इरानलाई जवाफ दिने तयारीमा इजरायल, बोलायो युद्ध क्याबिनेट बैठक

तस्वीरः अल जजीरा

A+ A A-

शनिबार मध्यराति इरानले गरेको आक्रमणको जवाफ दिन इजरायली सरकारले एकपछि अर्को बैठक गरिरहेको अन्तर्राष्ट्रिय मिडियाले लेखेका छन् । हिजो राति करिब एक घण्टाको छलफलपछि आज फेरि इजरायलको युद्ध मन्त्रिपरिषद् बैठक बोलाइएको छ ।

एक अधिकारीले एनबीसी न्युजमा भनेका छन्, ‘इरानी आक्रमणको जवाफ हामी पक्कै दिनेछौँ, तर कस्तो र कहिले भनेर अन्तिम निर्णय भएको छैन ।’

सम्बन्धित समाचार

एस्टन भिल्लाकाे मैदानमा म्याचेस्टर युनाइटेडकाे सहज जित

उनका अनुसार, बैठकले ठोस निर्णय लिन सक्छ । इजरायली सरकार इरानमाथि प्रत्याक्रमण गर्ने पक्षमा छ । आइतबारको बैठकमा युद्ध क्याबिनेटका अधिकांश सदस्यले इरानलाई तत्कालै जवाफ दिनुपर्ने मत राखेका थिए ।

इरानले थप आक्रमण नगर्ने भन्दै इजरायललाई प्रत्याक्रमणको गल्ती नगर्न चेतावनी दिएको छ । इजरायलका तर्फबाट कुनै आक्रमण भए आफूले ‘निर्णायक’ आक्रमण गर्ने इरानको चेतावनी छ ।

यस विषयमा संयुक्त राष्ट्र सुरक्षा परिषद्‌को आपत्कालीन बैठकसमेत बसेको थियो । बैठकमा दुवै मुलुकले एकअर्कालाई दोषारोपण गरे ।

इजरायलको पक्षमा युरोप र पश्चिमा देशहरू एकजुट भइरहेका देखिन्छन् । अमेरिकाले इरानलाई थप आक्रमण नगर्न चेतावनी दिँदै आफू इजरायलको समर्थनमा प्रस्ट रहेको बताइसकेको छ । जर्मन चान्सलर ओलाफ स्कोल्जले इजरायलमाथि इरानी आक्रमणको निन्दा गर्दै परिस्थितिलाई गम्भीर ढंगले नबिगार्न इरानलाई चेतावनी दिएका छन् । अस्ट्रेलियाले पनि इरानले गरेको आक्रमणको निन्दा गरेको छ ।

इरानको आक्रमणले इजरायललाई शक्ति राष्ट्रसहितको गठबन्धनलाई थप बलियो पार्न सजिलो पारेको कतिपयको बुझाइ छ । तर, तनाव बढेको अवस्थामा इजरायलजस्तै इरानको पक्षमा समेत मुस्लिम मुलुक र अमेरिकाका प्रतिद्वन्द्वी देशहरू अगाडि आउँदा परिस्थिति भयानक हुन सक्ने आशंका पनि छ ।

प्रकाशित मिति: सोमबार, वैशाख ३, २०८१ १५:४२