त्रिविका पदाधिकारी नियुक्तिबारे प्रधानमन्त्रीलाई भेटेर प्राध्यापक र प्राज्ञले के भने ?

त्रिविका पदाधिकारी नियुक्तिबारे प्रधानमन्त्रीलाई भेटेर प्राध्यापक र प्राज्ञले के भने ?

A+ A A-

सोमबार बिहान प्राध्यापक तथा प्राज्ञिक व्यक्तिहरूले प्रधानमन्त्री पुष्पकमल दाहाल प्रचण्डसँग सामूहिक भेटवार्ता गरेका छन् । प्रधानमन्त्री निवास बालुवाटारमा उक्त भेटवार्ता भएको हो ।

त्यसक्रममा त्रिभुवन विश्वविद्यालयमा उपकुलपति, शिक्षाध्यक्ष र रजिष्ट्रार मेरिटोक्रेसीका आधारमा नियुक्त गरेकोमा खुसी व्यक्त गर्दै उनीहरूले प्रचण्डलाई धन्यवाद दिएको प्रधानमन्त्रीको सचिवालयले जानकारी दिएको छ । सचिवालयका अनुसार यसले विश्वविद्यालयको प्राज्ञिक छविमा सकारात्मक सन्देश गएको उनीहरूको भनाइ छ ।

प्रचण्डले आफू विश्वविद्यालय र शिक्षा क्षेत्र सुधारमा गम्भीर भएको उल्लेख गर्दे मेरिटोक्रेसीको अवधारणा थप दृढताका साथ बाँकी ठाउँहरूमा पनि अवलम्बन गरिने बताएका थिए । ‘विश्वविद्यालय सुधार्ने हो भने मेरिटोक्रेसीको कुनै विकल्प छैन भन्ने कुरा गम्भीर रूपमा सोच्दै आएको थिएँ । तर, कहाँबाट सुरू गर्ने, कसरी सुरू गर्ने भन्ने थियो,' प्रचण्डले भनेका थिए, 'त्रिभुवन विश्वविद्यालयको दीक्षान्त समारोहमा खुला प्रतिस्पर्धाको घोषणा गरेको थिएँ । त्यसपछि यसको पक्षमा वातावरण बनाउन म लगातार लागिरहेँ र सफल पनि भयौँ । यसले प्राज्ञिक क्षेत्रलाई सकारात्मक दिशा दिएको छ ।’

सुशासन, विकास र समृद्धिको जग बसाल्न सबै क्षेत्रमा स्वस्थ प्रतिस्पर्धा जरूरी रहेको प्रचण्डको भनाइ थियो । ‘पार्टीमा आबद्ध हुने स्वतन्त्रता सबैलाई छ । तर, अब कुन पार्टी भनेर नहेरौँ । जो सक्षम छ, इमानदार छ, जो निष्ठाका साथ काम गर्छ, त्यो नै आफ्नो हो । राम्रो हेरौँ, मेरिट हेरौँ । यसले मात्रै देशमा नयाँ परिस्थिति बन्छ । यसमा म पूर्ण प्रतिबद्ध छु,’ उनले भने ।

भेटमा प्राज्ञिकहरूको तर्फबाट केदारभक्त माथेमाले प्रधानमन्त्री प्रचण्डको सोच र अडानका कारण विश्वविद्यालयमा खुला प्रतिस्पर्धाबाट पदाधिकारी नियुक्ति हुनु महत्त्वपूर्ण कुरा रहेको बताएका सचिवालयले जानकारी दिएको छ ।

‘प्रधानमन्त्रीको सोच र अडानबाट खुला प्रतिस्पर्धाबाट पदाधिकारी नियुक्त भएको छ । यो आफैँमा राम्रो नजिर हो । यसले नयाँ लिगेसीको प्रारम्भ हुन्छ । यसले उच्च शिक्षाको गुणस्तरमा ठूलो सुधार ल्याउने हाम्रो विश्वास छ । यसका सकारात्मक परिणाम आउँदै जानेछन् । हामी खुसी छौँ । तपाईंलाई हार्दिक धन्यवाद छ,’ माथेमाको भनाइ उद्धृत गर्दै प्रधानमन्त्रीको सचिवालयले जानकारी दिएको छ ।

छलफलमा माथेमाले सबै राजनीतिक दलहरू एक ठाउँ बसेर भागवण्डाको संस्कारको अन्त्य र खुला प्रतिस्पर्धाका निम्ति प्रतिबद्धता व्यक्त गर्नुपर्ने बताए । शैक्षिक–प्राज्ञिक संस्थाहरूको स्वायत्ततालाई अक्षुण्ण राख्न कुनै पनि प्रकारका अस्वस्थ, अनावश्यक हस्तक्षेप नगर्ने संकल्प एवं प्रतिबद्धता राजनीतिक दलहरूको तर्फबाट आउनुपर्ने माथेमाको भनाइ थियो ।

डा. गौरीशंकरलाल दास, डा. गोविन्द पोखरेल, डा. सन्दुक रूइत, डा. अर्जुन कार्की, डा. जेपी अग्रवाल, डा. नरेशमान बज्राचार्य, डा. असीम ढकाल, डा. भगवान कोइराला, डा. विष्णु उप्रेती, डा. धर्मकान्त बास्कोटा, डा. देवेन्द्रराज पाण्डे, डा. लवदेव अवस्थी, डा. मदन उपाध्याय, डा. महेश मास्के, केदारभक्त माथेमा लगायत ६६ जना प्राज्ञिकहरूले प्रधानमन्त्रीलाई धन्यवाद दिँदै राजनीतिक दलहरूलाई हस्तक्षेप नगर्ने प्रतिबद्धता जनाउन आग्रह गरेको सचिवालयले जानकारी दिएको छ ।

प्रकाशित मिति: सोमबार, वैशाख ३, २०८१ ०९:५९