उत्कृष्ट नाटक २०८०ः गंगालाल

A+ A A-

शहीद गंगालाल श्रेष्ठको जीवनीमा आधारित नाटक ‘गंगालाल’ शिलापत्रको अनलाइन सर्वेक्षणमा २०८० सालको उत्कृष्ट नाटकमा चयन भएको छ । विधाविज्ञको रायमा मनोनयन र पाठकको मतका आधारमा १० नाटकमध्ये एउटा वर्षनाटक र चारवटालाई उत्कृष्ट नाटक घोषित गरिएको हो । 'दमिनी भिर' वर्षनाटकका रूपमा चुनिँदा गंगालालसँगै 'मासिन्या', 'शत्रु' र 'ट्रान्जिट' उत्कृष्ट नाटक घोषित भएका छन् । मनोनयन र छनोट प्रक्रियाको विस्तृत विवरण केही दिनमा सार्वजनिक गरिनेछ ।

'शिलापत्र वर्षनाटक २०८०' मा परेको ‘गंगालाल’ १९९१ देखि १९९७ सालसम्मको नेपाली राजनीतिक परिवेशका साथै मूलतः शहीद गंगालालको जीवनीमा केन्द्रित छ ।

नाटकले गंगालाललाई क्रान्तिकारी मात्र नभई एक पूर्ण मानिसको रूपमा प्रस्तुत गरेको छ । गत १६ माघमा राष्ट्रिय नाचघरमा शहीद दिवस मनाउँदै पहिलोपल्ट मञ्चन गरिएको ‘गंगालाल’ पुनः बत्तीसपुतलीस्थित शिल्पी नाटकघरमा गत १९ माघदेखि ५ फागुनसम्म मञ्चन भएको थियो ।

चे शंकरको लेखन र निर्देशनमा रहेको नाटक ‘गंगालाल’को निर्माण भने गंगालाल फाउन्डेसन र गार्डेन थिएटरले संयुक्त रूपमा गरेका हुन् ।

गंगालालमा प्रदीपकुमार चौधरी, निर्भीक, शकु शाह, इनारा बानु, सन्दीप डंगोल, नीरज दाहाल, विश्वास मानन्धरलगायत कलाकारको अभिनय छ ।

०००

१५ चैतदेखि १० दिनको समय राखेर शिलापत्रले विभिन्न विधामा भर्चुअल्ली मत हाल्न पाउने गरी फारम राखेको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई र वर्षसिनेमा जारी घोषणा गरिसकिएको छ ।

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ । गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट वर्षव्यक्तिमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ । वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । वर्षव्यक्ति २०८० चैत ३० गते (शुक्रबार) घोषणा गरिने छ । यो सूची कसरी तयार गरियो भन्ने जान्न यहाँ क्लिक गर्नुहोस् ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: बिहीबार, चैत २९, २०८० १७:०३