सुदूरपश्चिमबाट सत्ता गठबन्धनमा विभाजनको रेखा, नेकपा एसले दिन खाेजेको सन्देश के हो ?

सुदूरपश्चिमबाट सत्ता गठबन्धनमा विभाजनको रेखा, नेकपा एसले दिन खाेजेको सन्देश के हो ?

A+ A A-

सुदूरपश्चिम प्रदेशमा केन्द्रको सत्ता गठबन्धनविपरीत नेकपा एकीकृत समाजवादीले नेपाली कांग्रेससहितको गठबन्धनमा सहमति जनाएसँगै राजनीति तरंगित बनेको छ । सुदूरपश्चिमको विवादको केन्द्रमा नागरिक उन्मुक्ति पार्टी देखिए पनि नेकपा एसले लिएको मुभले केन्द्रीय सत्ता गठबन्धनमा संकटका रेखा देखिन थालेका छन् ।

सत्ता गठबन्धनको आइतबार बालुवाटारमा बसेको बैठकले सुदूरपश्चिम प्रदेश सरकारको नेतृत्व नागरिक उन्मुक्ति पार्टीलाई दिने निर्णय गरेको थियो । तर, त्यसमा गठबन्धनको नेकपा एस असन्तुष्ट थियो । यसको प्रभाव धनगढीमा सरकार बनाउने दाबी पेस गर्दा देखियो ।

धनगढीमा कांग्रेसको समर्थनमा गठबन्धनभित्रका दुई दल नेकपा एस र नाउपाले नाउपाका रेशम चाैधरीनिकट लक्ष्मणकिशोर चौधरीलाई भावी मुख्यमन्त्रीमा अगाडि सारे । र, मुख्यमन्त्रीका लागि प्रदेश प्रमुखसमक्ष दाबी पेस गरे । यसरी एकाएक सत्ता गठबन्धनको नेकपा एसले सुदूरपश्चिममा कांग्रेससहितको गठबन्धन बनाएपछि अब यसले केन्द्रमा कस्तो प्रभाव पार्छ भन्ने चासोको विषय बनेको छ ।

त्यसो त नाउपाकै अध्यक्ष रञ्जिता श्रेष्ठनिकट कैलाश चाैधरीले पनि एमाले र माओवादी केन्द्रको समर्थनमा आफूलाई मुख्यमन्त्री बनाउन भन्दै प्रदेश प्रमुखसमक्ष दाबी पेस गरेका छन् । यसरी एउटै पार्टीबाट दुई जनाको दाबी परेपछि प्रदेश प्रमुख नाजिर मियाँले दुवै पक्षसँग छलफल गरेका छन् तर निर्णय गरिसकेका छैनन् ।

उता नेकपा एसका अध्यक्ष माधवकुमार नेपाल र महासचिव घनश्याम भुसालको निर्देशनविपरीत एस संसदीय दलका नेता दीर्घ सोडारीले लक्ष्मणकिशोर चाैधरीलाई समर्थन दिएको दाबी गरिएको छ । केन्द्रको सहमतिअनुसार जान नेकपा एसका अध्यक्ष र महासचिवले प्रदेशका सांसदलाई निर्देशन दिएको नेकपा एसका प्रदेश सांसद तथा पूर्वमन्त्री नरेश शाहीले बताए । उनले भने, ‘अध्यक्ष र महासचिवले गठबन्धनमा नै बस्न निर्देशन दिनुभएको छ । प्रदेशमा नेतृत्वले समयमा नै विवाद सुल्झाउन सकेन भने केन्द्रसम्म नै विवाद बढ्न सक्छ । नेतृत्वले बुझ्नुपर्छ ।’

केन्द्रमा नयाँ गठबन्धन बनेपछि नेकपा एसले एक प्रदेशमा मुख्यमन्त्री मागेको थियो । गठबन्धनमा पनि सुदूरपश्चिम प्रदेशमा दोस्रो कार्यकाल मुख्यमन्त्री दिने सहमति भएको छ । तर, नेकपा एसका प्रदेशसभाका दलका नेता दीर्घ सोडारी पहिलोपटक नै मुख्यमन्त्री हुन चाहन्थे । उनले आफू पहिलोपटक मुख्यमन्त्री हुन नपाउने भएपछि कांग्रेससहित लक्ष्मण चौधरीलाई समर्थन जनाएर केन्द्रको गठबन्धनविरुद्ध विद्रोह गरेका छन् ।

केन्द्रमा कांग्रेसलाई बाहिर राखेर वामपन्थ फ्लेभरको गठबन्धन बनाएको एक महिनापछि सुदूरपश्चिममा भने नेकपा एस कांग्रेससहितको गठबन्धनमा सहभागी भएको छ । यसले केन्द्रमा पनि प्रभाव पार्न सक्ने नेताहरू बताउँछन् । 'सत्ता गठबन्धनको बैठकमा आफ्नो पार्टीले मुख्यमन्त्री माग्दा दिनु भएन । नाउपालाई दिने निर्णय भयो । नेकपा एसले पनि नाउपालाई नै समर्थन गरेको हो,' संसदीय दलका नेता सोडारीले भने, ‘नागरिक उन्मुक्तिलाई मुख्यमन्त्री दिने निर्णय गठबन्धनले गरेको थियो । हामीले पनि उसलाई नै समर्थन गरेका छौँ । अरु दललाई समर्थन गरेका छैनौँ । केन्द्रबाट वामपन्थीको पक्षमा लाग्न भन्ने निर्देशन आए त्यही गर्छौं ।’

अहिले प्रदेश सरकारका कारण केन्द्रमा केही पनि असर नपर्ने पनि सोडारी बताउँछन् ।

प्रदेशको मुख्यमन्त्री माग्दा नदिएपछि सोडारीले केन्द्रलाई सन्देश दिने गरी कांग्रेससहितको समर्थनमा लक्ष्मणकिशोर चौधरीलाई मुख्यमन्त्रीमा समर्थन गरेको नेकपा एसका नेताहरू बताउँछन् ।

केन्द्रमा पनि प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीसँग एसका अध्यक्ष माधवकुमार नेपाल सन्तुष्ट नरहेको बताइन्छ । स्रोतका अनुसार नेपाललाई प्रचण्ड र ओलीले प्रयोग गर्ने मात्र रणनीति लिएकाले असन्तुष्ट बनेका हुन् ।

स्रोतले भन्यो, ‘प्रदेशमा मुख्यमन्त्री दिइएन । केन्द्रमा सरकारको नेतृत्व गर्न नदिने रणनीति ओली र प्रचण्डको देखेकाले नेपाल रुष्ट बनेका छन् । कांग्रेसले पछिल्ला दिनहरूमा नेपालसँग संवाद जारी राखेको छ । तर, नेता कार्यकर्ताहरूको कम्युनिस्ट ध्रुवीकरण हुनुपर्छ भन्ने भएकाले बस्नुभएको हो ।’

गठबन्धनमा एसलाई गरेको व्यवहारले प्रदेशको राजनीति बढी तरंगित बन्न थालेको छ । एक मात्र सांसद रहेको लुम्बिनी प्रदेशमा पनि नेकपा एसले मन्त्री दाबी गरेको छ ।

कांग्रेसले पछिल्लो समयमा नेपाललाई अगाडि सारेर वैकल्पिक गठबन्धनको तयारी गरेको पनि चर्चा छ । तर, कम्युनिस्ट मिल्नुपर्छ भन्ने नेता कार्यकर्ताहरूको चाहना भएकाले नेपाल कांग्रेससँग मिल्न नसकेको एसका एक नेता बताउँछन् ।

प्रकाशित मिति: आइतबार, वैशाख २, २०८१ १८:३८