मानव तस्करी मुद्दापछि ‘कमब्याक’ हुन जोखाना हेरिरहेका बालकृष्ण खाँण

A+ A A-

२७ वैशाखमा सनसनीपूर्ण खबर सार्वजनिक भयो- कांग्रेस नेता तथा पूर्वगृहमन्त्री बालकृष्ण खाँण पक्राउ । प्रभावशाली नेता पक्राउ पर्नु आफैँमा ‘बिग न्युज’ थियो । उनलाई नक्कली भुटानी शरणार्थी प्रकरणमा पक्राउ गरिएको थियो । काठमाडौंको चाबहिलस्थित निवासबाट नियन्त्रणमा लिँदा प्रहरी र उनीबीच घम्साघम्सी नै परेको थियो ।

त्यसअघि नेपाली नागरिकलाई भुटानी शरणार्थी बनाएर अमेरिका पठाएको आरोपमा १० जना पक्राउ परिसकेका थिए । उपराष्ट्रपति कार्यालयका सचिव टेकनारायण पाण्डेसँग जोडिएपछि पूर्वगृहमन्त्री खाँण अनुसन्धानको घेरामा तानिएका थिए । पाण्डेको मोबाइलबाट समेत खाँण यो प्रकरणमा प्रत्यक्ष जोडिएको ‘क्लु’ भेटिएको थियो । ह्वाट्सएपमार्फत गिरोहका बिचौलियासँग कुराकानी गर्दा पाण्डेले मन्त्री खाँणको नाम बारम्बार लिएको भेटिएको थियो ।

८७५ जनालाई नक्कली भुटानी शरणार्थी बनाएर अमेरिका उडाउने गरी सरकारी कागजातमा नाम थपेको अनुसन्धानबाट खुलेको थियो । गृह मन्त्रालयले जेठ २०७६ मा सहसचिव बालकृष्ण पन्थीको नेतृत्वमा भुटानी शरणार्थीसम्बन्धी स्थायी समाधान पहिल्याउने भन्दै कार्यदल बनाएको थियो ।

१ असार २०८० मा अर्को खबर आयो– खाँण पुर्पक्षका लागि जेल चलान भएको । सरकारी वकिलको जवाफी बहस सकिएपछि जिल्ला अदालतले पूर्वगृहमन्त्री बालकृष्ण खाँण र पूर्वउपप्रधानमन्त्री टोपबहादुर रायमाझीसहित १६ जनालाई पुर्पक्षका लागि थुनामा पठाउने आदेश दिएको थियो ।

संगठित अपराध, किर्ते, ठगी तथा राज्यविरुद्धको आरोप गरी चारवटा मुद्दा लगाउँदै २७ करोड ५० लाख रुपैयाँ बिगो माग दाबीसहित जिल्ला अदालत काठमाडौंमा गत जेठ १० गते ३० जनाविरुद्ध मुद्दा दायर गरिएको थियो ।

२९ मंसिरमा खाँण थुनामुक्त भए । पक्राउ परेको सात महिनापछि जिल्ला अदालत काठमाडौंमा ३० लाख र सम्पत्ति शुद्धीकरण विभागमा १५ लाख धरौटी बुझाएर रिहा भएका थिए । उच्च अदालत पाटनले ३० लाख धरौटीमा छाड्न आदेश दिएको थियो ।

उनी जेलमा हुँदा पार्टीका इतर समूहका नेता डा. शेखर कोइराला पटकपटक भेट्न पुगेका थिए । सभापति शेरबहादुर देउवा भने जेलमा नपुगे पनि खाँणलाई छुटाउनैपर्छ भनेर सार्वजनिक कार्यक्रममा समेत देखा पर्न इन्कार गर्थे । देउवालाई डर थियो– खाँणका बारेमा प्रश्न सोधे उत्तर के दिने ? खाँण छुटेर बाहिर आइसके पनि देउवा बोल्न डराइरहे । आफूलाई भेट्न पुगेको बेला देउवाले भने, ‘अहिले बाहिर बोल्ने बेला भएको छैन ।’

उनको पक्षमा रहेका सांसद र केन्द्रीय सदस्य कता लाग्लान् ? खाँणले के गर्लान् भन्ने चासो थियो । अदालतमा मुद्दा विचाराधीन भएकाले उनले पनि राजनीतिमा सक्रिय हुन चासो देखाएनन् । नेविसंघ र तरुण दलको अध्यक्ष हुने दुर्लभ अवसर पाएका खाँणलाई पार्टीको भावी सभापतिको दाबेदारको रूपमा हेरिएको थियो । उनले आधा दर्जन सांसद र करिब दुई दर्जन केन्द्रीय सदस्यहरूलाई एक राख्न प्रयास गरिरहेका छन् ।

राणनीतिक कदम चाल्न व्यस्त खाँण पछिल्लो समय इतर समूहसँग नजिक भएको भनिए पनि उनी मौन नै छन् । सक्रिय राजनीतिमा खाँण रहने कांग्रेस नेताहरूले दाबी गरेका थिए । न दाबी गरेजस्तो उनी सक्रिय भए, न त शक्तिलाई कतै मिलाउन भूमिका खेले । उनी पार्टीमा के गर्ने भनेर जोखाना हेरिरहेका छन् । पार्टीको केन्द्रीय सदस्य पद निलम्बन नगरेको भनेर सभापति देउवाको आलोचना भएको थियो । अहिले खाँण पार्टीको भूमिकामा भने सक्रिय छन् ।

के हो वर्षव्यक्ति र समाचार निर्माता ?

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ ।

गत वर्ष गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट १५ चैतदेखि १० दिनको समय राखेर विभिन्न विधामा भर्चुअल्ली मत हाल्न पाउने गरी फारम राखिएको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई, वर्षसिनेमा 'जारी' र वर्षनाटक 'दमिनी भीर' घोषणा गरिसकिएको छ । फुटबलर सावित्रा भण्डारी (साम्बा) वर्षव्यक्ति २०८० घोषित भएकी छन् ।

वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । शिलापत्र वर्षव्यक्ति, समाचार निर्माता र अन्य विधाको मनोनयन, छनौट र नतिजाको विस्तृत विवरण केही दिनमा सार्वजनिक गरिने छ ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: शुक्रबार, चैत ३०, २०८० १५:२०