कतारका राजा अल थानी र प्रधानमन्त्री प्रचण्डबीच एक्लाएक्लै छलफलपछि सुरु भयो द्विपक्षीय वार्ता

कतारका राजा अल थानी र प्रधानमन्त्री प्रचण्डबीच एक्लाएक्लै छलफलपछि सुरु भयो द्विपक्षीय वार्ता

A+ A A-

दुई दिने नेपाल भ्रमणका लागि मंगलबार काठमाडौं आएका कतारका अमिर (राजा) शेख तमिम विन हमाद अल थानी र प्रधानमन्त्री पुष्पकमल दाहाल 'प्रचण्ड' बीच बुधबार एक्लाएक्लै वार्ता भएको छ ।

होटल सोल्टीमा प्रचण्ड र थानीबीन एक्लाएक्लै वार्ता भएको हो । उक्त वार्तापछि कतारी अमिर र प्रधानमन्त्री प्रचण्ड नेतृत्वको द्विदेशीय प्रतिनिधिमण्डलबीचको वार्ता सुरु भएको छ ।

वार्तामा नेपाल–कतार सम्बन्धका समग्र पक्षमा विचारविमर्श हुनका साथै क्षेत्रीय र अन्तर्राष्ट्रिय चासोका विषयमा छलफल हुने परराष्ट्र मन्त्रालयले जनाएको छ । वार्तापछि उनीहरूको उपस्थितिमा द्विपक्षीय सम्झौता र समझदारीपत्रमा हस्ताक्षर हुनेछ ।

नेपाल र कतारबीचको युवा तथा खेलकुद सहयोग, उच्च शिक्षा तथा वैज्ञानिक अनुसन्धानका क्षेत्रमा सहयोगसम्बन्धी समझदारीपत्रमा हस्ताक्षर हुनेछ । राष्ट्रिय समाचार समिति (रासस) र कतार न्यूज एजेन्सीबीच समाचार आदाप्रदानसम्बन्धी समझदारीपत्रमा पनि हस्ताक्षर हुनेछ ।

दुई देशबीच कला र संस्कृति, महान्यायाधिवक्ताको कार्यालयसम्बन्धी र वैदेशिक मामिलासम्बन्धी सम्झदारीपत्रमा हस्ताक्षर गर्ने कार्यक्रम रहेका परराष्ट्र मन्त्रालयका प्रवक्ता अमृतबहादुर राईले जानकारी दिए ।

कतारी अमिरको सम्मानमा प्रधानमन्त्री प्रचण्डले दिवाभोजको आयोजना गर्नेछन् । कतारका अमिर थानी राष्ट्रपति रामचन्द्र पौडेलको निमन्त्रणामा मंगलबार अपराह्न काठमाडौं आइपुगेका हुन् । कतारी विशिष्ट अतिथि आजै अपराह्न काठमाडौंबाट प्रस्थान गर्ने कार्यक्रम छ ।

यसअघि थानीले मंगलबार राष्ट्रपति रामचन्द्र पौडेलसँग भेटवार्ता गरेका थिए । राष्ट्रपति पौडेलले मंगलबार उनको सम्मानमा रात्रिभोजको आयोजना गरेका थिए ।

प्रकाशित मिति: बुधबार, वैशाख १२, २०८१ ११:०४