राष्ट्र परराष्ट्रः नेपालको कूटनीति र आधुनिक अर्थतन्त्र चियाउने आँखीझ्याल

राष्ट्र परराष्ट्रः नेपालको कूटनीति र आधुनिक अर्थतन्त्र चियाउने आँखीझ्याल

A+ A A-

पूर्वपरराष्ट्रमन्त्री भेषबहादुर थापाको आत्मवृत्तान्त ‘राष्ट्र–परराष्ट्रः एकतन्त्रदेखि गणतन्त्रसम्म’ले पञ्चायतको प्रादुभार्वदेखि गणतन्त्रका विकृतिसम्म बोल्छ । ‘राष्ट्र–परराष्ट्रले पञ्चायती व्यवस्थादेखि गणतन्त्रसम्म आइपुग्दासम्मका थापाका भोगे–बेहोरेका अनुभवमार्फत ती कालखण्डको शासन सत्ता प्रतिबिम्बित गर्छ ।

पुस्तकले आन्तरिक राजनीति र त्यसका खेलाडी राजा र राजनीतिक दलका नेता मात्रा होइन, बाह्य राजनीतिका खेलाडी, नेपालको कूटनीतिक क्षमता र प्रयासबारे विस्तृतमा बताउँछ । आन्तरिक प्रशासन र व्यवस्थामा काम गरे करिब २० वर्ष र कूटनीतिक क्षेत्रमा राजदूतदेखि परराष्ट्रमन्त्रीसम्म रहेर २० वर्ष काम गरेको अनुभवको सँगालोले खासमा २०१७ सालपछिको सिङ्गो इतिहास बताउँछ ।

राष्ट्र–परराष्ट्रले २०१७ सालको पञ्चायती व्यवस्थादेखि २०४६ सालको जनआन्दोलन, २०६२/६३ को दोस्रो जनआन्दोलन, संविधानसभा र नयाँ संविधान जारी भएपछिका शासन व्यवस्था तथा यो अवधिका कूटनीतिक घटनाक्रमलाई समेत सूक्ष्म उल्लेख गरेको छ । पुस्तकमा व्यक्तिगत धारणा नभई व्यावहारिक जीवनमा राष्ट्रका लागि महत्त्वपूर्ण घटना र मुद्दाहरू समेटिएका आजका भावी पुस्तालाई भविष्य निर्माण गर्न सहयोगी हुन सक्छ । पुस्तकले आधुनिक अर्थतन्त्रको जग हाल्ने प्रयासको फेहरिस्त पनि सुनाउँछ । फाइनप्रिन्टले बजारमा ल्याएको यो पुस्तक खासमा नेपालको कूटनीति र आधुनिक अर्थतन्त्र चियाउने आँखीझ्याल हो ।

थापा तत्कालीन योजना परिषद्को सदस्यसचिव, नेपाल राष्ट्र बैंकको गर्भनर, अर्थसचिव, भारत र अमेरिकाका लागि राजदूतदेखि परराष्ट्रमन्त्रीसम्म बनेका थिए । अनि, २०७२ मा नयाँ संविधान जारी भएपछि नेपाल–भारत प्रबुद्ध व्यक्तिहरूको समूह (ईपीजी) को नेपालतर्फका संयोजक पनि थिए ।

प्रकाशित मिति: सोमबार, वैशाख ३, २०८१ ०७:२६