌ प्राधिकरणले दरखास्त पेस गरेकाले विद्युत्‌ नियमावली २०५० को नियम १५ बमोजिम आवश्यक जाँचबुझ गरी नियम १६ को प्रयोजनका लागि तपसिलका विवरणहरू खुलाई यो सूचना प्रकाशित गरिएको छ,’ विभागले ३५ दिने सार्वजनिक सूचनामार्फत भनेको छ ।

प्रचलित नेपाल विद्युत्‌ प्राधिकरण ऐन, २०४१ अन्तर्गत गठन भएको नेपाल विद्युत्‌ प्राधिकरणले विस्तार गर्न लागेको डब्बल सर्किटसहितको प्रसारण लाइनबाट एक लाख ३२ हजार भोल्ट र २ सय ३८ मेगावाटसम्मको विद्युत्‌ शक्ति प्रसारण हुने विभागले जनाएको छ । यो प्रसारण लाइन तीन जिल्लामा विस्तार हुनेछ । दैलेखमा रहने सवस्टेसनका लागि सुर्खेतदेखि प्रसारण लाइन विस्तारको काम केही समयमा सुरु गर्न लागिएको जनाइएको छ ।

हाल कोहलपुर–सुर्खेत १३२ केभी प्रसारण लाइन विस्तारको काम जारी छ । सुर्खेतको सुब्बाकुुनामा रहने सबस्टेसनबाट दैलखमा रहने सबस्टेसनसम्म पुग्ने प्रसारण लाइन विस्तारको प्रक्रिया अगाडि बढिसकेको कोहपुर–सुर्खेत १३२ केभी प्रसारण आयोजनाका प्रमुख रवि चौधरीले बताए ।

कोहलपुर–सुर्खेत प्रसारण आयोजनाअन्तर्गत हालसम्म सुर्खेत खण्डमा विद्युत्‌का टावर निर्माण गरी तार तान्ने काम अन्तिम चरणमा पुगेको छ भने, बाँके र बर्दिया राष्ट्रिय निकुञ्ज क्षेत्रमा रुख कटानको काम सुरु भएको छ । सुर्खेत खण्डमा प्रसारण लाइन विस्तार गर्ने कार्य अन्तिम चरणमा पुगेको भए पनि आयोजनाले निकुञ्ज क्षेत्रमा रुख कटानको अनुमति नपाउँदा आयोजना निर्माणमा ढिलाइ हुँदै आएको थियो ।

निकुञ्ज क्षेत्रमा समस्या सुल्झिए पनि बैजनाथमा भने स्थानीयको अवरोधका कारण आयोजना अगाडि बढ्न सकेको छैन । स्थानीयहरूसँग विवाद समाधानका लागि संवाद जारी रहेको आयोजना प्रमुख चौधरीले बताए । यो प्रसारण लाइन निर्माण भएसँगै कर्णालीमा सामान्य हावा लाग्दा पनि बिजुली जाने समस्याको दीर्घकालीन हल हुनेछ । हाल कर्णालीका आठ जिल्लामा ५० को दशअघि निर्माण भएको ३३ केभी प्रसारण लाइनबाट विद्युत्‌ आपूर्ति हुँदै आएको छ ।

यस्तो छ प्रसारण लाइनको रुट

दैलेखको डुङ्गेश्वर गाउँपालिका– १, बेलघारीमा रहेको दैलेख सबस्टेसनदेखि सुरु भई सोही जिल्लाको नारायण नगरपालिकाका वडा नम्बर ४, ५, ७, ८, ९, १० र ११, नौमुले गाउँपालिकाका वडा नम्बर १, २ र ८ हुँदै कालीकोट जिल्लाको तिलागुफा नगरपालिकाका वडा नम्बर १, ३, ४, ९ र ११, महावै गाउँपालिकाका वडा नम्बर २, ३ र ४ हुँदै जुम्ला पुर्‍याइनेछ ।

यस्तै, जुम्लाको हिमा गाउँपालिकाका वडा नम्बर ६ र ७, तिला गाउँपालिकाका वडा नम्बर १, २ र ३, तातोपानी गाउँपालिकाका वडा नम्बर १, २, ३ र ६ हुँदै चन्दननाथ नगरपालिका वडा नम्बर ९ स्थित बयलकटियामा बन्ने सबस्टेसनमा गएर टुङ्गिनेछ । कुल ८२ दशमलव १४ किलोमिटर लामो डब्बल सर्किटसहितको १३२ केभी प्रसारण लाइन निर्माण गरिनेछ, जसमा २ सय ७९ वटा टावरहरू निर्माण गरिनेछ ।

टावरको उचाइ ३० देखि ४० मिटरसम्म रहने टावरहरूबीचको औसत दूरी २९६ दशमलव ५५ मिटर रहनेछ । यस आयोजनाअन्तर्गत दैलेख–कालीकोट र जुम्ला जिल्लामा १३२/३३/११ केभी सबस्टेसनहरू निर्माण गरिनेछ । आयोजना निर्माणका लागि कुल १ सय ५० दशमलव ३३ हेक्टर जमिन आवश्यक पर्ने विद्युत्‌ विकास विभागले जनाएको छ । जसमध्ये २ सय ७९ टावरहरूका लागि स्थायी रूपमा करिब १२ दशमलव ४ हेक्टर जग्गा आवश्यक पर्नेछ ।

यसबाहेक विद्युत्‌ मार्गको अधिकार क्षेत्रभित्र राइट अफ वेअन्तर्गत १३२ दशमलव ६९ हेक्टर जग्गा आयोजनालाई आवश्यक पर्नेछ । प्रसारण लाइनको क्षेत्राधिकार विद्युत्‌ नियमावली, २०५० मा तोकिएबमोजिम न्यूनतम दूरीमा नघटाई प्राविधिक दृष्टिकोण बाट १८ मिटर (मध्य विन्दुबाट नौ/नौ मिटर दायाँबायाँ) कायम गरिनेछ । प्रसारण लाइनको निर्माण कार्य साढे दुई वर्षभित्र सम्पन्न गरिने लक्ष्य राखिएको विभागले जनाएको छ ।

प्रकाशित मिति: बिहीबार, वैशाख १३, २०८१ १३:२०