जब दानमा आएको एउटा अण्डा सवा २ लाखमा लिलाम भयो...

A+ A A-

एउटा कुखुराको अण्डालाई नेपाली बजारमा अहिले १५ देखि २० रुपैयाँसम्म पर्छ । भारतीय बजारमा एउटा अण्डालाई ६ रुपैयाँसम्म पर्छ । तर, एउटै अण्डा सवा २ लाखमा लिलामी भयो भन्दा तपाईंलाई विश्वास नलाग्न सक्छ ।

भारतको जम्मु काश्मिरमा एक गरिब महिलाले दानमा दिएको एउटा अण्डा सवा दुई लाखमा लिलामी भएको छ । काश्मिरको उत्तरी सोपोरको मालमापनपुरा गाउँकी ती महिलाले ६ रुपैयाँमा किनेको अण्डा मस्जिद बनाउन दानमा दिएकी थिइन् । जुन ठाउँमा केही महिनादेखि मस्जिद निर्माण भइरहेको थियो ।

इदमा मस्जिद निर्माण कमिटीले स्थानीयवासीको घरमा गएर सामान दानमा लिएको थियो । स्थानीयले नगद, भाँडाकुँडा, कुखुरा र चामल दानमा दिए । तर, घरमा अरु केही नभएकी महिलाले खान ल्याएको त्यही ६ रुपैयाँको अण्डा दानमा दिइन् ।

निकै गरिब ती महिला सानो टहरोमा आफ्नो छोरासँग बस्दै आएकी थिइन् । मस्जिद निर्माण कमिटीले दानमा उठेका सबै सामान बेच्यो, तर अब अण्डा के गर्ने ? किनकि यो सामान्य ६ रुपैयाँको अण्डा थियो ।

तर, ती गरिब महिलाले जुन भावनाले मस्जिद कमिटीलाई अण्डा दान दिइन्, त्यो नै बहुमूल्य बन्यो । त्यसैले अण्डा लिलामीमा राखियो । सुरुमा नै एक व्यक्तिले १० हजार बोली लगाएपछि अण्डाको मूल्य बढ्दै गयो ।