इजरायललाई ध्वस्त पार्न सक्ने इरानका यी आठ मिसाइल

A+ A A-

सिरियास्थित इरानी वाणिज्य दूतावासनजिकै इजरायलले हमला गरी इरानी वरिष्ठ सैन्य अधिकारीहरूको हत्या गरेपछि मध्यपूर्व फेरि युद्धको चपेटामा पर्ने देखिएको छ । इजरायली हमलाको १४ दिनपछि इरानले इजरायलमाथि ३ सयभन्दा बढी मिसाइल आक्रमण गरिसकेको छ ।

इरानी हमलाविरुद्ध अमेरिकासहित पश्चिमा देश इजरायलको पक्षमा उभिएका छन् । यद्यपि इरानले आफूविरुद्ध हुने जुनसुकै आक्रमणको जवाफ दिने बताइसकेको छ । इरानले केही यस्ता मिसाइलहरू विकास गरेको छ, जसले मध्यपूर्वमा ठूलो क्षति पुर्‍याउने तागत राख्छन् ।

शहाब–३

शहाब–३ इरानको मध्यम दूरीको ब्यालेस्टिक मिसाइल हो । यो उत्तर कोरियाको नोडोंग–१ मिसाइलमा आधारित छ । यसको रेन्च १ हजारदेखि २ हजार किलोमिटरसम्म हुन्छ । यसमा कति गह्रौँ हतियार लगाएको छ भन्ने कुराले दूरी निर्धारण गर्छ ।

नयाँ मोडलमा क्लस्टर म्युनिसनको समेत अप्सन रहेकाले एकै मिसाइलले ५ स्थानमा हमला गर्न सकिन्छ । २.४ किलोमिटर प्रतिसेकेन्डको गतिमा जाने यो मिसाइल ४ सय किलोमिटरसम्मको उचाइमा जान सक्छ ।

गदर

गदर इरानको अर्को मध्यम दूरीको ब्यालेस्टिक मिसाइल हो । १८ सयदेखि दुई हजार किलोमिटरको रेन्जमा मार हान्न सक्ने यो मिसाइलको गति निकै भयानक मानिन्छ । म्याक–९ को गतिमा उडान भर्ने यो मिसाइल ११ हजार ११३.२ किलोमिटर प्रतिघन्टाको गतिमा आफ्नो निशानामा पुग्न सक्छ ।

इनर्सियल गाइडेन्स र जीपीएस नेभिगेसनका आधारमा चल्ने यो मिसाइललाई एन्टी स्याटेलाइट मिसाइल र आईआरबीएमको वर्गमा राखिन्छ । यसको सीईपी ११० मिटर छ, अर्थात् आफ्नो निशानाको ११० मिटरभित्र जहाँ खसे पनि त्यसलाई ध्वस्त बनाइदिन्छ । १५.५ मिटर लम्बाइ भएको दुई स्टेजको मिसाइलमा पहिलोमा स्टेज लिक्विड र अर्कोमा सोलिड फ्युल भएको हुन्छ ।

एमाद

एमाद मिसाइल लिक्विड–फ्युल मध्यम दूरीको ब्यालेस्टिक मिसाइल हो । यसको ब्यास १.२५ मिटर हो । यसमा एउटा मात्रै वारहेड लाग्छ भने तौल ७५० किलो हुन्छ । यसको सीईपी १० मिटर हुन्छ । निशानाभन्दा १० मिटर यतायता लागेमा ध्वस्त बनाउन सक्छ । यसको रेञ्ज १७ सय किलोमिटर छ ।

यति मात्रै होइन, यो मिसाइलमा म्यान्युभरेबल रिइन्ट्री भेइकलको विशेषता छ । अर्थात् आवश्यक पर्नेबित्तिकै यसले दिशा बदल्न सक्छ । अन्तरमहादेशीय ब्यालेस्टिक मिसाइलमा पर्ने यो हतियार इरानी सेनाले २०१६ देखि प्रयोगमा ल्याएको हो ।

फतह

फतह इरानको हाइपरसोनिक मिडियम रेन्जको मिसाइल हो । यसमा ३५० देखि ४५० किलोग्रामको वारहेड अर्थात् हतियार लगाउन सकिन्छ । १ हजार ४०० किलोटिमरसम्म मार हान्न सक्ने यो मिसाइलको गति १६ हजार ५२ किलोमिटर प्रतिघन्टा छ । यो मिसाइल पनि जुनसुकै बेला कुनै पनि दिशामा मोडिएर आक्रमण गर्न सक्छ । कुनै पनि मिसाइल राडारमा नदेखिने भएकाले दुस्मनले चाहेर पनि यसलाई निशाना बनाउन सक्दैन ।

हज कासेम

हज कासेम इरानी सेनाले २०२० देखि प्रयोग गरिरहेको मिसाइल हो । ७ टन तौल भएको यो मिसाइल ३६ फिट लामो हुन्छ । जसमा ५ सय किलोग्रामको वारहेड लगाउन सकिन्छ । यसको रेन्ज पनि १४ सय किलोमिटर छ ।

निकै खतरनाक गति भएको यो मिसाइल १४ हजार ८ सय १७ किलोमिटर प्रतिघन्टाको गतिमा निशानातिर अघि बढ्छ । त्यसैले यो मिसाइलको आक्रमणबाट बच्न निकै कठिन छ ।

खैबर सेकन

४५० टन तौल भएको खैबर सेकन मिसाइल १०.५ मिटर लामो र व्यास ८० सेन्टिमिटर छ । जसमा ५ सय किलोको वारहेड लगाउन सकिन्छ । १४५० किलोमिटर रेन्जको यो मिसाइलले कुनै पनि एयर डिफेन्स सिस्टमलाई क्षणभरमै असफल पारिदिन सक्छ । यसको गति ४ हजार ९ सय ३२ देखि ६ हजार १ सय ७४ किलोमिटर प्रतिघन्टा छ ।

पाभेह

पाभेह रणनीतिक क्रुज मिसाइल हो । यसको रेन्ज १६ सय ५० किलोमिटर छ । निकै स्मार्ट यो मिसाइलले बीच टोमै आफ्नो निशाना बदल्न पनि सक्छ । गत वर्ष मात्रै इरानले सार्वजनिक गरेको यो मिसाइलले आफ्नो मार्गमा कुनै समस्या आए तत्काल बाटो बदल्छ ।

सेजिल

सेजिल मिसाइल पनि मध्यम दूरीको ब्यालेस्टिक मिसाइल हो । २२.५ टन तौलको यो मिसाइल १८.२ मिटर लामो हुन्छ । यसमा ५ सयदेखि १५ सय किलोग्रामसम्मको वारहेड लगाउन सकिन्छ । यसको गतिले नै यसलाई सबैभन्दा खतरनाक बनाउँछ । २ हजारदेखि २५ सय किलोटिमरको रेन्जको यो मिसाइलले १७ हजार ४८७ किलोमिटर प्रतिघन्टाको गतिमा आफ्नो निशाना बनाउन सक्छ ।

यदि हाइब्रिड मोड भएको मिसाइल प्रयोग गरियो भने यसले ४५ सय किलोमिटरसम्म मार हान्न सक्छ । यसको सीईपी २० मिटर छ । अर्थात् टारगेटको २० मिटर टाढासम्म खस्दा यसले त्यो क्षेत्रलाई पूरै ध्वस्त बनाइदिन सक्छ ।

प्रकाशित मिति: आइतबार, वैशाख २, २०८१ १४:२२