पठन संस्कृतिका लागि ‘कर्णाली साहित्य महोत्सव’

A+ A A-

कर्णालीमा पठन संस्कृतिको विकास गर्न ‘कर्णाली साहित्य महोत्सव’ हुने भएको छ । कर्णालीको भाषा, साहित्य र संस्कृतिको संरक्षणका लागि मंगलबार विश्व पुस्तक दिवसका अवसरमा साहित्य महोत्सव आयोजना हुन लागेको हो ।

एघारौं शताब्दीमा कर्णालीबाट विकास भएको नेपालको पश्चिमी भू–भागको मध्यकालीन इतिहास विशाल नेपालको भाषा, साहित्य, संस्कृति र पुरातात्विक तथा मौलिक विशेषता बनेको खस सभ्यता र संस्कृतिका बारेमा पठन संस्कृतिको विकास गर्न महोत्सव आयोजना गर्न लागिएको हो ।

‘नेपाली वेशभूषा, रीतिरिवाज, भाषा र परम्पराको सामाजिक, ऐतिहासिक, सांस्कृतिक अध्ययनको निम्ति यो क्षेत्र उर्वर छ ।’ आयोजक संस्था फ्यूचर नेपालका डा नवराज केसीले भने, ‘राणा शासनको अन्त्य अघिसम्म गुमनाम रहेको यो क्षेत्रमा त्यसयता विभिन्न कालखण्डमा स्वदेशी तथा विदेशी अध्येताले केही मात्रामा अन्वेषण तथा अनुसन्धान गरेका छन्, यसरी गरिएका अध्ययनहरू पुस्तकका रूपमा छापिए पनि धेरैजसो पुस्तक पाठकको पहुँचमा छैनन् ।’

कर्णालीका बारेमा लेखिएका साहित्यिक रचना कृतिहरु र कर्णालीको इतिहासका बारेमा लेखिएका पुस्तकहरु प्रर्दशनीमा राखिने डा केसीले बताए ।

‘नेपाली भाषा, साहित्यको तिर्थस्थल कर्णालीमा लेखन तथा पठन संस्कृतिको विकास हुनु अपरिहार्य छ,’ उनले भने, ‘कर्णालीमा लेख्ने, पढ्ने संस्कृतिको विकास गर्न ‘फ्युचर नेपाल’ ले ‘कर्णाली रिडर्स सोसाइटी’ मार्फत यस क्षेत्रमा पठन संस्कृतिको प्रवद्र्धन गर्न एउटा अभियानको प्रारम्भ गर्ने प्रयास गरेका छौं ।’

कर्णालीमा किताब र ज्ञान परम्परासँग सम्बन्धित उपयुक्त अन्य कार्य गर्ने, पुस्तकलाई ज्ञानको संग्रह र महोत्सवलाई उत्सवको बिम्ब मानेर कर्णाली साहित्य महोत्सवमा ज्ञानको खोजी र समृद्धिको सम्भावना पहिल्याउन सरोकारवालाको सहभागितामा किताबसहित सामाजिक सांस्कृतिक विषयमा छलफल, लेखन, विमर्श, प्रदर्शनी आदि अभिन्न अङ्गको रुपमा समावेश गरिने डा केसीले बताए ।

प्रकाशित मिति: सोमबार, वैशाख १०, २०८१ १७:५८