सुदूरपश्चिममा सरकार गठनको समय आज सकिँदै, मुख्यमन्त्री पाउँदा पनि नाउपामा लफडा

सुदूरपश्चिममा सरकार गठनको समय आज सकिँदै, मुख्यमन्त्री पाउँदा पनि नाउपामा लफडा

A+ A A-

सुदूरपश्चिम प्रदेशमा सरकार गठनका लागि प्रदेश प्रमुख नजिर मियाँले दिएको समयसीमा आज सकिँदै छ । मियाँले आज साँझ ५ बजेसम्म सरकार गठनका लागि दाबी पेस गर्न समय दिएका थिए ।

प्रदेश प्रमुख मियाँले संविधानको धारा १६८ को उपधारा २ बमोजिम बहुमतसहित सरकारको दाबी पेस गर्न दिएको समय घर्किन लाग्दा पनि मुख्यमन्त्रीमा दाबी गर्ने तयारीमा रहेको नागरिक उन्मुक्ति पार्टीको विवाद मिलेको छैन । बरु, झन् चर्कंदै गएको छ ।

सुदूरपश्चिम सरकारको नेतृत्व नाउपालाई दिन नेकपा एमाले र माओवादी केन्द्रलगायत सत्ता गठबन्धनका दलहरू सहमत भएका छन् । तर, अन्तरिक किचलोका कारण अन्य दल मुख्यमन्त्री दिन तयार हुँदा पनि नाउपाले मुख्यमन्त्री कसलाई बनाउने भन्ने तय गर्न सकेको छैन ।

नाउपाका संरक्षक रेशमलाल चौधरी र उनकी श्रीमतीसमेत रहेकी रञ्जिता श्रेष्ठ चौधरीको 'घर झगडा' उत्कर्षमा पुग्दा प्रदेशसभामा रहेका नाउपाका सांसदहरू दुईतर्फ विभाजित बनेका छन्, जसका कारण रेशम र रञ्जिताले फरक-फरक सांसदलाई मुख्यमन्त्रीको उम्मेदवार बनाएका छन् ।

रेशम पक्षले बहुमत सांसद आफ्नो पक्षमा रहेको भन्दै लक्ष्मण किशोर चौधरीलाई मुख्यमन्त्री बनाउन खोजेको छ । तर, रञ्जिता भने कैलाश चौधरीलाई मुख्यमन्त्री बनाउने तयारीमा छिन् ।

सुदूरपश्चिममा नाउपाका ७ सांसदमध्ये दुई जना कारबाहीमा परेका छन् । रेशमनिकट समानुपातिक सांसद इन्दिरा गिरी र दल नेता घनश्याम चौधरीलाई रञ्जिताले कारबाही गरेकी छन् । इन्दिरालाई सांसद पदबाट बर्खास्त गरिएको छ । घनश्यामका विषयमा भने प्रदेशसभाले निर्णय गरिसकेको छैन ।

त्यसअघि घनश्यामलाई नाउपा सुदूरपश्चिम संसदीय दलको नेताबाट हटाएर उनको स्थानमा रञ्जिताले आफूनिकट कैलाश चौधरीलाई ल्याइसकेकी छन् । रञ्जिता समूहमा दुई सांसद मात्र छन् ।

सुदूरपश्चिम प्रदेशमा अहिले प्रदेशसभा सदस्यको संख्या ५१ रहेको छ । कांग्रेसका पृथ्वीबहादुर सिंहको दुर्घटनामा मृत्यु भएको थियो भने नाउपाकी इन्दिरा गिरी पदमुक्त भएकी छन् ।

प्रदेश सभामा हाल माओवादी केन्द्रका सभामुखसहित ११, नेकपा एमालेका १०, नागरिक उन्मुक्तिका ६ र नेकपा एकीकृत समाजवादीका चार सांसद छन् । नेपाली कांग्रेसका १८, राप्रपा र स्वतन्त्र सांसद एक/एक जना छन् ।

प्रकाशित मिति: आइतबार, वैशाख २, २०८१ ०९:३६