नियुक्ति विवाद नटुंगिँदै विश्वासको मत लिने तयारीमा गण्डकीका मुख्यमन्त्री

नियुक्ति विवाद नटुंगिँदै विश्वासको मत लिने तयारीमा गण्डकीका मुख्यमन्त्री

A+ A A-

गण्डकी प्रदेशका मुख्यमन्त्री खगराज अधिकारीले अदालतले सरकार गठनबारे अन्तिम निर्णय सुनाउनुअघि नै विश्वासको मत लिने तयारी गरेका छन् ।

मुख्यमन्त्री अधिकारीले ७ वैशाखमा विश्वासको मत लिँदै छन् । उनले यसका लागि विशेष अधिवेशन आह्वान गर्न मंगलबारको मन्त्रिपरिषद् बैठकबाट प्रदेश प्रमुख डिल्लीराज भट्टलाई सिफारिस गरेका छन् ।

विश्वासको मत लिनुभन्दा ४८ घण्टाअघि सरकारले प्रदेशसभा सचिवालयमा प्रस्ताव दर्ता गराउनुपर्छ । त्यसैले प्रदेश प्रमुखले बुधबार विशेष अधिवेशन आह्वान गर्ने तयारी गरेका छन् र त्यसपछि विश्वासको मतसम्बन्धी प्रस्ताव संसदमा दर्ता हुनेछ । यसैका लागि गृहप्रदेश सुदूरपश्चिम गएका प्रदेश प्रमुख भट्ट आफ्नो भ्रमण एकदिन छोट्याएर बुधबारै फर्कंदै छन् ।

मुख्यमन्त्रीले अधिवेशन आह्वान सिफारिस गर्दै पठाएको पत्र प्रदेश प्रमुखको कार्यालयमा मंगलबार नै पुगेको छ । प्रदेश प्रमुख आएपछि त्यसबारे बल्ल निर्णय गर्ने कार्यालयको तयारी छ ।

गत २५ चैतमा एमालेका २२, माओवादी केन्द्रका सभामुखसहित ८ र एक जना स्वतन्त्र सांसदको समर्थन देखाएर अधिकारी मुख्यमन्त्री नियुक्त भएका थिए । सभामुखलाई पनि गणना गरेर बहुमत पुर्‍याएपछि कांग्रेस संसदीय दलका नेता एवं निवर्तमान मुख्यमन्त्री सुरेन्द्रराज पाण्डेले नियुक्ति बदर माग गर्दै सर्वोच्चमा २७ चैतमा रिट दायर गरेका थिए । त्यसमा २८ चैतमा अदालतले कुनै दीर्घकालीन असर पर्ने निर्णय नगर्न अन्तरिम आदेश दिएको थियो ।

अदालतले अर्को पेसी १० वैशाखलाई तोकेको छ । तर, त्योभन्दा अघि नै मुख्यमन्त्री अधिकारीले विश्वासको मत लिने तयारी गरेका हुन् । निर्णायक भूमिकामा रहेको २ सांसद भएको राप्रपा एमाले–माओवादी गठबन्धनको पक्षमा देखिएको छैन । त्यसैले मुख्यमन्त्रीलाई बहुमत पुर्‍याउन कठिन छ । बहुमत पुग्ने परिस्थिति नदेखिँदै किन मुख्यमन्त्रीले विश्वासको मत लिन लागे भन्ने अन्योल छ ।

सभामुख, उपसभामुखलाई राजीनामा गराउने पक्षमा गठबन्धन छैन । त्यसैले राप्रपाले साथ नदिएमा गठबन्धनले सभामुखको मतलाई नै निर्णायक मानेर उनलाई पनि मत विभाजनमा सहभागी गराउन सक्छ । संसदमा बहुमत देखाउने र सभामुखबारे रहेका अन्योलका विषयमा नजिर स्थापित हुने निर्णय मुख्यमन्त्री अधिकारीले अदालतबाट चाहेका छन् ।

प्रकाशित मिति: बुधबार, वैशाख ५, २०८१ १२:४८