चित्रकलामा भविष्य खोजिरहेकी निर्मला, पढाइसँगै घरखर्चको जोहो गर्न कोर्छिन् चित्र

चित्रकलामा भविष्य खोजिरहेकी निर्मला, पढाइसँगै घरखर्चको जोहो गर्न कोर्छिन् चित्र

A+ A A-

कञ्चनपुरकी कृष्णपुर नगरपालिका–१, सुन्दरीफाँटाकी २४ वर्षीया निर्मला चौधरी स्नातक तेस्रो वर्षमा अध्ययनरत छिन् । उनले पढाइसँगै घरखर्च जोहो गर्न चित्र बनाउँदै आएकी छिन् ।

तस्वीरलाई जस्ताको त्यस्तै उतार्न सक्ने कला भएकी निर्मला चित्र कोर्न ठाउँ-ठाउँमा पुगिरहन्छिन् । चित्रकलामै भविष्य खोजिरहेकी निर्मला यसलाई नै जीविकोपार्जनको माध्यम बनाउने योजनामा छिन् ।

'चित्र कोर्ने सानैदेखिको सोख हो । तस्वीर हेरेर त्यसको ‘स्केच’ बनाउने र ‘पेन्टिङ’ गर्छु । अहिले यसबाट थोरै आम्दानी पनि हुन थालेको छ,' उनले भनिन्, 'पढाइलाई पनि सँगै अगाडि बढाएकी छु । कलेजमा व्यतित हुने समयबाहेक फुर्सदमा चित्र कोर्छु ।'

तस्वीर कोरेको र पेन्टिङ गरेको प्रतिवर्ग फिट दुई सयदेखि दुई सय ५० रुपैयाँसम्म पाइने गरेको छ । पढाइसँगै फुर्सदको समयमा चित्र कोरेर हुने आम्दानीले अध्ययनका साथै घरखर्च जोहो गर्न सहजता भएको निर्मलाको भनाइ छ । निर्मलाका आमाबुबासहित छ सदस्यीय परिवार छ । उनी जेठी छोरी हो । आमाबुबा सुन्दरीफाँटामै खेती गर्छन् । त्यहाँ निर्मलाको १५ कट्ठा जमिन पनि छ ।

'परिवारको आर्थिक अवस्थाले नधानेर माइली बहिनीले पढाइ छोडिन् । अहिले पसलमा काम गर्छिन् । अरु हामीहरू जेनतेन अध्ययन गरिरहेका छौँ,' निर्मलाले तीन बहिनीका समस्या सुनाउँदै भनिन्, 'चित्रबाट प्राप्त हुने सीमित रकमले जेनतेन अध्ययन खर्च चलेको छ ।'

पछिल्लो समय अत्याधुनिक प्रविधिको प्रयोग हुँदा चित्रकारले काम पाउन कठिन भएको उनको गुनासो छ । 'काम पाइएको बेला राम्रै आम्दानी हुन्छ । प्रविधिले गर्दा आजभोलि काम पाउन मुस्किल छ,' उनले भनिन् । २०७५ सालमा उनले चित्र बनाउने र पेन्टिङको तालिम लिएकी थिइन् ।

चित्रकलामा महिलाको उपस्थिति नगन्य छ । जिल्लाभर चार-पाँच जना महिला मात्रै व्यावसायिक रूपमा चित्रकलामा आबद्ध रहेको नेपाल कमर्सियल आर्टिस्ट संघका सल्लाहकार सुरेश पथिकले बताए । रासस

प्रकाशित मिति: बिहीबार, वैशाख १३, २०८१ ०८:३३