८१ घण्टा ५५ मिनेट बसेको संसद बैठकको उपलब्धि तीनवटा विधेयक पारित

A+ A A-

संसदको हिउँदे अधिवेशन आइतबार राति अन्त्य हुँदै छ । २२ माघमा सुरु भएको अधिवेशन २ वैशाखसम्म जारी रह्यो । प्रतिनिधिसभाको आइतबार बसेको बैठकमा सभामुख देवराज घिमिरेले प्रस्तुत गरेको हिउँदे अधिवेशनको प्रगति विवरणअनुसार यो अवधिमा २३ दिन मात्र बैठक बसेको छ । २३ दिनका ८१ घण्टा ५५ मिनेट ससंदीय काम कारबाहीमा व्यतित भयो ।

यो अवधिमा एकपटक प्रधानमन्त्रीसँग प्रश्नोत्तर भयो भने प्रधानमन्त्री पुष्पकमल दाहाल प्रचण्डले विश्वासको मत पनि लिए । प्रतिनिधिसभाको पहिलो बैठकमा पेस भएको 'आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८०' लाई ६ फागुनको सभाको बैठकले स्वीकृत गरेको थियो । त्यसैगरी, सभाको पहिलो बैठकमा नेपाल सरकार, मन्त्रिपरिषद्को निर्णयबाट आयोगको कार्यावधि थप गर्ने गरी जारी भएको आदेश बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ को उपदफा (२) बमोजिम पेस भएका थिए ।

सभाको दोस्रो अधिवेशनबाट यस अधिवेशनमा प्राप्त दुईवटा सन्धि सम्झौताहरूमध्ये 'बिमस्टेक बडापत्र' लाई २० चैतको बैठकले अनुमोदन गरेको थियो भने 'अन्तर्राष्ट्रिय सौर्य गठबन्धन (आईएसए) को स्थापनासँग सम्बन्धित सम्झौतामाथिको सामान्य छलफल समाप्त भइसकेको छ ।

फागनु १४ को बैठकमा पेस भएको आर्थिक वर्ष २०८१/०८२ का लागि विनियोजन विधेयकका सिद्धान्त र प्राथमिकता सम्बन्धमा (कर प्रस्तावबाहेक) माथि चैत १, ५, ६ र ७ को सभाका बैठकहरूमा छलफल गरिएको थियो ।

सभाको यस अधिवेशनमा प्रतिनिधिसभामा पाँचवटा सरकारी विधेयक दर्ता भएका थिए, जसमध्ये 'निर्माणमुखी सामग्री (व्यवस्थापन तथा नियमन) विधेयक, २०८०' समितिमा विचाराधीन छ । 'संघीय निजामती सेवा विधेयक, २०८०' माथिको सामान्य छलफल समाप्त भएको छ भने 'राजनीतिक दलसम्बन्धी (दोस्रो संशोधन) विधेयक, २०८०' र 'बैंक तथा वित्तीय संस्थासम्बन्धी (पहिलो संशोधन विधेयक, २०८०' सभामा प्रस्तुत भएका छन् ।

'आर्थिक कार्यविधि तथा वित्तीय उत्तरदायित्व (पहिलो संशोधन विधेयक, २०८०' दर्ता मात्रको स्थितिमा छ । साथै, सभामा उत्पत्ति भएको 'सम्पत्ति शुद्धीकरण (मनी लाउन्डरिङ) निवारण तथा व्यावसायिक वातावरण प्रवर्द्धनसम्बन्धी केही ऐनलाई संशोधन गर्ने विधेयक'माथि राष्ट्रियसभाबाट गरिएको संशोधनलाई यस सभाले स्वीकार गरी पारित गरेको छ ।

त्यसैगरी, यस अधिवेशनमा राष्ट्रियसभामा उत्पत्ति भएको तीनवटा सरकारी र एउटा गैरसरकारी विधेयक प्रतिनिधिसभामा प्राप्त भएका थिए, जसमध्ये 'विद्युतीय व्यापार विधेयक, २०८०' माथिको सामान्य छलफल समाप्त भएको छ भने बाँकी तीनवटा विधेयक सभामा प्रस्तुत भइसकेको छ ।

त्यस्तै, सभाको पहिलो र दोस्रो अधिवेशनमा राष्ट्रियसभाबाट प्राप्त आठवटा विधेयकमध्ये 'अनुगमन तथा मूल्याङकन विधेयक, २०७६' र 'खाद्य स्वच्छता तथा गुणस्तर विधेयक, २०७७' सभाबाट पारित भएका छन् । बाँकी छवटा विधेयक सम्बन्धित समितिमा विचाराधीन छन् । यो अधिवेशनमा तीनवटा मात्र विधेयक पारित भएका छन् ।

प्रकाशित मिति: आइतबार, वैशाख २, २०८१ १३:१८