राजनीतिक दाउपेच देखाउने फिल्म 'नाङ्गो गाउँ'

A+ A A-

फिल्म नाङ्गो गाउँ शिलापत्रको वर्षव्यक्ति अनलाइन सर्वेक्षणबाट उत्कृष्ट सिनेमा छानिएको छ । १० फिल्मको सूचीबाट उत्कृष्ट ५ भित्र 'अगस्त्य' परेको हो । वर्षान्त अभियानअन्तर्गत शिलापत्रले २०७७ सालदेखि अनलाइन सर्वेक्षणमार्फत विभिन्न विधाका शीर्ष पात्र र सिर्जना घोषणा गर्दै आएको छ ।

विधाविज्ञको रायमा तयार गरिएको १० फिल्मको सूचीबाट एक वर्षसिनेमा र बाँकी ४ उत्कृष्ट सिनेमा घोषित गरिएका छन् । फिल्म 'जारी' वर्षसिनेमा घोषित भएको छ । मनोनयन, छनोट प्रक्रियासँग नतिजाको विस्तृत विवरण शिलापत्रले केही दिनपछि सार्वजनिक गर्नेछ ।

'नाङ्गो गाउँ'

राजनीतिक दाउपेचको कथा देखाउने फिल्म हो 'नाङ्गो गाउँ' । जसरी पनि चुनाव जितेर गाउँको विकास गर्ने अड्डी कसेका दुई उम्मेदवारको राजनीतिक दाउपेचको कथावरिपरि फिल्म घुम्छ ।

राजनीतिलाई स्वर्ग देख्ने शिक्षक पासाङ लामा (दयाहाङ राई) जो गाउँको विकास गर्ने उद्देश्य लिएर उम्मेदवार बनेको छ । चुनाव जितेर पारिवारिक विरासतलाई निरन्तरता दिन चाहने जरी लामा (शिशिर बाङ्देल) छन् । दुई उम्मेदवारले चुनाव जित्न गर्ने दाउपेचको संघर्ष हो फिल्मको मूल कथा ।

राजनीतिले परिवार र पात्रको सम्बन्धमा ल्याउने उतारचढावको जरी लामा पात्र पासाङ तामाङलाई चुनौती दिन्छ, जसले चुनाव हार्छ, ऊ भोट गन्ने ठाउँबाट सर्वाङ्ग नाङ्गो भएर जान्छ भनेर बाजी राखेर द्वन्द्व सिर्जना गरिएको छ । पासाङ पात्र चुनाव हारेर नाङ्गो भएर गाउँ छाड्छन् । त्यहीँबाट नाङ्गो गाउँ– २ फिल्मको तयारी निर्माण पक्षले गरेको छ ।

फिल्ममा दयाहाङ र शिशिरका अलावा कार्म, मिरुना मगर, साम्राज्ञी राज्यलक्ष्मी शाह, बुद्धि तामाङ, रवीन्द्र झालगायतका कलाकारको अभिनय छ । दीपेन्द्र लामाको लेखन तथा निर्देशनमा सिनेमा निर्माण भएको हो । क्लक वर्क क्रियसनको प्रस्तुतिमा तयार भएको यस सिनेमामा जय श्रेष्ठको लगानी छ । फिल्मले हलबाट ५ करोड ग्रस आम्दानी, ओभरसिजबाट १ करोड १३ लाख र डिजिटल ५० लाख रुपैयाँ आम्दानी गरेको छ ।

प्रकाशित मिति: बिहीबार, चैत २९, २०८० ०३:१७