७ दिनमा ७ लाख सके गाउँपालिकाका जनप्रतिनिधिले (कुराकानीसहित)

A+ A A-

बझाङको साइपाल गाउँपालिकाका जनप्रतिनिधिले सरकारी सुविधाको दुरुपयोग गरेका छन् । ‘कृषि भ्रमण’ शीर्षकमा छुट्याएको ७ लाख रुपैयाँ लिएर आफन्तसहित ३५ जनाको जम्बो टोलीका साथ उनीहरू मनाङ, मुस्ताङ घुम्न निस्किएका हुन् । २८ असोजमा घुम्न निस्किएको टोली ५ कात्तिक साइपाल फर्किएको थियो । टोलीमा किसानभन्दा जनप्रतिनिधि र उनीहरूका आफन्त बढी थिए जो कृषि पेसामा आवद्ध नै छैनन् ।

५ वडा रहेको गाउँपालिकाका चार जना वडा अध्यक्ष भ्रमणमा टोलीमा गएका थिए । १९ जना जनप्रतिनिधि, शिक्षक र बालबालिका गरी ३५ जना घुमघाम सकेर फर्किएका हुन् । भ्रमणमा जानेमा वडा नम्बर १ बाट ४ जना, २ र ३ बाट ६/६, ४ र ५ बाट एक/एक जना गरी १८ जनप्रतिनिधि रहेको टोलीमा केही शिक्षक पनि थिए ।

गाउँपालिकाकी उपाध्यक्ष कल्पनादेवी बोहरा, वडा नम्बर ४ का वडा अध्यक्ष, निमित्त कार्यकारी अधिकृत राधाकृष्ण जोशी, सूचना तथा सञ्चार प्रविधि अधिकृत धुर्वराज जोशी भने भ्रमणमा गएनन् । इन्जिनियर विक्रमबहादुर खड्का भने विदामा छन् । ३९ जनाको दरबन्दी रहेको गाउँपालिकामा अहिले ६ जनाले काम गर्दै आएका छन् ।

गाउँपालिका अध्यक्ष राजेन्द्रबहादुर धामी नेतृत्वको भ्रमण टोलीमा वडा नम्बर ४ बाहेक चारवटा वडाका वडाअध्यक्ष, केही सदस्य, कृषिका नाप्रास सुमनकुमार सिंह, लेखापाल कलुराम चौधरी, प्रधानमन्त्री रोजगार कार्यक्रमका अन्य कर्मचारी थिए । त्यसबाहेक वडासदस्यका छोराछोरीसमेत भ्रमणमा गएका थिए । किसानका लागि छुट्याइएको रकमले कतिपय जनप्रतिनिधिका श्रीमान्, श्रीमती नै भ्रमण गरेका छन् ।

१० असारमा सम्पन्न गाउँसभाले ७ लाख रुपैयाँको ‘कृषि भ्रमण’को प्रस्ताव अनुमोदन गरेको थियो । तर, भ्रमण टोलीमा कृषक कम, जनप्रतिनिधि र उनीहरूका आफन्त बढी देखिन्छन् । ‘केको कृषि भ्रमण हुनु ?’ वडा नम्बर २ का एक स्थानीयले भने, ‘अध्यक्ष, वडाअध्यक्ष, सदस्य, उनीहरूका छोराछोरी, शिक्षकले कहाँ खोतीपाती गरेका छन् खोइ, यो त पारिवारिक भ्रमण हो ?’

भ्रमणका लागि एउटा बस रिजर्भ गरी लगिएको छ । बसको भाडा तेलबाहेक ८० हजार रुपैयाँ तिरिएको साइपाल गाउँपालिका– १ का वडाअध्यक्ष गोपाल बोहराले बताए ।

सूचना तथा सञ्चार प्रविधि अधिकृत धुर्वराज जोशीले बसको मालिकले केही मान्छे थपेको र ती मान्छेको खर्च उसैले बेहोर्ने दाबी गरेका छन् । ‘बाहिर हल्ला भएजस्तो अनावश्यक र जो पायो त्यहीलाई लिएर भ्रमणमा गएको सत्य होइन,’ उनले भने, ‘बसको मालिकले केही बालबालिकासहित मान्छे थपेको र त्यसको खर्च उसैले बेहोर्ने हो, एक जना गाउँसभा सदस्यले चाहिँ आफ्नो छोरा लैजानुभएको छ ।’

तर, गाउँपालिका अध्यक्ष धामीले भने गाडीको सिट खाली भएकाले केही मान्छे थपिएको बताएका छन् । ‘गाडीको सिट खाली भएर ल्याएका हौं,’ उनले भने, ‘महँगो ठाउँ भएर केही रकम तलमाथि भयो होला ।’

गाउँपालिका अध्यक्ष धामीसँगकाे कुराकानी सुन्नुहाेस् ः

वडा नम्बर १ का वडाअध्यक्ष बोहराले भने शिक्षक र बाहिरी मान्छे पनि गएको स्वीकार गरेका छन् ।

गाउँवासीको आक्रोश

गाउँपालिकाका जनप्रतिनिधिले कृषकलाई दिनुपर्ने सुविधामा मनपरी गरेको भन्दै स्थानीय युवाले सामाजिक सञ्जालमा चर्को असन्तुष्टि पोखेका छन् । धेरैजसोले सामाजिक सञ्जालमा मनाङमा खिचिएको भ्रमण टोलीको फोटो फेसबुकमा राखेर ‘७ दिनमा ७ लाख स्वाहा’ भन्दै पोष्ट गरेका छन् ।

साइपाल गाउँपालिकाले कृषि भ्रमणमा कृषकहरू नलगी पार्टीका कार्यकर्ता, शिक्षक र नेताका छोराछोरीलाई भ्रमणमा लगेको काँडा माविका शिक्षक ज्ञानबहादुर बोहराले आरोप लगाए । ‘हामी कहाँ गरिब छौं, एउटा गाउँपालिकाले सात दिनमा ७ लाख सक्ने हैसियत राख्छ,’ उनले व्यंग्यात्मक शैलीमा भने ।

साइपाल गाउँपालिकाका स्थानीय दीपक बोहराले फेसबुकमा लेखेका छन्, ‘नागरिकता सिफारिशका लागि अब चैनपुर धाउनुपर्ने हुन्छ, जनप्रतिनिधहरु कार्यालय बन्द गरेर भ्रमणमा निस्केको सुनेको छु ।’

नेपाल कम्युनिस्ट पार्टी नेकपाका गाउँ कमिटी अध्यक्ष शेरबहादुर बोहराले पनि जनप्रतिनिधिले लक्षित वर्गको नाममा आएको कुनै पनि योजना तथा कार्यक्रममा मनलाग्दी गर्न नहुने बताएका छन् ।