उत्पीडनलाई बिम्बमा देखाउने नाटक ‘मासिन्या’

A+ A A-

उत्पीडित समुदायको कथा देखाउने नाटक ‘मासिन्या’ शिलापत्र वर्षव्यक्तिअन्तर्गत अनलाइन सर्वेक्षणमा उत्कृष्ट नाटक २०८० घोषित भएको छ । विधाविज्ञको रायका आधारमा मनोनयन र अडियन्सको मतका आधारमा १० वटामध्ये एउटा ‘वर्षनाटक’ र चारवटा उत्कृष्ट नाटक चयन गरिएको हो । मनोनयन, छनोट प्रक्रिया र नतिजाबारे विस्तृत विवरण केही दिनमा सार्वजनिक गरिनेछ ।

'शिलापत्र उत्कृष्ट नाटक २०८०' मासिन्या

प्रधानमन्त्री जंगबहादुर राणाले जारी गरेको मुलुकी ऐनमा मास्नुपर्ने भनिएका जाति नै मासिन्या हुन् । उनीहरूले समाजमा केकस्ता बहानामा उत्पीडन खेप्नुपरेको छ भन्ने कुरा नाटक ‘मासिन्या’ले देखाएको छ । ‘मासिन्या’ शब्दले उत्पीडित समुदायलाई प्रतिनिधित्व गर्छ । तामाङ समुदायका आफ्नै संस्कृति मासिएको विषयलाई पनि नाटकले उजागर गरेको छ ।

साथै, सामाजिक सद्भाव वा भाइचारा कायम गर्नुपर्ने नाममा जातीय दमन र विभेदका घटनालाई ढाकछोप गर्ने गरिएको प्रति समाजलाई खबरदारी पनि गरेको छ ।

नाटक मासिन्य ११ माघदेखि २८ गतेसम्म थापागाउँस्थित मण्डला नाटकघरमा मञ्चन भएको थियो । राजु स्याङ्तान, लक्ष्मी रुम्बा र रावतले संयुक्त रूपमा लेखेको नाटकलाई बुद्धि तामाङ र सोनाम लामाले निर्देशन गरेका हुन् ।

नाटक ‘मासिन्या’ मार्फत कलाकार विष्णु मोक्तान, रोहनी लामा, शीतल थोकर तामाङ, रुपेश लामा, सानुमाया तामाङ, निर्मल सुनील तामाङ, प्रशान्त वाइबा, विकास लामा, रमिला मोक्तानलगायतले मञ्चमार्फत आफ्नो समुदायको ऐतिहासिक विस्थापन र अत्याचारको पीडा बोलेका छन् ।

०००

१५ चैतदेखि १० दिनको समय राखेर शिलापत्रले विभिन्न विधामा भर्चुअल्ली मत हाल्न पाउने गरी फारम राखेको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई र वर्षसिनेमा जारी घोषणा गरिसकिएको छ ।

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ । गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट वर्षव्यक्तिमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ । वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । वर्षव्यक्ति २०८० चैत ३० गते (शुक्रबार) घोषणा गरिने छ । यो सूची कसरी तयार गरियो भन्ने जान्न यहाँ क्लिक गर्नुहोस् ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: बिहीबार, चैत २९, २०८० १७:५४