मधेशमा मंगलबार विश्वासकाे मत परीक्षण हुँदै, कांग्रेसकाे सक्रियताले यादव थर्कमान

मधेशमा मंगलबार विश्वासकाे मत परीक्षण हुँदै, कांग्रेसकाे सक्रियताले यादव थर्कमान

A+ A A-

मधेश प्रदेशका मुख्यमन्त्री सरोजकुमार यादवले मंगलबार विश्वासको मत लिने तयारी गरेका छन् । सत्ता गठबन्धन फेरिएसँगै मधेश सरकारबाट नेपाली कांग्रेस बाहिरिएपछि मुख्यमन्त्री यादवले प्रदेशसभाबाट विश्वासको मत लिन थालेका सभामुख रामचन्द्र मण्डलले जानकारी दिए ।

मुख्यमन्त्री यादवले चौथौ पटक विश्वासको मत लिन लागेका हुन् । यसअघि जनमत पार्टीले समर्थन फिर्ता लिएपछि ६ फागुनमा मुख्यमन्त्री यादवले विश्वासको मत लिएका थिए । त्यसपछि ९ चैतमा कांग्रेसले समर्थन फिर्ता लिएपछि मुख्यमन्त्रीले फेरि विश्वासको मत लिन लागेका हुन् ।

विश्वासकाे मतबारे उनले साेमबार सरकारकाे प्रमुख घटक दल नेकपा एमालेसहित गठबन्धन दलसँग छलफल गरेका छन् । अहिले जनता समाजवादी पार्टी (जसपा) नेतृत्वको मधेश प्रदेश सरकारमा एमालेका २५, जसपाका १९, माओवादी केन्द्रका ९, लोकतान्त्रिक समाजवादी पार्टी (लोसपा)का आठ र एकीकृत नेकपा समाजवादीका सात सांसद छन् ।

यता, सत्ता गठबन्धनको केन्द्रमा देखिएको असन्तुष्टिकाे फाइदा उठाउन प्रमुख प्रतिपक्षी दल कांग्रेस लागेकाे छ । कांग्रेसले मुख्यमन्त्रीलाई विश्वासको मतमा असफल बनाउने प्रयास थालेको हाे । कांग्रेस संसदीय दलका नेता तथा पूर्वमन्त्री कृष्णप्रसाद यादवले सत्ता गठबन्धनमा असन्तुष्ट रहेका दलहरू लोसपा, नेकपा एससहितका सांसदहरूसँग छलफल गरेका छन् । अहिले प्रदेशसभामा दोस्रो ठूलो दल रहेकाे कांग्रेससँग २३ र विपक्षमै रहेकाे जनमत पार्टीसँग १३ सांसद छन् । कांग्रेसले लोसपा र नेकपा एसलाई फकाएर आफ्नो नेतृत्वमा सरकार बनाउने प्रयास गरिरहेकाे हाे ।

दुई मन्त्रालय दाबी गर्दै आएका लोसपा अहिले मुख्यमन्त्रीसँग असन्तुष्ट छ । लोसपाका एक सांसदले भने,‘ हामीलाई अहिलेसम्म मुख्यमन्त्रीले आश्वासनबाहेक केही दिनुभएन । दुईवटा मन्त्रालय दिन्छु भनेर लामो समयदेखि हामीलाई ललिपप देखाउँदै आउनुभएकाे छ । सत्ता गठबन्धनभित्र भागवण्डा गर्नुपर्ने मन्त्रालयहरू पनि मुख्यमन्त्रीले आफैँसँग राखेर ती मन्त्रालयहरूका आधाभन्दा बढी योजनाहरू आफैँ चलाइरहनुभएकाे छ । यस्तोमा कुनै पार्टीले ती मन्त्रालय पाए पनि खर्च गर्ने बजेट नै हुँदैनन् । नाम मात्रैको मन्त्री हुन्छ ।’

'आफूहरूलाई सहयोग गरेको खण्डमा दुई मन्त्रालय दिने भनेर कांग्रेसका नेताहरूले भनिरहनुभएकाे छ,' उनले अगाडि भने, ‘तर, हामी पार्टीको केन्द्रको निर्देशन पर्खिरहेका छौँ । केन्द्रले हरियो झण्डा देखाएपछि हामी जसपासँगको गठबन्धन तोडेर नयाँ गठबन्धनमा जान तयार छाैँ ।’

कांग्रेस, जनमत, लोसपा र नेकपा एस मिलेको खण्डमा यो गठबन्धनलाई ५२ मत पुग्छ । सरकार बनाउन २ मत कम रहेको अवस्थामा एक/एक मत रहेका राप्रपा, नेपाल संघीय समाजवादी र नागरिक उन्मुक्ति पार्टीलाई तान्न कांग्रेसले प्रयास गरिरहेकाे छ । तर, केन्द्रमा नेकपा एस र जसपाको एकमत रहेको अवस्थामा प्रदेशमा तत्काल जसपाकै नेतृत्वको सरकारले निरन्तरता पाउने सम्भावना छ ।

केन्द्रमा कांग्रेस नेतृत्वकाे नयाँ सत्ता गठबन्धन बनेको खण्डमा त्यसमा नेकपा एससँगै जसपा पनि सहभारी हुने स्राेतको भनाइ छ । जसपा अध्यक्ष उपेन्द्र यादव कुनै पनि हालतमा मधेश प्रदेश सरकारको नेतृत्व छोड्न चाहदैनन् । त्यसकारण उनी नेकपा एससँगै कांग्रेससहितकाे गठबन्धनको सरकारमा सहभागी भए पनि पनि मधेश प्रदेश सरकारको नेतृत्व सुरक्षित गर्ने योजनामा रहेका जसपाका एक नेताले बताए ।

यता, कांग्रेसले आफ्नो नेतृत्वमा सरकार निर्माणको लागि पहल थालेको सुइको पाएपछि मुख्यमन्त्री यादवले एक सिट मात्रै रहेका पार्टीका सांसदहरूलाई फकाउन थालेका छन् । स्राेतका अनुसार राप्रपा, नागरिक उन्मुक्ति पार्टी र नेपाल संघीय समाजवादी पार्टीका सासदहरूलाई गाडी सुविधा उपलब्ध गराउनेदेखि कोरोडाैँका योजनाहरू दिने भनेर प्रलोभन देखाइरहेका स्राेतकाे भनाइ छ ।

प्रकाशित मिति: सोमबार, वैशाख ३, २०८१ २१:२३