एमालेको प्रतिनिधि परिषद् बैठकमा किन गएनन् भीम रावल ?

A+ A A-

ललितपुरको गोदावरीमा राखिएको एमालेको राष्ट्रिय महाधिवेशन प्रतिनिधि परिषद् बैठकमा पूर्वउपाध्यक्ष भीम रावल देखिएनन् ।

पार्टीमा लामो समयदेखि असन्तुष्ट रहँदै आएका रावलले आफूलाई नियतवश बैठकबाट वञ्चित गरिएको दाबी गरेका छन् । ‘उहाँको परिचयपत्र कार्ड नै बनाइएन । त्यो कुनै भूलचुक थिएन । नियतवश नै रोक्न खोजियो,’ रावलनिकट एकीन्द्र कुँवरले शिलापत्रसँग भने, ‘बैठकमा सहभागी हुन उहाँ आउँदै हुनुहुन्थ्यो । तर, कार्ड नै नबनेको थाहा पाएपछि बाटोबाटै फर्किनुभयो ।’

पार्टी संस्थापनले रावल अनुपस्थित रहेको जनाएको छ । प्रचार विभाग सचिव गगन बिष्टले पूर्वउपाध्यक्ष रावलको कार्ड सुरक्षित रहे पनि उनी नआएको बताए । ‘उहाँ आफैँ अनुपस्थित हुनुभएको हो । उहाँलाई रोक्न खोजिएको छैन,’ उनले भने, ‘कार्ड नबनेकै भए पनि भीम रावललाई प्रतिनिधि परिषद् बैठकमा कसैले रोक्दैन । तर, कार्ड बनेको थियो, उहाँ आफैँ नआउनुभएको हो ।’

१०औँ महाधिवेशनमा केपी ओलीसँग अध्यक्षमा पराजित भएपछि रावल कुनै पनि जिम्मेवारीमा छैनन् । सौराहा महाधिवेशनलाई सर्वसम्मत बनाउन ओलीले उनलाई उपाध्यक्षमा दोहोरिन भनेका थिए । तर, रावलले त्यो प्रस्ताव अस्वीकार गरेर ओलीसँग चुनाव लडे । एमालेमा पदाधिकारीका प्रत्यासीले पनि केन्द्रीय सदस्य चुनाव लड्नुपर्ने व्यवस्था छ । रावल केन्द्रीय सदस्य निर्वाचित भएको घोषणा गरिएको थियो । तर, उनले त्यो पद पनि स्वीकारेनन् ।

महाधिवेशनपछि सल्लाहकार परिषद् सदस्य मनोनीत गरियो । त्यो पनि अस्वीकार गरेपछि रावल पार्टी नेतृत्वसँग टाढिए । अध्यक्ष ओली र रावलको सम्बन्ध २०७९ को आमनिर्वाचनमा झन् चिसियो । गृहजिल्ला अछामबाट एकल सिफारिस भए पनि रावललाई प्रतिनिधिसभा सदस्य उम्मेदवार नबनाएपछि सार्वजनिक मञ्चमै आरोप–प्रत्यारोप चलेको थियो ।