इरानमाथि हमला गर्न इजरायलले किन रोज्यो इस्फहान ?

A+ A A-

लामो समयदेखि 'प्रोक्सी वार'मा रमाइरहेका इरान र इजरायल अब प्रत्यक्ष युद्धमा उत्रिएका छन् । इरानका अधिकांश स्थानमा युद्धका साइरन बजाइएका छन् भने एयर डिफेन्स सिस्टमलाई एक्टिभ बनाइएको छ ।

इजरायली हमलालगत्तै अब मध्यपूर्वमा युद्धको त्रासदी झनै बढेको छ । तर, इजरायलले इरानमा आक्रमण गर्न किन इस्फहान शहरलाई छान्यो ? जसले इरान–इजरायल युद्ध चर्किने खतरा बढेको छ ।

इजरायली हमलाको मुख्य केन्द्र इस्फहानको परमाणु प्लान्ट र विमानस्थलसमेत रहेको छ । यद्यपि इरानले सबै परमाणु प्लान्ट सुरक्षित रहेको जनाएको छ ।

इस्फहान शहर इरानको रणनीतिक हिसाबले असाध्यै महत्त्वपूर्ण शहर हो । जहाँ सैन्य अनुसन्धान र विकास क्षेत्रका साथै ठूलो सैन्य अड्डा यहाँ छ । जुन तेहरान र मशादपछि इरानको तेस्रो धेरै जनसंख्या भएको शहर हो । यहाँको जनसंख्या २२ लाख छ ।

यति मात्रै होइन, इस्फहान इस्लामिक रिभोल्युसनरी गार्ड कर्प्सको प्रमुख सैन्यअड्डा पनि हो । यो शहरमै इरानको सबैभन्दा ठूलो क्लाउड सिडिङ प्रोजेक्ट र केही परमाणु प्लान्ट छन् भने इरानको सबैभन्दा ठूलो युरेनियम कार्यक्रम पनि यहीँबाट अपरेट हुने गर्छ ।

इस्फहानमा इरानी सेनाको प्रमुख एयरबेस छ भने यही अमेरिकामा बनेको एफ– १४ टोमक्याट लडाकु विमान राखिएको छ, जुन इरानले सन् १९७९ को इस्लामिक क्रान्तिअघि अमेरिकाबाट लिएको थियो ।

यो लडाकु विमानको रफ्तार २४८५ किलोमिटर प्रतिघन्टा छ, जसमा रकेट, मिसाइल र बमसहित १० प्रकारका हतियार लगाउन सकिन्छ । यसलाई इरानले केही महत्त्वपूर्ण युद्धमा प्रयोग गर्दै आएको छ ।

इजरायली हमलापछि इरानले इस्फहानको सबै परमाणु प्लान्ट सुरक्षित रहेको जनाएको छ । इरानको नेसनल साइबरस्पेस सेन्टरका प्रवक्ता हुसैन दलिरियनले इजरायलका तीन ड्रोन खसालेको दाबी गरेका छन् ।

आक्रमणअघि नै इजरायलले तेहरानको परमाणु कार्यक्रमलाई निशाना बनाउन सक्ने विश्लेषण गरिएको थियो, जसका लागि इजरायलको निशानामा इस्फहान शहर पर्न सक्ने पूर्वानुमान थियो ।

इरानका अन्य परमाणु प्लान्टहरू पनि इस्फहानआसपास अरक, फोर्डोभ, नेतान्ज र बूशहरमा रहेका छन् । इजरायलको हमलालगत्तै एयर डिफेन्स सिस्टमलाई सक्रिय पारेको इरानले इजरायलमाथि जवाफी कारबाही गर्न सक्ने ठानिएको छ ।

प्रकाशित मिति: शुक्रबार, वैशाख ७, २०८१ १६:४०