एमाले बैठक : नेताहरूले जाँड खाने र सन्तानको बिहेमा तडकभडक गर्ने काम बन्द गर्न माग

एमाले बैठक : नेताहरूले जाँड खाने र सन्तानको बिहेमा तडकभडक गर्ने काम बन्द गर्न माग

A+ A A-

नेकपा एमालेको राष्ट्रिय महाधिवेशन प्रतिनिधि परिषद् बैठकमा ६ समूहले विभिन्न प्रतिवेदनमाथिको छलफलपछि निष्कर्ष सुनाएका छन् । बैठकमा आइतबार ६ समूहमा विभाजित प्रतिनिधिहरूले प्रतिवेदनहरूमाथि छलफल गरेर निष्कर्ष सुनाएका हुन् ।

नेताहरूको आचरण, व्यवहार, कार्यशैली र संकृति ठीक नभएको समूहले निष्कर्ष निकालेको छ । समूह ५ का टोलीनेता ऋषिकेश पोखरेलले नेताहरू ४ बजेपछि जाँडरक्सीमा भुल्ने, नेता कार्यकर्ताले फोन गर्दा रेस्पोन्स नगर्ने गरेकै कारण पार्टी कमजोर बनेको, नेता र कार्यकर्तबीचको सम्बन्धमा दूरी बढेको गुनासो गरे ।

उनले भने, ‘नेताहरूलाई ४ बजेपछि भेट्नै गाह्रो, फोन गरे रेस्पोन्स नगर्ने । नेताले छोराछोरीको विवाह व्रतबन्ध गर्दा जनताको त परै जाओस्, पार्टी/मानिसले पनि एकपटक सोच्नुपर्ने अवस्था आएको छ । तडकभडक धेरै भयो । जीवनशैली जनताको जीवनस्तरसँग कहीँ कतै मिल्दैन । सुधार्नुपर्छ ।’

पोखरेलले नेताहरूको सम्पत्ति पनि छानबिन गर्नुपर्ने माग उठेको बताए । उनले भने, ‘नेताहरूको सम्पत्ति छानबिन हुनुपर्छ । सम्पत्तिको स्रोत खुलाउनुपर्छ । नैतिक प्रश्न उठेका माथि छानबिन गरेर दोषी भए कारबाही गर्नुपर्छ र व्यक्तिकेन्द्रित प्रवृत्तिको अन्त्य हुनुपर्छ ।’

एमालेको बैठकमा जनप्रतिनिधिहरूले पार्टीको घोषणापत्रअनुसार काम नगरेकाले घोषणापत्रअनुसार काम गर्नुपर्ने माग उठेको छ । पार्टीमा अराजकता बढेको, काम गर्ने र नगर्नेबीचको मूल्याङ्कन गर्ने विधि नहुँदा समस्या आएको, अबदेखि विधि बनाउनुपर्ने माग प्रतिनिधिहरूले गरेका छन् ।

समूह ४ की नेता शान्ति पाख्रिनले पार्टीको इन्चार्ज सम्बन्धित भूगोलको हुनुपर्ने माग रहेको बताइन् । नेताहरूमा ठालु हुने प्रवृत्ति भएकाले त्यसको अन्त्य हुनुपर्ने माग आफ्नो समूहको रहेको बताइन् । उनले भनिन्, ‘पार्टीका इन्चार्जहरूको व्यवहारमा परिवर्तन आउनुपर्छ । भूगोलमा जाँदा गाडी, होटलको व्यवस्था हुनुपर्छ भन्ने प्रवृत्ति बन्द हुनुपर्छ । इन्चार्जहरू मितव्ययी हुनुपर्छ । पारदर्शी हुनुपर्छ । बैठकका निर्णयहरू आफ्नोभन्दा माथिल्लो कमिटीमा बुझाउने व्यवस्था हुनुपर्छ ।’

एमालेमा नेतृत्व पङ्क्तिबाट नै गुटबन्दीको अन्त्य हुनुपर्ने

एमालेमा सबैभन्दा बढी गुटबन्दी केन्द्रमा हुने भएकाले त्यसको अन्त्य हुनुपर्ने माग जोडदार रूपमा उठेको छ । समूह २ मा नेताहरूले केन्द्रदेखि तलसम्म गुटबन्दी गर्दा, पार्टी अधिवेशनमा प्यानल बनाएर निर्वाचनमा भाग लिनाले गर्दा पार्टीमा गुटबन्दी बढेको र यसलाई हटाएर आन्तरिक प्रतिस्पर्धामा व्यक्ति निर्वाचन लड्ने व्यवस्था गर्नुपर्ने माग उठेको समूह नेता कृष्णप्रसाद जैसीले बताए ।

जैसीले भने, ‘प्यानल र गुटबन्दी नगरी निर्वाचन लड्नुपर्छ । अधिवेशनबाट नेतृत्व चयन हुँदा नेतृत्व कब्जा गर्नेभन्दा पनि पार्टीमा काम गर्ने हुनुपर्छ । नेताको खल्तीका मानिसका लागि सहमति गर्ने परिपाटी खतम हुनुपर्छ । केन्द्रबाट गुटबन्दी अन्त्य गर्नुपर्छ । पार्टीमा र जनप्रतिनिधिमा दुई कार्यकाल मात्र तोक्नुपर्छ । पदाधिकारी हुन पनि दुई कार्यकाल मात्र पाउने व्यवस्था विधानमा हुनुपर्छ ।’

पार्टीका प्रतिनिधि चयन हुँदा सम्बन्धित भूगोलबाट चयन हुनुपर्ने व्यवस्था हुनुपर्ने, एक ठाउँ काम गर्ने र प्रतिनिधि चयन हुँदा अर्को भूगोल जाने प्रवृत्ति रोकिनुपर्ने माग समूहगत छलफलमा उठेको छ । पालिकादेखि केन्द्रसम्म एक प्रतिनिधि एक अधिवेशनमा मात्र भाग लिन पाउने व्यवस्था हुनुपर्ने माग समूह ३ मा आएको नेता ठाकुर गैरेले बताए । उनले भने, ‘प्रतिनिधि चयन हुँदा तल्ला कमिटीबाट हुनुपर्ने व्यवस्था हुनुपर्छ । नैतिक आचारणलाई पनि ध्यान दिनुपर्छ ।’

एमालेको यो बैठकमा पनि एक व्यक्ति एक पदको विधानमा व्यवस्था गरेर लागू गर्नुपर्ने माग उठेको छ । समानान्तर कमिटी बनाउनेलाई पार्टीले कारबाही गर्नुपर्ने माग उठेको गैरेले बताए ।

नेतृत्व, कमिटी र जनताबीच सम्बन्ध कट्दै गएको, २०४६ देखि २०५४ सालसम्म पार्टी विधि विधान र अनुशासनमा चले पनि त्यसपछि पार्टी ठेकेदारी प्रथामा चलेको र यसलाई तुरुन्त हटाउनुपर्ने माग समूह १ को छलफलमा उठेको नेता मोहनमाया ढकालले बताइन् । उनले भनिन्, ‘पार्टी पछिल्लो समयमा ठेकेदारी प्रथामा चल्न थालेको छ । यसले जनता कट्दै गएका छन् । कार्यशैली र आचरणमा सुधार हुनुपर्छ ।’

अन्य पार्टीबाट एमालेमा ल्याउँदा नैतिक पतन नभएको, प्रगतिशील विचार भएको व्यक्ति ल्याउनुपर्ने, भोटको रूपमा मात्र पार्टीमा नल्याउन सुझाव आएको छ । ढकालले भनिन्, ‘अन्य पार्टीबाट ल्याउँदा फौजदारी अभियोग नलागेको, आधारभूत मार्क्सवादी ज्ञान भएको हुनुपर्छ ।’

एमालेमा जसलाई मन लाग्यो, त्यसलाई जिम्मेवारी दिने प्रवृत्तिले नेता कार्यकर्तामा निराशा छाएको, काम एकले गर्ने अवसर अरुले पाउने हुँदा संगठन कमजोर भएको र अबदेखि मन्त्री बनाउन होस् कि टिकट दिन होस्, पार्टी सदस्यता लिएको र कामको अनुभवको आधार मापदण्ड बनाउनुपर्ने माग उठेको छ । नेताहरूले नै विधान पालना नगरेको समूहमा छलफलका क्रममा कुरा उठेको ढकालले बताइन् । उनले भनिन्, ‘नेताहरू आफैँले विधान कति पालना गरेको छु भनेर स्वमूल्याङ्कन गर्नुपर्ने, टिकट दिँदा उपयुक्त व्यक्तिलाई दिनुपर्ने, पहिला नेताहरूबाटै विधानको पालना हुनुपर्छ ।’

यो बैठकमा प्रतिवेदनमाथि छलफल गर्न पनि छवटै समूहलाई फरकफरक विषय दिएका थिए । आफ्नो समूहमा परेका विषयमा मात्र छलफल भएका थिए । छलफल गर्दा छ समूहमा पनि ५५ वटा उपसमूह बनाएर छलफल भएको थियो ।

छलफलपछि समूह एककी मोहनमाया ढकाल, समूह २ को कृष्णप्रसाद जैसी, समूह ३ को ठाकुर गैरे, समूह ४ को शान्ति पाख्रिन, समूह ५ को ऋषिकेश पोख्रेल र समूह ६ को श्याम बस्नेतले समूहको तर्फबाट निष्कर्ष सुनाएका थिए । अस्वस्थताका कारण पार्टी अध्यक्ष केपी शर्मा ओली बैठकमा उपस्थित भएनन् । बैठक शनिबारबाट ललितपुरको गोदावरीमा सुरु भएको हो ।

प्रकाशित मिति: आइतबार, वैशाख ९, २०८१ २१:१७