माओवादी केन्द्र र नेकपा एससँग तत्काल एकता नगर्ने ओलीको लाइन, भन्छन्- अझै विश्वासको वातावरण बनेको छैन

माओवादी केन्द्र र नेकपा एससँग तत्काल एकता नगर्ने ओलीको लाइन, भन्छन्- अझै विश्वासको वातावरण बनेको छैन

A+ A A-

नेकपा (एमाले) र माओवादी केन्द्रसहितका प्रमुख वामपन्थी पार्टीहरू मिलेर सरकार बनाएका एमाले अध्यक्ष केपी शर्मा ओली वामपन्थी एकताको विपक्षमा उभिएका छन् । वामपन्थी एकता मात्र होइन, समाजवादी ध्रुवीकरणसमेत तत्कालका लागि उचित नभएको तर्क ओलीले गरेका छन् ।

माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डले एमालेसँगको सहकार्य वामपन्थी एकता र समाजवादी ध्रुवीकरणको आधार हो भन्ने गरिरहेका थिए । त्यही बेलामा एमाले अध्यक्ष ओलीले राजनीतिक दस्तावेजमा उक्त प्रसंग ल्याएका हुन् ।

ओलीको उक्त राजनीतिक लाइन रणनीतिक अर्थमा पनि विश्लेषण भइरहेको छ । एकीकृत समाजवादी, जसपा र नेत्रविक्रम चन्द विप्लव नेतृत्वको नेकपालाई साथमा लिएर माओवादी केन्द्रले समाजवादी मोर्चा बनाएको छ । मोर्चामा एमालेलाई पनि समेट्न प्रयास भइरहेको थियो । संयोजक विप्लवले एमाले अध्यक्ष ओलीलाई भेटेर र लिखित पत्र पठाएर नै मोर्चा जोडिन आग्रह गरेका थिए । तर, एमालेले उक्त मोर्चामा जोडिन इच्छा देखाएको थिएन ।

एमालेले औपचारिक रूपमा पहिलादेखि नै समाजवादी मोर्चाको औचित्यमा प्रश्न उठाएको थियो । तर, ओलीले राष्ट्रिय महाधिवेशन प्रतिनिधि परिषद्को बैठकमा राजनीतिक प्रतिवेदन प्रस्तुत गरेर नै वामपन्थी एकता र समाजवादी ध्रुवीकरण आवश्यक नभएको लाइन लिएका हुन् । यद्यपि, ओलीले प्रतिवेदनमा रणनीतिक भाषा पनि प्रयोग गर्ने प्रयास गरेका छन् ।

ओलीले मुलुकका गम्भीर समस्या समाधानका लागि सबै राजनीतिक दलहरूबीच संवाद र न्यूनतम समझदारी जरुरी भएको भन्दै वामपन्थी, समाजवादी वा अरू राजनीतिक ध्रुवीकरण गलत हुने लाइन लिएका छन् ।

ओलीले प्रतिवेदनमा भनेका छन्, ‘मुलुकमा जस्ता गम्भीर समस्याहरू छन्, तिनको समाधानका लागि सबै राजनीतिक पार्टीहरू माझ निरन्तर संवाद आवश्यक छ । मुख्य प्रश्नहरूमा न्यूनतम समझदारीको खाँचो छ । अनि, विचार मिल्नेहरूमाझ सहकार्य आवश्यक छ, त्यसैले यति नै बेला निश्चित दल, विचार या शक्तिलाई निषेध गर्ने गरी अगाडि बढाइने वामपन्थी एकता, समाजवादी ध्रुवीकरण वा अन्य कुनै नाममा गरिने ध्रुवीकरण उचित, व्यावहारिक र लाभदायी हुँदैन ।’

अध्यक्ष ओलीको विचारमा अहिले वामपन्थी शक्तिहरूबीच विश्वासको वातावरण बनेको छैन । उनले उक्त धारणा प्रतिवेदनमा उल्लेख गरेका छन् । त्यसो भन्नुको अर्थ माओवादी केन्द्रसँग अझै अविश्वास रहेको संकेत गरेका हुन् ।

त्यसो त, ओली प्रचण्डसँग पहिला भएको एकताबाट बढ्ता त्रसित देखिएको पनि यो राजनीतिक लाइनले देखाएको छ । त्यसैले, विगतको तितो अनुभवलाई ओलीले अहिलेको राजनीतिक लाइनमा लिएको देखिन्छ ।

माओवादी केन्द्र र एकीकृत समाजवादीलाई दबाबमा राखेर नै एमालेसँग सहकार्य गराउने रणनीतिअनुसार नै ओलीले उक्त लाइन लिएको हुन सक्ने विश्लेषण पनि भइरहेको छ । त्यसैले, ओलीले प्रतिवेदनमा अर्को छिद्र पनि राखेका छन् । उनले प्रतिवेदनमा भनेका छन्, ‘सहकार्य गहिरो हुँदै जाँदा र विश्वासको वातावरण निर्माण हुँदै जाँदा भोलि विचार मिल्नेहरू क्रमशः एकै ठाउँ हुँदै जानेछन् । त्यसो हुनु पनि पर्छ, तर आजका दिनमा भने सबै सकारात्मक शक्तिहरूलाई साथ लिएर अगाडि बढ्नु बढी महत्त्वपूर्ण छ ।’