भीषण वर्षाले दुबई र ओमानमा कति क्षति ?

A+ A A-

रेकर्ड स्तरको वर्षाका कारण युएई र ओमानमा ठूलो भौतिक तथा मानवीय क्षति भएको छ । वर्षाका कारण ओमानमा कम्तीमा १९ जना र युएईमा एक जना गरी २० जनाको मृत्यु भएको छ ।

भीषण वर्षापछि सडक र विमानस्थलमा समेत पानी जम्दा उडान र अवतरणमा समेत समस्या आएको थियो । ओमानको राजधानी मस्कटमा अचानक आएको बाढीले केही समय सडक उर्लिदो नदीजस्तो देखिन पुगेको थियो ।

बाढीका कारण घरहरू, व्यापारिक मलहरूमा पानी पसेको थियो भने उडान ढिलाइ वा रद्द गर्नुपरेको थियो । विशेषज्ञहरूले जलवायु परिवर्तन, भौगोलिक विषमता र क्लाउड सिडिङका कारण भीषण वर्षा हुन पुगेको बताएका छन् ।

अल अइन र इमिराती ओयसिसजस्ता ओमानको सीमा क्षेत्रका सहरमा २५४ मिलिमिटरसम्म वर्षा भएको थियो । जुन सन् १९४९ पछिकै सबैभन्दा भीषण हो । इमिरातीमा बाढीले सवारी साधन बगाउँदा एक जना ७० वर्षीय व्यक्तिको मृत्यु भएको रास अल–खैमाहको प्रहरीले जनाएको छ ।

ओमानमा मृत्यु भएका १९ जनामध्ये एक जना नाबालक र १० जना स्कुले बालबालिका छन् । उनीहरू एक वयस्क व्यक्तिसँगै एउटा गाडीमा बग्न पुगेका थिए ।

सोमबार र मंगलबारको भीषण वर्षापछि बुधबार स्थानीय अधिकारीहरू र सर्वसाधारण बाढीले बगाएर ल्याएको क्षेत्रमा सरसफाइ गरिरहेका देखिएका थिए । मंगलबार क्षतिको पूर्ण अवस्था स्पष्ट भएको थिएन ।

वर्षा कम भएको केही घन्टामै आपतकालीन कर्मचारीहरू देशभर बाढी आएका सडकहरू पुनः सुचारु गर्न खटिएका थिए । युएईमा भारी वर्षा भएमा त्यसको निकासा हुने आधारभूत संरचनाको अभावका कारण सडक डुबानमा परेका थिए । जसमा दुबईको १२ लेन राजमार्ग शेख जायद रोड पनि थियो ।

जसका कारण मानिसहरू एक किलोमिटर लामो ट्राफिक जाममा फस्न पुगेका थिए । युएईसहितका खाडी क्षेत्रमा वर्षमा केबल १–२ पटक मात्रै वर्षा हुने गर्छ ।

युएईले वर्षा बढाउन अक्सर क्लाउड सिडिङको तरिका अवलम्बन गर्दै आएको छ । अस्ट्रेलियन नेशनल युनिभर्सिटीका जलवायु वैज्ञानिक जेनेट लिंडसेका अनुसार समुद्र र वायुमण्डलीय वार्मिङका कारण वर्षा ल्याइरहेको छ ।

अरब प्रायद्वीप र ओमानको खाडीमाथिबाट जाने साउदर्न जेट स्ट्रिमबाट पनि वर्षा हुने गर्छ । यससँगै क्लाउड सिडिङको प्रभाव, समुद्रको वाष्पीकरण बढिरहँदा अधिक वर्षा हुन पुगेको उनको भनाई छ ।

प्रकाशित मिति: बिहीबार, वैशाख ६, २०८१ १६:०४