'मंसिर ४ मा खसाएको मत गलत ठाउँमा खसाएछौँ भन्नुभएको छ, यसपटक मलाई दिनुहुन्छ'

A+ A A-

आगामी १५ वैशाखमा इलाम– २ मा हुने उपनिर्वाचनका लागि राजनीतिक दल र स्वतन्त्र रूपमा मनोनयन दर्ता गराएका २० जना उम्मेदवार घरदैलो अभियानमा छन् । उपनिर्वाचनबाट निर्वाचित हुने सांसदको कार्यकाल भने करिब साढे तीन वर्ष हुनेछ । उम्मेदवारहरू इलाम र बाहिरी जिल्लाका पनि छन् । उनै उम्मेदवारहरूलाई चुनावी एजेन्डा, मतदाताले मत दिनुपर्ने कारण, चुनाव जित्ने आधारलगायत विषयमा केन्द्रित रहेर ‘उम्मेदवारसँग पाँच प्रश्न’ शृङ्खला शिलापत्रले गरिरहेको छ । चौथो शृङ्खलामा छन्– राष्ट्रिय प्रजातन्त्र पार्टीका उम्मेदवार लक्ष्मी गुरुङ ।

०००

राजतन्त्र र हिन्दु राष्ट्र पक्षधर तपाईंलाई इलाम–२ का मतदाताले मत किन दिने ?

पार्टीको मुद्दा संवैधानिक राजसंस्था र सर्वधर्म समभावपूर्ण धार्मिक स्वतन्त्रतासहितको हिन्दु राष्ट्र हो । अर्को शब्दमा भन्दा रैथाने धर्म संस्कृति संरक्षणको मुद्दा हो । राष्ट्रिय प्रजातन्त्र पार्टीले लिएको नीति, प्रदेश खारेजी, राजसंस्थाको पुनःस्थापना र धर्म सापेक्षलगायत छन् । यसका लागि मलाई चुनावमा मत दिनुपर्छ ।

चुनाव जित्नेगरीको माहौल बनेको छ त ?

मजाले बनेको छ । विगत ३४ वर्षदेखि यस क्षेत्रका मतदाताले कि कांग्रेस कि एमालेलाई जिताएर पठाए । तर, जनआकांक्षाअनुसार उहाँहरूले काम गर्न सक्नु भएन । त्यही भएर ठूलो संख्यामा जित हासिल गर्न पर्याप्त हुने सङ्ख्यामा मानिसहरू हामीसँग जोडिने क्रम जारी छ । १५ वैशाखसम्म नतिजा हाम्रो पक्षमा हुन्छ ।

इलाम–२ मा गत निर्वाचनमा राप्रपा उम्मेदवार गणेशप्रसाद दुलालले प्राप्त गरेको मत ५१० हो । स्थानीय चुनावमा १३० मत पाएको थियो । यस्तो अवस्थामा कसरी जित्नुहुन्छ चु्नाव ?

विगतको तथ्याङ्क हेर्दा तपाईंले भनेको सही हो । तर, यो ४ मङ्सिरदेखि अहिलेसम्म आइपुुग्दा हामीले जनतासँग अन्तर्क्रिया, सभा सम्मेलन, भेटघाट गर्‍यौँ । उहाँहरूले मंसिर ४ मा खसाएको मत गलत ठाउँमा खसाएछौँ भन्नुभएको छ । यस आधारमा उहाँहरूले मत दिनुहुन्छ र चुनाव जित्ने दाबी गरेको हुँ ।

पहिचान आन्दोलन उठेको क्षेत्रमै पर्छ– इलाम २ । किराँत धर्मावलम्बीको पनि बाक्लो बसोबास भएको क्षेत्र हो । त्यहाँबाट तपाईंलाई हिन्दु राष्ट्र पुुनःस्थापना हुनुपर्छ र राजतन्त्र फर्काउने भन्दा मतदाताले मत देलान् त ?

हामीले भन्दै आएको मात्र हिन्दु राष्ट्रको कुरा होइन । रैथाने धर्म संस्कृति संरक्षणको कुरा पनि हो । यसमा बौद्ध, हिन्दु र किराँत धर्मावलम्बी सबै समेटिन्छ । हामी त के भन्छौँ भने सर्वधर्म समभाव । त्यस कारणले गर्दा हामीले उठाएको धर्मको कुरा हिन्दुु राष्ट्रको मात्रै होइन । अन्तिममा सुन्दा हिन्दुु राष्ट्रको मुद्दा सुनिए पनि अन्तर्यमा त्यस्तो होइन ।

जहाँसम्म पहिचानको कुरा छ । जो रैथाने धर्म संस्कृतिको रक्षाका लागि लडेको छ, ऊ पहिचानविरोधी हुनै सक्दैन । पहिचान भनेको रैथाने धर्म संस्कृतिकै एउटा अङ्ग हो भन्ने हाम्रो बुझाइ हो । पहिचानको सन्दर्भमा पहिचान पक्षधर र हाम्रो बुझाइमा यहीँ अन्तर छ । पहिचान पक्षधर मतदाताहरूलाई म्यानुपुलेट गरिएको छ, तर पहिचान पक्षधर साथीहरूले पनि मत दिनुहुुन्छ ।

तपाईंका चुनावी एजेन्डाहरू के–के हुन् ?

स्थानीय जनताका आवश्यकता के–के हुन् ? मेरो जानकारीमा छ । हरेक विकास निर्माणमा उहाँहरूसँगै हातेमालो गर्दै अगाडि बढ्नेछु । विगत लामो समयदेखि दुग्ध किसानहरूलाई दूूधको भुक्तानी नभएको, चियाको मूल्य नपाएको, कृषिउपजको बजार सुनिश्चित नभएको अवस्था छ । यस विषयमा नीतिगत रूपमै सम्बोधनका लागि पहल गर्ने मेरा चुनावी एजेन्डाहरू छन् ।

शृङ्खला १ : मैले कसैलाई एक झापु हानेको छैन, मान्छे पिटेर हिँडिस् भन्नु अफवाह हाे : डम्बर खड्का (अन्तर्वार्ता)

शृङ्खला २: पहिचानका लागि आन्दोलित मलाई ४१ घटकको साथ छ, जनताले जिताउँछन् : डकेन्द्रसिंह थेगिम

शृङ्खला ३: स्वतन्त्र उठ्छु भनेको थिएँ, जनताले रास्वपासँग मिल् भनेपछि रास्वपाको उम्मेदवार बनेँः मिलन लिम्बू

शृङ्खला ४ : इलाममा हामीसँग डराएर एमाले र माओवादी एक भए, मज्जाले चुनाव जित्छुः जितबहादुर राई

प्रकाशित मिति: बुधबार, वैशाख ५, २०८१ १७:४६