कर्णालीका मुख्यमन्त्री कँडेलले बिहीबार विश्वासको मत लिने, त्यसअघि मन्त्रिपरिषद् विस्तार

कर्णालीका मुख्यमन्त्री कँडेलले बिहीबार विश्वासको मत लिने, त्यसअघि मन्त्रिपरिषद् विस्तार

A+ A A-

कर्णालीका मुख्यमन्त्री यामलाल कँडेलले बिहीबार विश्वासको मत लिने भएका छन् । कँडेलले विश्वासको मत लिने प्रयोजनको पत्र कर्णाली प्रदेशसभा सचिवालयमा पठाइसकेका छन् ।

२७ चैतमा नेकपा माओवादी केन्द्रको समर्थनमा मुख्यमन्त्री नियुक्त भएका कँडेलले २८ चैतमा शपथ ग्रहणपछि पदभार सम्हालेका थिए । कँडेलले विश्वासको मत लिनुअघि मन्त्रिपरिषद् विस्तार गर्ने तयारी गरिरहेको स्रोतको दाबी छ । एमाले उच्च स्रोतका अनुसार सत्ता साझेदार दल माओवादीसँग प्रारम्भिक मन्त्रालय भागवण्डा टुंगिएसँगै भोलि (बुधबार) मन्त्रिपरिषद् विस्तार गर्ने गरी तयारी भइरहेको छ ।

स्रोतकाअनुसार माओवादीले बुधबार मन्त्रीहरूको नाम पठाउँदै छ । विश्वासको मतअघि भने एमालेबाट कोही पनि मन्त्री बन्ने छैनन् । ‘मन्त्रालयको टुंगो लागिसक्यो, भोलि माओवादीले सरकारमा सहभागी मन्त्रीहरूको नाम पठाउनुहुन्छ,’ एमाले उच्च स्रोतले भन्छ, ‘उहाँहरूको शपथसँगै मुख्यमन्त्रीले बिहीबार विश्वासको मत लिएपछि लगत्तै मन्त्रिपरिषदले पूर्णता पाउँछ ।’

यसअघि एमालेले सामाजिक विकास मन्त्रालय दिन नसकिने अडान लिएपछि भागवण्डामा कुरा मिल्न सकेको थिएन ।मुख्यमन्त्रीले विश्वासको मत लिनुअघि माओवादीबाट मन्त्रीहरू सहभागी भएर शपथ लिने गरी तयारी भइरहेको माओवादी केन्द्र संसदीय दलका प्रमुख सचेतक रणसिंह परियारले जानकारी दिए ।

सत्तारुढ दल माओवादीले आर्थिक मामिला तथा योजना मन्त्रालय, सामाजिक विकास मन्त्रालय, उद्योग, पर्यटन वन तथा वातावरण मन्त्रालय र जलस्रोत तथा ऊर्जा विकास मन्त्रालय लिने मोटामोटी सहमति भएको छ । एमालेले भौतिक पूर्वाधार तथा शहरी विकास मन्त्रालय, आन्तरिक मामिला तथा योजना मन्त्रालय र भूमि, व्यवस्था, कृषि तथा सहकारी मन्त्रालय लिनेछ ।

मन्त्रालयको भागवण्डामा टुंगो लागे पनि माओवादीभित्र यसअघिका मन्त्रीहरू नै दोहोरिने कि नयाँ सहभागी हुने भन्ने विषयमा आन्तरिक किचलो देखिएको छ । माओवादी उच्च नेतृत्वले विन्दमान विष्टको नेतृत्वमा सरकारमा सहभागी हुन भनेपछि माओवादी संसदीय दलका नेता राजकुमार शर्मालाई नयाँ मन्त्रीहरूको नाम टुंग्याउन कठिन भएको छ ।

प्रकाशित मिति: मंगलबार, वैशाख ११, २०८१ १८:२९