रामदेव, बालकृष्ण र पतञ्जलीलाई सार्वजनिक माफी माग्न आदेश

A+ A A-

योग गुरुका रूपमा चर्चित व्यक्ति हुन्, बाब रामदेव । जसप्रति संसारका लाखौँ मानिसको विश्वास पाइन्छ । यही विश्वासको जगमा उनले पतञ्जली आयुर्वेद सञ्चालन गरेका छन् ।

जसले उत्पादन गरेका सामानको ठूलो खरिदकर्ता नेपाली ग्राहकसमेत छन् । तर, अहिले तिनै बाबा रामदेवमाथि भ्रमपूर्ण विज्ञापन गरी झुठको सहारामा व्यापार गरेको आरोपमा मुद्दा चलिरहेको छ ।

सर्वोच्च अदालतले मंगलबारमात्रै योगगुरु रामदेव, उनका सहयोगी बालकृष्ण र पतञ्जली आयुर्वेदलाई भ्रामक विज्ञापन गरेको आरोपमा एक साताभित्र सार्वजनिक माफी माग्न समय दिएको छ ।

सुनुवाइका क्रममा रहेका रामदेव र बालकृष्णले व्यक्तिगत रूपमा अदालतमा बिनाशर्त माफी मागे । न्यायाधीश हिमा कोहली र अहसानुद्दीन अमानुल्लाहको इजलासले बालकृष्णसँगको छलफलमा राम्रो काम गरिरहेको तर एलोप्याथीलाई तल देखाउन नपाउने बताए । रामदेवले अदालतको अनादार गर्ने आफूहरूको उद्देश्य नभएको बताए ।

अब पतञ्जलीको भ्रामक विज्ञापनको विषयमा २३ अप्रिलमा अर्को सुनुवाइ हुनेछ । अदालतले सो दिन अदालतमा उपस्थित हुन रामदेव र बालकृष्णलाई निर्देशन दिएको छ । सुनुवाइका क्रममा रामदेव र बालकृष्ण दुवैले आफ्ना उत्पादनको औषधीय प्रभावकारिताबारे गरेको विज्ञापनका लागि माफी मागेका थिए । तर, न्यायाधीशहरूले उनीहरूलाई छुट दिने कुनै संकेत गरेनन् ।

गत वर्ष २१ नोभेम्बरमा सर्वोच्च अदालतमा पतञ्जलीका तर्फबाट बहस गरेका वकिलले कुनै कानुन उल्लंघन हुने गरी भ्रामक विज्ञापन नगर्ने प्रतिबद्धता जनाएका थिए । त्यसपछि पछि उनीहरूले भ्रामक प्रचार जारी राखेका थिए ।

अदालतलाई दिएको जवाफमा रामदेवले कामको उत्साहका क्रममा बढी बोल्न पुगेको बताएका थिए । तर, न्यायाधीशले रामदेवलाई कति उत्साहित हुने भन्नेसम्म नजान्ने बच्चा नभएको जवाफ दिएका थिए ।

पतञ्जलीले कोभिडविरुद्ध समेत प्रभावकारी खोप विकास गरेको दाबी गरेको थियो । जसका कारण इन्डियन मेडिकल एशोसिएसनले २७ अगस्ट, २०२२ मा मुद्दा दायर गरेको थियो ।

जसमा पतञ्जलीले कोभिड खोप र एलोप्याथीका विरुद्ध नकारात्मक प्रचार गरेको गरेको दाबी गरिएको छ । पतञ्जलीले आयुर्वेदिक औषधिले बिरामीको उपचार गरेको झुठो दाबी पनि गरेको थियो ।

प्रकाशित मिति: मंगलबार, वैशाख ४, २०८१ १६:४९