कतारका राजालाई राष्ट्रपति पौडेलले विमानस्थलमै स्वागत गर्ने

A+ A A-

कतारका अमिर (राजा) शेख तमिम बिन हमाद अल थानी मंगलबार साँझ ५ः३५ मा काठमाडौं आउने भएका छन् । उनी दुई दिने राजकीय भ्रमणका लागि नेपाल आउन लागेका हुन् । कतारी अमिरको नेपाल भ्रमणलाई सफल पार्न सरकारी संयन्त्रहरू आवश्यक तयारीमा जुटेका छन् ।

कूटनीतिक सम्बन्ध स्थापना भएको ४७ वर्षपछि कतारबाट उच्चस्तरीय भ्रमण हुन लागेको हो । पहिलोपटक नेपाल भ्रमणमा आउन लागेका कतारी अमिरलाई राष्ट्रपति रामचन्द्र पौडेलले मंगलबार त्रिभुवन अन्तर्राष्ट्रिय विमानस्थलमै स्वागत गर्ने भएका छन् ।

कतारबाट पहिलोपटक उच्चस्तरीय भ्रमण हुन लागे पनि नेपालबाट भने पटक-पटक उच्चस्तरीय भ्रमण भएका छन् । सबैभन्दा पहिला प्रधानमन्त्री गिरिजाप्रसाद कोइरालाले सन् १९९८ मा कतारको भ्रमण गरेका थिए । त्यसपछि सन् २००५ मा तत्कालीन राजा ज्ञानेन्द्र शाहले कतारको भ्रमण गरेका थिए । राष्ट्रपति रामवरण यादव र राष्ट्रपति विद्यादेवी भण्डारीले पनि कतारको भ्रमण गरेका थिए ।

अमिरको भ्रमणका अवसरमा गरिने सम्झौता तथा समझदारीका लागि परराष्ट्र मन्त्रालयले तयारी गरिरहेको छ । परराष्ट्र मन्त्रालयका प्रवक्ता अमृत राईले कतारसँग गरिने सम्झौता तथा समझदारीपत्रमा हस्ताक्षरबारे तयारी भइरहेको जानकारी दिए । उनले शिलापत्रसँग भने, ‘तीन-चारवटा विषयमा सम्झौता गर्ने तयारी भएको छ ।’ उनले नेपालले खेलकुद, श्रम, आर्थिक लगानीलगायतका विषयमा कुरा राख्ने तयारी गरेको बताए ।

राष्ट्रपति रामचन्द्र पौडेलले मंगलबार बेलुका रात्रिभोजको आयोजना गर्नेछन् । बुधबार प्रधानमन्त्री पुष्पकमल दाहाल प्रचण्ड र कतारी अमिरबीच द्विपक्षीय वार्ता हुनेछ । सो वार्ताका क्रममा केही सम्झौता तथा समझदारीपत्रमा हस्ताक्षर हुन सक्ने जनाइएको छ ।