संसद अधिवेशन अन्त्यबारे कांग्रेसले भन्याे- सरकार संसदबाट भाग्याे

A+ A A-

प्रमुख प्रतिपक्षी दल नेपाली कांग्रेसले जनसरोकारको विषयमा बेवास्ता गर्दै सरकार संसदबाट भागेकाे निष्कर्ष निकालेकाे छ । आइतबार बिहान संसद भवनको ल्होत्से हलमा बसेको कांग्रेस संसदीय दल कार्यसमिति र संसदीय दलको बैठकले सो निष्कर्ष निकालेको प्रमुख सचेतक रमेश लेखकले बताए ।

‘सरकारले सदनमा बहुसंख्यक सदस्यहरूले उठाएको विषयबारे गम्भीर, सार्थक गरी निष्कर्षमा पुग्नुपर्नेमा जनताको सरोकारको विषयमा बेवास्ता गर्दै संसदबाट भाग्ने काम गरेको छ,’ बैठकपछि लेखकले भने ।

सरकारले बजेट अधिवेशनका लागि पर्याप्त समय हुँदाहुँदै अप्रत्यासित र असामयिक रूपले संघीय संसदको चालु अधिवेशन अन्त्यको सिफारिस गरेको कांग्रेसले जनाएको छ । यसतर्फ कांग्रेसको गम्भीर ध्यानाकर्षण भएको प्रमुख सचेतक लेखकले बताए ।

उनले संघीय संसदमा सबै विपक्षी दलहरुले आम नागरिकसँग प्रत्यक्ष सरोकार भएको सहकारीमा बचत भएको रकम हिनामिना, अपचलन, दुरुपयोग र ठगी भएको विषय उठाउँदै आए पनि सरकारले बेवास्ता गरेको बताए । उनले सरकारमा रहेका बहालवाला मन्त्रीसमेत संलग्न रहेको हुँदा स्वतन्त्र, निष्पक्ष र विश्वसनीय छानबिनको सुनिश्चितताका निम्ति संसदीय छानबिन समिति गठन गर्नुपर्ने विषयमा सरकारलाई विपक्षीको मागप्रति गम्भीर हुन सत्तापक्षकै सांसदहरुले आग्रह गरे पनि सरकारले बेवास्ता गरेको टिप्पणी गरे ।

प्रमुख सचेतक लेखकले सरकार संसदप्रति उत्तरदायी हुनुपर्ने, जवाफदेही ढंगले प्रस्तुत हुनुपर्ने, संसदीय मूल्यमान्यताका बर्खिलाप संसदीय अभ्यासमा आघात गर्ने र प्रकारान्तरले संसदीय व्यवस्थालाई कमजोर बनाउने हर्कत गरेको बताए । उनले प्रतिपक्षको अवरोधका कारण संसद चल्न नसकेको भनी सत्तापक्षबाट हुने गरेका तर्क हाँस्यास्पद र लज्जास्पद भएको टिप्पणी गरे ।

उनले नेपाली कांग्रेसले एक महिनादेखि सहकारी ठगीमा सरकारका उपप्रधान एवं गृहमन्त्रीको संलग्नताको विषय तथ्य र प्रमाणसहित उठाउँदै आएको तर संसदका कुनै पनि काम कारबाही अवरोध नगरेको जिकिर गरे । उनले सरकारको अपरिपक्वता, गैरजिम्मेवारी र तानाशाही प्रवृत्तिका कारण दुई दिन संसद अवरोध भएको र त्यसको जिम्मेवारी सरकारले लिनुपर्ने बताए ।

प्रमुख सचेतक लेखकले नेपाली कांग्रेस संसदीय दलको बैठकले जनताका प्रत्यक्ष सरोकारका विषयमा गैरजिम्मेवार हुँदै संघीय संसदको चालु अधिवेशन अन्त्य गर्ने सरकारको निर्णयको घोर भर्त्सना र निन्दा गर्ने निर्णय गरेको जानकारी दिए । उनले नेपाली कांग्रेससहित विपक्षी दलहरुले उठाउँदै आएको जनताले सहकारीमा जम्मा गरेको अर्बौं रकम हिनामिना ठगी भएको र उक्त जनबिरोधी अपराधजन्य कार्यमा स्वयम् सरकारका मन्त्री संलग्न रहेको विषय घाम जस्तै छर्लङ्ग भइसकेको भन्दै सरकार उक्त विषयमा तथ्यपरक रूपले छलफल संवाद नगरी जनताका सवालमा गैरजिम्मेवार हुँदै संसदको अधिवेशन अन्त्य गरी भागेको घटनाले यस विषयलाई थप पुष्टि गरेको दाबी गरे ।

गत शुक्रबार बसेको मन्त्रिपरिषद् बैठकले आइतबार मध्यराति १२ बजेदेखि संसदको चालु अधिवेशन अन्त्य गर्न राष्ट्रपति समक्ष सिफारिस गरेको थियो ।

कांग्रेसले सहकारी संस्थाको रकम हिनामिना प्रकरणमा मुछिएका उपप्रधानमन्त्री एवं गृहमन्त्री रवि लामिछानेमाथि संसदीय छानबिन समिति गठनको माग गर्दै आएको छ । यही विषयमा सरकार र प्रतिपक्षी संसदमा आमनेसामने भएका थिए । कांग्रेसले संसदीय छानबिन समिति गठनकाे मागलाई लिएर संसद अवराेध गर्दै आएकाे थियाे । कांग्रेसले पछिल्लाे समयमा अन्य प्रतिपक्षी दलबाट पनि यस मागमा साथ पाएकाे थियाे ।

प्रकाशित मिति: आइतबार, वैशाख २, २०८१ ११:३४