धोनीले उत्कृष्ट फिनिसिङ गरेको खेलमा चेन्नईले मुम्बईलाई २० रनले हरायो

तस्वीरः आईपीएल ।

A+ A A-

इन्डियन प्रिमियर लिग (आईपीएल) अन्तर्गत गए राति भएको खेलमा चेन्नई सुपर किङ्सले मुम्बई इन्डियन्सलाई २० रनले पराजित गरेको छ ।

सुरुवाति ब्याटिङ गरेको चेन्नईले निर्धारित २० ओभरमा ६ विकेट गुमाउँदै २०६ रनको योगफल तयार पारेको थियो । जवाफी ब्याटिङमा उत्रिएको मुम्बई ६ विकेट गुमाउँदै १८६ रनमा समेटिएपछि चेन्नईले २० रनको जित निकालेको हो ।

चेन्नईका अजिङ्क्या राहाने ५ रनमा र रचिन रविन्द्र २१ रनमा आउट भए । त्यसपछि आएका ऋतुराज गायकवाडले ६९ रनको अर्धशतकीय पारी खेलेका थिए । ड्यारी मिचेल १७ रन बनाउँदै पेभेलियन फर्किंदा शिवम दुवेले अविजित ६६ रनको अर्धशतकीय पारी खेलेका थिए ।

यसका अलावा इनिङ्सको ४ बल बाँकी रहँदा मैदानमा आएका महेन्द्रसिंह धोनीले २० रनको पारी खेल्दै उत्कृष्ट फिनिसिङ गरेका थिए ।

बलिङतर्फ मुम्बइका जेराल्ड कोट्जीले ४ ओभरमा ३५ रन खर्चिंदै १ विकेट लिए । त्यस्तै १ ओभर बलिङ गरेका श्रेयस गोपालले ९ रन दिएर १ विकेट लिए । हार्दिक पाण्ड्याले ३ ओभर बलिङ गर्दै २ विकेट लिए पनि ४३ रन खर्चिए ।

ब्याटिङतर्फ मुम्बईका रोहित शर्माले अविजित १०५ रनको शतकीय पारी खेलेका थिए । त्यस्तै इशान किसन २३ रनमा आउट हुँदा सूर्यकुमार यादव कुनै पनि रन जोड्न नसकी पेभेलियन फर्किए ।

त्यस्तै तिलक वर्माले ३१, हार्दिक पाण्ड्या २, टिम डेभिड १३ तथा रोमारियो शेफर्ड १ रनमा आउट भए । मोहम्मद नबीले नटआउट ४ रन जोडे ।

बलिङतर्फ चेन्नईका तुसार देशपाण्डेले ४ ओभरमा १ विकेट लिँदै २९ रन खर्चिए भने मुस्तफिजुर रहमानले ३ ओभर बलिङ गर्दै ५५ रन दिएर १ विकेट लिए । शार्दुल ठाकुर र रविन्द्र जडेजाले कुनै विकेट लिन सकेनन् । तर, मथिसा पाथिरानाले ४ ओभर बलिङ गर्दै २८ रन दिएर ४ विकेट लिए ।

प्रकाशित मिति: सोमबार, वैशाख ३, २०८१ ०६:२४