नक्कली भुटानी शरणार्थी ठगीका 'योजनाकार' रायमाझी

A+ A A-

नक्कली भुटानी शरणार्थी प्रकरणमा मुछिएर बाबुछोरा नै हिरासतमा पुगेका एमाले नेता हुन्, टोपबहादुर रायमाझी । २०७९ को आमनिर्वाचनमा तत्कालीन सत्तागठबन्धनबिरुद्ध चुनाव जितेर लोकप्रियता पुष्टि गरेका रायमाझीको राजनीतिक करिअर सोही ठगी काण्डले डुबाइदियो ।

रायमाझीले तत्कालीन गृहमन्त्री रामबहादुर थापा बादल, सुरक्षा सल्लाहकार इन्द्रजित राईको साथ लिएर भुटानी शरणार्थीको नक्कली सूची बनाएर अमेरिका पठाउनेभन्दै पैसा उठाउने गिरोहलाई सघाएको आरोप छ । त्यस क्रममा रायमाझीले आफूलाई झापाबाट बोलाएर तत्कालीन सत्तारुढ नेकपाका अध्यक्ष पुष्पकमल दाहाल प्रचण्डलाई पनि भेटाएको बयान भुटानी शरणार्थी अगुवा टेकनाथ रिजालले दिएका थिए । सोही कारण यो प्रकरणका मुख्य योजनाकारमा रूपमा प्रहरीले उनीविरुद्ध मुद्दा चलाएको छ ।

सो प्रकरणको अनुसन्धानका लागि प्रहरीले पक्राउ पुर्जी जारी गर्दा २० वैशाख २०८० मा उनी गृहजिल्ला अर्घाखाँचीमा भाषण गर्दै थिए । त्यहाँबाट काठमाडौं जाने भनेर हिँडेका उनी एकाएक फरार भए । संयोग कस्तो भने नक्कली भुटानी शरणार्थी प्रकरणमा अर्घाखाँचीकै उच्च अधिकारीहरू जोडिएका थिए, सोही कनेक्सनको बलमा उनी फरार नभई प्रहरीबाटै लुकाइएको अरोपसमेत लागेको थियो । सो प्रकरणको अनुसन्धान नगरेर फाइलै ‘होल्ड’ गरेको आरोप प्रहरी आईजीपी वसन्त कुँवरमाथि नै लागेको थियो । त्यसमाथि तत्कालीन प्रमुख प्रतिपक्षी दलका नेता केपी ओलीले रायमाझीलाई पक्राउ पुर्जी जारी गरेकैमा आपत्ति जनाएका थिए । चौतर्फी दबाबपछि अन्ततः ११ दिनपछि उनी काठमाडौँको बूढानीलकण्ठबाट पक्राउ परे ।

नक्कली भुटानी शरणार्थी ठगीमा रायमाझीसँगै उनका छोरा सन्दीप पनि जोडिएर पक्राउ परे । तर, उनी अदालतको आदेशमा धरौटीमा छुटेका छन् । १ असारमा काठमाडौं जिल्ला अदालतका न्यायाधीश प्रेमप्रसाद न्यौपानेको इजलासले लक्ष्मी महर्जन र टंक गुरुङबाहेक १६ जनालाई कारागार पठाउने आदेश दिएको थियो । त्यसविरुद्ध रायमाझीलगायतले १६ साउनमा उच्च अदालतमा पुनरावेदन गरेका थिए । तर, १५ मंसिरमा उच्च अदालत पाटनका न्यायाधीशद्वय प्रकाश खरेल र जनक पाण्डेको इजलासले रायमाझीलाई थुनामै राख्न आदेश दियो । त्यसविरुद्ध उनी १२ पुसमा सर्वोच्च पुगेका छन् ।

के हो वर्षव्यक्ति र समाचार निर्माता ?

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ ।

गत वर्ष गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट १५ चैतदेखि १० दिनको समय राखेर विभिन्न विधामा भर्चुअल्ली मत हाल्न पाउने गरी फारम राखिएको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई, वर्षसिनेमा 'जारी' र वर्षनाटक 'दमिनी भीर' घोषणा गरिसकिएको छ । वर्षव्यक्ति २०८० आज (शुक्रबार) घोषणा गरिँदैछ । वर्षव्यक्तिको सूचीमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ ।

वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । शिलापत्र वर्षव्यक्ति, समाचार निर्माता र अन्य विधाको मनोनयन, छनौट र नतिजाको विस्तृत विवरण केही दिनमा सार्वजनिक गरिने छ ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: शुक्रबार, चैत ३०, २०८० १७:००