प्रतिनिधिसभाको चालु अधिवेशनको अन्तिम बैठक आज, यस्तो छ कार्यसूची

A+ A A-

आज प्रतिनिधिसभाको चालु अधिवेशनको बैठक बस्दै छ । आज बिहान ११ बजे बस्ने गरी प्रतिनिधिसभाको बैठक बोलाइएको हो ।

आज राति १२ बजेदेखि संसदको चालु अधिवेशन अन्त्य हुँदै छ । शुक्रबार बसेको मन्त्रिपरिषद् बैठकले चालु अधिवेशन अन्त्यका लागि राष्ट्रपति रामचन्द्र पौडेलसँग सिफारिस गर्ने निर्णय गरिसकेकाले आजको बैठक चालु अधिवेशनको अन्तिम बैठक हो ।

आजको बैठकमा सभामुख देवराज घिमिरेले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको व्यहोरा पढेर सुनाउने छन् । त्यस्तै चालु अधिवेशनमा विभिन्न मन्त्रालयबाट उत्तर प्राप्त भएका सबै मौखिक तथा लिखित प्रश्न उर उत्तरहरू सम्बन्धित मन्त्रीहरूबाट टेबुल गरिने सम्भावित कार्यसूची छ ।

त्यस्तै शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले सुरक्षण मुद्रणसम्बन्धी विधेयक सम्बन्धी समितिको प्रतिवेदन पेस गर्नेछन् ।

प्रधानमन्त्री पुष्पकमल दाहाल 'प्रचण्ड' ले राष्ट्रिय प्राकृतिक स्रोत तथा वित्त आयोगको पाँचौँ वार्षिक प्रतिवेदन २०८० पेस गर्नेछन् ।

त्यस्तै शिक्षामन्त्री सुमना श्रेष्ठले राष्ट्रियसभामा उत्पत्ति भएको शहीद दशरथ चन्द स्वास्थ्य विज्ञान प्रतिष्ठान विश्वविद्यालय विधेयक २०८० माथि विचार गरियोस् भन्ने प्रस्ताव गर्नेछिन् । संघीय मामिला तथा सामान्य प्रशासनमन्त्री भानुभक्त जोशीले संघीय निजामति सेवा विधेयक २०८०लाई दफावार छलफलका लागि सम्बन्धित समितिमा पठाइयोस् भन्ने प्रस्ताव गर्नेछन् ।

त्यस्तै उद्योग वाणिज्य तथा आपूर्तिमन्त्री दामोदर भण्डारीले राष्ट्रियसभामा उत्पत्ति भएको विद्युतीय व्यापार विधेयक २०८० लाई दफावार छलफलका लागि सम्बन्धित समितिमा पठाइयोस् भन्ने प्रस्ताव राख्नेछन् ।

त्यस्तै सभामुख घिमिरेले १० वा सोभन्दा बढी बेठकमा अनुपस्थित भएका सांसदहरूको अनुपस्थितिको सूचना सभामा स्वीकृतिका लागि पेस गर्नेछन् ।

प्रकाशित मिति: आइतबार, वैशाख २, २०८१ ०७:२६