एसीसी प्रिमियर कपको सेमिफाइनलमा यूएईले जित्यो टस, नेपालले पायो ब्याटिङको निम्तो

एसीसी प्रिमियर कपको सेमिफाइनलमा यूएईले जित्यो टस, नेपालले पायो ब्याटिङको निम्तो

A+ A A-

ओमानमा जारी एसीसी प्रिमियर कपअन्तर्गत पहिलो सेमिफाइनलमा यूएईले टस जितेको छ । टस जितेर फिल्डिङ रोज्दै यूएईले नेपाललाई ब्याटिङको निम्तो दिएको छ ।

कप्तान रोहित पौडेलले राम्रो स्कोर खडा गरेर डिफेन्ड गर्ने योजनामा रहेको बताए । देशमा र देशबाहिर भएका खेलहरूमा समर्थकहरूको समर्थन पाइरहेको भन्दै पौडेलले खुसी व्यक्त गरे । टस जितेको अवस्थामा आफ्नो रोजाइ पनि फिल्डिङ नै रहने पौडेलको भनाइ थियो ।

युएईका कप्तान मोहम्मद वासिमले नेपालविरुद्ध राम्रो तयारी गरेको प्रतिक्रिया दिएका छन् । उनले पिचको अवस्था हेरेर पहिले बलिङको निर्णय लिइएको बताए ।

नेपाली समयअनुसार पौने १२ बजे खेल सुरु हुनेछ । जारी प्रतियोगितामा नेपाल समूह ए को विजेता बन्दै सेमिफाइनलमा पुगेको हो । यूएईले भने समूह बीको उपविजेता हुँदै नेपालसँगको भेट पक्का गरेको हो ।

समूह चरणमा अपराजित रहँदै सेमिफाइनलमा पुगेको नेपाल प्रतियोगिताको विजेता बन्दै एसिया कपमा पुग्ने ढोका खोल्न चाहन्छ । समूह विजेता बन्ने क्रममा नेपालले मलेसिया, साउदी अरेबिया, कतार र हङकङलाई पराजित गरेको थियो ।

त्यस्तै समूह बीमा रहेको यूएईले ३ खेलमा जित र एकमा पराजय व्यहोर्दै समूह उपविजेता बनेर सेमिफाइनलको यात्रा तय गरेको हो । समूह चरणमा यूएई ओमानसँग पराजित भएको थियो भने कम्बोडिया, बहराइन र कुवेतलाई पराजित गरेको थियो ।

437121724_849544177201964_2557216987457907472_n1713505994.jpg

नेपाली प्लेइङ ११ मा कुशल भुर्तेल, आशिफ शेख, रोहित पौडेल (कप्तान), कुशल मल्ल, दीपेन्द्रसिंह ऐरी, सन्दीप जोरा, गुल्सन झा, करण केसी, सोमपाल कामी, अविनाश बोहरा, ललित राजवंश छन् ।

त्यस्तै यूएईको प्लेइङ ११ मा मोहम्मद वासिम (कप्तान), अलिसान सारफु, विष्णु सुकुमारन, आशिफ खान, सियद हैदर, बसिल अहमद, आयान अफ्जल खान, अली नसीर, मोहम्मद फारुकी, ओमिद साफी रहमान र जुनैद सिद्दिकी रहेका छन् ।

यसअघि घरेलु मैदानमा यूएईलाई पराजित गरेर उपाधि जित्दै एसिया कपमा पनि छनोट भएको थियो । त्यसबेला फाइनलमा पराजित गरेको यूएईलाई अहिले सेमिफाइनलमा पन्छाउने नेपालको लक्ष्य हुनेछ ।

त्यस्तै ओमान र हङकङबीचको अर्को सेमिफाइनल खेल आजै दिउँसो सवा ४ बजे सुरु हुनेछ । ओमान समूह बीको विजेता बन्दै सेमिफाइनलमा पुगेको हो भने हङकङले समूह ए को उपविजेता बन्दै ओमानसँगको भेट पक्का गरेको हो ।

सेमिफाइनलमा जित निकाल्ने दुई टोलीबीच फाइनल हुनेछ ।

प्रकाशित मिति: शुक्रबार, वैशाख ७, २०८१ ११:४०