कर्णालीको मन्त्रिपरिषद् विस्तार आजः माओवादीले पठायो रणसिंह, अन्य मन्त्रीको अझै लागेन टुंगो

कर्णालीको मन्त्रिपरिषद् विस्तार आजः माओवादीले पठायो रणसिंह, अन्य मन्त्रीको अझै लागेन टुंगो

A+ A A-

कर्णालीमा आज मन्त्रिपरिषद् विस्तार हुँदै छ । २७ चैतमा मुख्यमन्त्री नियुक्त भएका एमाले संसदीय दलका नेता यामलाल कँडेलले सत्ता साझेदार दल नेकपा माओवादी केन्द्रसँग मन्त्रालय भागवण्डा टुङ्गिएसँगै मन्त्रिपरिषद् विस्तार गर्न लागेका हुन् ।

मन्त्रालय भागवण्डामा कुरा निमल्दा दुई सातादेखि मन्त्रिपरिषद्ले पूर्णता पाउन सकेको थिएन । बिहीबार संसदमा विश्वासको मत लिन लागेका कँडेलले आज माओवादीका एक जना मन्त्रीलाई जिम्मेवारी दिनेछन् ।

जसका लागि माओवादी संसदीय दलको बैठकले हुम्लाका रणसिंह परियारलाई सरकारमा सहभागी गराउने र मुख्यमन्त्री कँडेललाई विश्वासको मत दिने निर्णय गरिसकेको छ ।

बुधबार बिहान बसेको माओवादी संसदीय दलको बैठकले मुख्यमन्त्री कँडेलले विश्वासको मत लिनुपूर्व पार्टीका तर्फबाट बिनाविभागीय मन्त्रीका रूपमा परियारलाई पठाउने निर्णय भएको माओवादी सांसद कृष्णबहादुर जिसीले जानकारी दिए ।

परियारलाई कुन मन्त्रालयको जिम्मेवारी दिने भन्ने विषय भने टुङ्गो नलागेको उनले बताए ।

भागवण्डामा आर्थिक मामिला तथा योजना, सामाजिक विकास, उद्योग, पर्यटन, वन तथा वातावरण र जलस्रोत तथा ऊर्जा विकास मन्त्रालय पाएको माओवादीले अन्य मन्त्रीको टुङ्गो भने लगाएको छैन ।

माओवादी स्रोतका अनुसार बाँकी मन्त्रीमा महेन्द्र केसी, दुर्ग रावत, बिन्दमान बिष्ट र वीरबहादुर शाही आकाँक्षी छन् । माओवादीले सरकारमा सहभागी हुने मन्त्रीको टुङ्गो लगाउने जिम्मा संसदीय दलका नेता राजकुमार शर्मालाई दिएको छ । सोही बमोजिम शर्माले आन्तरिक रूपमा छलफल गरिरहेका माओवादी स्रोत बताउँछ ।

मुख्यमन्त्रीसहित आन्तरिक मामिला तथा कानुन, भूमि व्यवस्था, कृषि तथा सहकारी र भौतिक पूर्वाधार तथा शहरी विकास मन्त्रालय पाएको एमालेले पनि मन्त्रीको टुङ्गो लगाएको छैन ।

एमाले स्रोतका अनुसार मुख्यमन्त्री कँडेलले विश्वासको मत लिएपछि मात्रै एमालेबाट मन्त्रीहरू सरकारमा सहभागी हुनेछन् । एमालेबाट विनोद शाह, टेकराज पछाई, शेरबहादुर बुढा, दक्षिणा शाही वा गोमता विक मन्त्रीको लाइनमा देखिएका छन् ।

प्रकाशित मिति: बुधबार, वैशाख १२, २०८१ ०९:२९