मैले कसैलाई एक झापु हानेको छैन, मान्छे पिटेर हिँडिस् भन्नु अफवाह हाे : डम्बर खड्का (अन्तर्वार्ता)

मैले कसैलाई एक झापु हानेको छैन, मान्छे पिटेर हिँडिस् भन्नु अफवाह हाे : डम्बर खड्का (अन्तर्वार्ता)

A+ A A-

आगामी १५ वैशाखमा इलाम– २ मा हुने उपनिर्वाचनका लागि शनिबार राजनीतिक दल र स्वतन्त्र रूपमा मनोनयन दर्ता गराएका २० जना उम्मेदवार घरदैलो अभियानमा छन् । उपनिर्वाचनबाट निर्वाचित हुने सांसदको कार्यकाल भने करिब साढे तीन वर्ष हुनेछ । उम्मेदवारहरू इलाम र बाहिरी जिल्लाका पनि छन् । उनै उम्मेदवारहरूलाई चुनावी एजेन्डा, मतदाताले मत दिनुपर्ने कारण, चुनाव जित्ने आधारलगायत विषयमा केन्द्रित रहेर ‘उम्मेदवारसँग पाँच प्रश्न’ शृङ्खला शिलापत्रले सुरु गरेको छ । पहिलो शृङ्खलामा छन्– नेपाली कांग्रेसका उम्मेदवार डम्बर खड्का ।

तपाईंलाई इलाम–२ का जनताले किन मत दिने ?

मलाई इलाम–२ का जनताले योभन्दा अगाडिको चुनावमा पनि विश्वास गरेर २९ हजार ९ सय २० मत दिनुभएको थियो । र, मलाई किन मत दिने भन्दाखेरी मलाई इलामको भूगोल थाहा छ । इलाममा हुने प्रत्येक घटनाहरू बाढी, पहिरो, भूकम्प, कोरोना महामारी होस् वा मन्दिर निर्माण, खेलमैदान निर्माण र फुटबल प्रतियोगिता नै किन नहोस्, यस्ता विभिन्न सामाजिक कार्यमा मैले सहयोग पुर्‍याएको छु ।

सहयोगको भावनाले राजनीति गरेको छु । हरेकलाई सहयोग गरेका कारण यसले भोलि चुनाव जितेर गए पनि इलामेली जनताको हितमा काम गर्छ, जनताका लागि काम गर्छ, असहाय, अशक्तलाई यसले सहयोग गर्छ भन्ने छ । त्यसैले मलाई इलामे जनताले मत दिन्छन् ।

इलाम–२ त एमालेको गढ हो । २०४८, २०५६, २०६४, २०७०, २०७४ र २०७९ सम्म एमालेले जितेको क्षेत्र । २०५१ सालमा मात्रै कांग्रेसका केबी गुरुङले जितेका हुन् । यसले गर्दा एमालेको गढ मानिएको क्षेत्रमा चुनाव जित्ने मौकालाई कसरी उपयोग गर्नुहुन्छ ?

अब २९ हजार ९ सय २० र ३० हजार ३४ मत अर्थात् १ सय १४ मतको फरक । अनि, त्यहाँ गढ भन्ने कसरी ? जम्मा १०० मतको अन्तर छ । करिब ३० हजार, २० हजार र १५ हजारको फरक भए पो ल है यो गढ हो भन्न मिल्छ । यो त हिजोको चुनावमा पनि भत्किसकेको छ । र, त्यसबेला माओवादी र नेकपा एसको पनि मत आएको हो । त्यसपछि अहिले मत आउने सम्भावना छ ।

मेरो पनि गठबन्धन छ नि, ती गरिब दुःखी, असहाय, अशक्त जसलाई मैले सहयोग पुर्‍याएको छु । उनीहरूलाई अप्ठेरोमा मैले पलपल साथ दिएको छु । त्योबाहेक यहाँको विकास निर्माण कुन ठाउँमा कसरी गर्ने ? त्यो डाँडाकाँडा, पाखापखेरो, भिरपहरा सबै मैले चिनेको छु । प्रत्येक जनताका घरघरमा म पुगेको छु । कांग्रेस होस्, एमाले होस्, माओवादी होस्, राप्रपा होस्, जोसुकै साथीहरूको घरगाउँ मलाई थाहा छ । मेरा साथीहरू छन् । त्यस कारण पनि मेरो गठबन्धन ती दुःखमा परेका साथीहरूसँग, ती विकास निर्माणको आशामा रहेका साथीहरूसँग भएका कारणले म यसपालि मजबुत अवस्थामा छु ।

तपाईंका एजेन्डाहरूचाहिँ के–के छन् ?

मेरो एजेन्डा पहिलेको चुनावमा पनि राखिसकेको छु । र, अहिले भनेको इलाम सुन्दर हुँदाहुँदै पनि विकास निर्माणले पछि परेको छ । महत्त्वपूर्ण पदमा हाम्रा आदरणीय अग्रजहरू पुगे पनि इलामले विकासको फट्को मार्न सकिरहेको छैन । त्यस कारणले अहिले इलाममा जनतालाई अप्ठ्यारो परेका विषयहरू, जस्तैः अहिले दूध बिक्री वितरण ठप्प छ, चिज भयो । छुर्पी भयो । यसको बिक्री वितरण नहुँदा किसानलाई प्रत्यक्ष मार पर्छ । यसको विषयमा मैले बोल्नुपरेको छ । यहाँको बाटोघाटोको अवस्था पनि दयनीय छ ।

लघुवित्तहरूले जनतालाई अत्यधिक दुःख दिएका छन् । यसको विषयमा पनि आवाज उठाउनुपर्नेछ । त्योदेखि बाहेक व्यापारी र उद्योगी मर्कामा छन् । किसानहरू मर्कामा छन् । यहाँका मजदुरहरू मर्कामा छन् । चियाका मजदुरहरूले समयमा तलब पाएका छैनन् । हरेक क्षेत्रमा समस्यैसमस्या छन् । यहाँका कार्यालयहरू उठेर गएका छन् । इलाम नगरपालिकाका धेरै कार्यालयहरू सारिएको छ । ती कार्यालयहरू फिर्ता ल्याउनुपर्नेछ । झलमल भएको इलाममा सटरहरू खाली छन् । यहाँका बाटोघाटोलाई विस्तार गरेर पुनः पर्यटकीय गन्तव्य बनाउनु छ ।

अर्को कुरा, पहिचानको मुद्दा अहिले उठिरहेको छ । आजभन्दा एक वर्षअगाडि म आफैँले १ नम्बर प्रदेशभरिका १४ वटै जिल्लाका सभापतिहरूलाई बोलाएर पहिचान पक्षधरले उठाएको मुद्दामा नेपाली कांग्रेसले अग्रसर भएर यसलाई समाधान गर्नुपर्छ भनेर केन्द्रीय सभापति, प्रदेशका मुख्यमन्त्रीलगायतलाई ध्यानाकर्षण गरायौँ । पार्टीमा पनि यसबारे आवाज उठायौँ । पहिचान पक्षधरहरूलाई मैले मैदानमा उत्रिएर सपोर्ट गरेको छु । त्यसैले सबै पक्षलाई समेटेर लान सक्ने परिपक्वता भएको, राजनीतिक सुझबुझ भएको र विकास निर्माणको जानकारी भएका कारणले पनि यसपालि मलाई यहाँबाट सहयोग पुग्छ र म भविष्यमा काम गर्छु । यिनै मेरा चुनावी एजेन्डाहरू हुन् ।

उसो भए तपाईंसँग चुनाव जित्ने आधार छन् ?

स्पष्टै छ ।

तर, चुनाव हारेलगत्तै घरघरमै गएर कार्यकर्तालाई कुटेको, चुनावमा दिएका पैसा फिर्ता मागेको आरोप छ तपाईंमाथि । फेरि, पार्टीमा गुट छ । यी सबै समस्यालाई हल गरेर कसरी चुनाव जित्नुहुन्छ ?

मेरा दुइटा छोरा छन् । दुइटै इञ्जिनियर छन् । एउटी बुहारी इञ्जिनियर र अर्की बुहारी चार्टर्ड एकान्टेन्ट छन् । मैले अहिलेसम्म एक झापु कुटेको छैन । यो क–कसले अफवाह फैलायो ? तपाईंहरूलाई थाहा होला । कसले भन्यो भनेर । त्यसको पछि तपाईंहरू नलाग्नुहोस् । मेरा कार्यकर्ता मसँग एक ढिक्का छन् । मबाट त्यस्तो कार्य भएको छैन । कसैले मेरो विषयमा अनर्गल प्रचार गरेको छ, त्यो प्रचारमा तपाईं नलाग्नुहोस् । मैले कसलाई पिटेँ, देखाउन सक्नुहुन्छ ? जसले जीवनमा कसैलाई एक झापु हानेको छैन, त्यसैलाई मान्छे पिटेर हिँडिस्, पैसा फिर्ता मागिस् भन्न मिल्छ ? तपाईंलाई थाहा छ ? इलाममा मैलै यो वर्ष मात्रै प्रत्येक फुटबलमा प्रथम पुरस्कार राखेको छु ।

हिजो अस्ति भएको १८ पुराणमा ५ लाख ७० हजार पैसा मैले डोनेसन गरेँ । त्यसबाहेक हरेक गरिब, दुःखी, असहाय, अशक्तलाई हस्पिटलमै गएर मैले सहयोग गर्ने गरेको छ । त्यस्तो मान्छे मलाई १०/२० हजार रुपैयाँ कसैलाई चुनावमा दिएको त्यो पनि फिर्ता माग्न जान्छु होला त ? तपाईंहरू त्यस्ता कुरामा विश्वस्त हुनुहुन्छ ? त्यस कारण यस्ता अनर्गल प्रचारको पछि नलाग्नुहोस् । डम्बर खड्का समाजसेवी हो । प्रत्येक युवालाई मेरो आवश्यकता पर्छ । प्रत्येक मन्दिर बनाउँदा आवश्यकता पर्छ । प्रत्येक फुटबल गराउँदा आवश्यकता पर्छ र प्रत्येक महामारीमा डम्बर खड्काको आवश्यकता पर्छ । कमाएको पैसा गरिब दुःखीको सेवामा मैले लगाएको छु ।

प्रकाशित मिति: आइतबार, चैत २५, २०८० १७:२२