मन्त्रालयको भागवण्डा मिलेपछि कर्णालीका मुख्यमन्त्री कँडेलले आज विश्वासको मत लिँदै

मन्त्रालयको भागवण्डा मिलेपछि कर्णालीका मुख्यमन्त्री कँडेलले आज विश्वासको मत लिँदै

A+ A A-

मुख्यमन्त्री नियुक्त भएको दुई सातापछि कर्णालीका मुख्यमन्त्री यामलाल कँडेलले आज विश्वासको मत लिँदैछन् ।

विश्वासको मतको प्रयोजनका लागि दिउँसो ३ बजे प्रदेशसभाको बैठक बोलाइएको छ । सत्ता गठबन्धनमा रहेका एमाले र माओवादी केन्द्रबीच मन्त्रालयको भागवण्डा नमिलेका कारण विश्वासको मत लिन ढिलाइ भएको थियो ।

माओवादी केन्द्रको दाबीअनुसार मन्त्रालय दिन मुख्यमन्त्री कँडेल राजी नभएपछि सहमति जुटेको थिएन । सहमति जुटाउने क्रममा बुधबार मात्रै मुख्यमन्त्री कँडेलले माओवादी केन्द्रका रणसिंह परियारलाई मन्त्री नियुक्त गरेका थिए । सहमतिअनुसार माओवादीले आर्थिक मामिला तथा योजना मन्त्रालय, सामाजिक विकास मन्त्रालय, उद्योग, पर्यटन, वन तथा वातावरण मन्त्रालय र जलस्रोत तथा ऊर्जा विकास मन्त्रालय लिनेछ ।

एमालेले भौतिक पूर्वाधार तथा शहरी विकास मन्त्रालय, आन्तरिक मामिला तथा कानुन मन्त्रालय र भूमि व्यवस्था, कृषि तथा सहकारी मन्त्रालय लिनेछ । एमाले र माओवादी केन्द्रबीच सामाजिक विकास मन्त्रालय कसले लिने भन्नेमा रस्साकस्सी परेको थियो । एमाले र माओवादी केन्द्रले मन्त्रालयको भागवण्डा टुंगो लगाए पनि मन्त्रीहरूको नाम भने टुंगो लागेको छैन । मन्त्रीका आकांक्षीको संख्या धेरै भएकाले दलहरू आन्तरिक छलफलमा छन् ।

कँडेल २७ चैत २०८० मा मुख्यमन्त्रीमा नियुक्त भएका थिए । ४० सदस्यीय कर्णाली प्रदेशसभामा माओवादी केन्द्रका १३, एमालेका १० र एकीकृत समाजवादीका १ सांसद छन् ।त्यसैगरी, कांग्रेसका १४, राप्रपाका १ र एक जना स्वतन्त्र सांसद छन् । मुख्यमन्त्रीले विश्वासको मत पाउन २१ सांसदको समर्थन आवश्यक पर्छ । एमाले र माओवादी मिल्दा प्रदेशसभामा २३ सांसद हुन्छन् । त्यसमा एकीकृत समाजवादीसमेत थपिँदा २४ सांसद हुन्छन् । त्यसैले मुख्यमन्त्री कँडेलले विश्वासको मत पाउने पक्का छ ।