न्याय नपाएको भन्दै अस्पतालमै शव छाडेर घर फर्किए भिमाका आफन्त

A+ A A-

कर्णाली प्रदेश अस्पतालको लापरबाहीले मृत्यु भएको भनिएकी दैलेखकी भिमा गुरुङका आफन्तले न्याय नपाएको भन्दै अस्पतालमै शव छाडेर घर फर्किएका छन् ।

पाठेघर सफा गर्न पुगेकी दैलेखको आठबीस नगरपालिका–५, पिपलकोटकी २२ वर्षीया गुरूङको उपचारका क्रममा मृत्यु भएपछि आफन्तहरू अस्पतालको लापरबाही रहेको भन्दै एक सातादेखि आन्दोलित बनेका थिए । मृतक भिमाकी आठ महिने छोरी छन् ।

सामान्य पेट दुःखाइसम्बन्धी समस्या भई हिँडेर प्रदेश अस्पताल पुगेकी गुरुङको मृत्यु भएपछि उनका आफन्तले शव नबुझेर आन्दोलन गरिरहेका थिए । तर, मागको सुनुवाइ नभएपछि आफन्तले भिमाको शव अस्पतालमै छाडेर घर फर्किएका हुन् ।

आमाको मृत्यु भएपछि आफन्तहरूले आठ महिने नाबालिकाको पालनपोषणका लागि उचित राहत, परिवारका सदस्यमध्ये एक जनालाई रोजगारी, बालिकाको पठनपाठनको ग्यारेन्टी र घटनाको उच्चस्तरीय छानबिन समिति गठनको माग राखेर शान्तिपूर्ण आन्दोलन जारी राखेका थिए ।

यो पनि

कर्णालीमा प्रदेश अस्पतालको लापर्वाहीले जान्छ बिरामीको ज्यान, आरोपहरू गुपचुप

तर, शान्तिपूर्ण आन्दोलन, धर्ना र पटक–पटक वार्ता छलफल गर्दा पनि अस्पताल प्रशासनले यस विषयलाई गम्भिरतापूर्वक लिन नमानेपछि छोरीको शव नबुझेर घर फर्किएको मृतक भीमाका बुवा गोविन्दबहादुर गुरुङले जानकारी दिए ।

‘हाम्रो घरपरिवारको सदस्यको अकल्पनीय, अस्वभाविक एवम् असमयिक मृत्युका कारण पीडामा तड्पिरह्यौँ,’ गुरुङले भने, ‘गरिब परिवारका मानिस सुर्खेत जस्तो महँगो सहरमा बस्न र आन्दोलन गरिरहन नसक्ने अवस्था भएकाले मृतक भिमा गुरूङको शवलाई यहीँ प्रदेश अस्पतालमै छोडेर आफ्नो घर जान लागेको छौँ ।’

यस्तो छ घटना नालीबेली

२८ चैत्रमा भिमा पेट दुःखाइसम्बन्धी समस्या देखा परेपछि हिँडेर कर्णाली प्रदेश अस्पताल सुर्खेतमा उपचारका लागि पुगेकी थिइन् । डाक्टरले जाँच गर्दा पेटमा तीन महिनाको सालनाल रहेकाले सामान्य सफाइ गर्नुपर्ने भनेपछि अस्पताल भर्ना गरिएको थियो ।

भिमाको सल्यक्रिया गर्नुअघि २९ चैतमा डाक्टरहरूको टिमले यो केश सामान्य भएकाले चिन्ता नगर्नु भनी आफन्तलाई सम्झाइ बुझाई गरी शल्यक्रिया कक्षमा लगेको थियो । सोही दिन अपराह्न तीन बज्न १० मिनेट बाँकी रहदासम्म डाक्टरहरूले सबै ठिकै छ भनेर रगत चडाएका आफन्तहरूले बताएका छन् ।

तर, एक्कासि त्यसको केही समयमा तपाईंको बिरामीको अवस्था धेरै नै जटिल भयो भनी खबर गरिए लगत्तै उपचारमा संलग्न डाक्टरहरूले भिमाको मृत्यु भएको आफन्तलाई जानकारी गराएका थिए ।

शल्यक्रियाका क्रममा बिरामीको अवस्थाको विषयमा बीचमा कुनै जानकारी नगराइनु र डाक्टरहरूको हाऊभाऊ हेर्दा हतास मानसिकतामा देखिनुले गम्भिर त्रुटी र लापरबाही नै मृत्युको मुख्य कारण भन्दै आफन्तले विरोध जनाएका थिए ।

घटनापश्चात कर्णाली प्रदेश अस्पतालका निर्देशक डा. डम्बर खड्कासँग छलफल हुँदा भिमाको केश हजारौँमा एकाध मान्छेलाई हुने निकै जटिल र गम्भिर खालको समस्या भएकाले बचाउन नसकिएको भनी जवाफ आफन्तले पाए ।

तर, खड्काको यो भनाइ भिमाका आफन्त मान्ने पक्षमा देखिएनन् । ‘यदि यो केश निकै जटिल र गम्भिर खालको थियो भने शल्यक्रिया गर्नुभन्दा अगाडि बिरामीको श्रीमान् तथा घर परिवारको मान्छेलाई किन जानकारी गराइएन् ?’ मृतक भिमाका ससुरा धनबहादुर बलामी मगर भन्छन्, ‘अर्को कुरा त्यस्तो गम्भिर केश थियो भने स्त्री रोगसम्बन्धी सिनियर डाक्टरहरू उपचारमा किन सङ्लग्न भएनन् ?’

डाक्टरहरूको लापरबाहीका कारण आठ महिने नाबालिका दुधे छोरीलाई छोडेर भिमाले संसार त्याग्नु पर्ने अवस्था आउनुको नैतिक जिम्मेवारी प्रदेश अस्पताल प्रशासनले लिनु पर्ने दाबी उनको छ ।

प्रकाशित मिति: बिहीबार, वैशाख ६, २०८१ ०६:४३