नयाँ स्वाद र शैलीमा बनेको फिल्म 'अगस्त्य'

A+ A A-

फिल्म 'अगस्त्य' 'शिलापत्र उत्कृष्ट सिनेमा २०८०' मा चयन भएको छ । १० फिल्मको सूचीबाट उत्कृष्ट ४ भित्र अगस्त्य परेको हो ।

वर्षान्त अभियानअन्तर्गत शिलापत्रले २०७७ सालदेखि अनलाइन सर्वेक्षणमार्फत विभिन्न विधाका शीर्ष पात्र र सिर्जना घोषणा गर्दै आएको छ । विधाविज्ञको रायमा तयार गरिएको १० फिल्मको सूचीबाट एक वर्षसिनेमा र बाँकी ४ उत्कृष्ट सिनेमा घोषित गरिएका छन् । फिल्म 'जारी' वर्षसिनेमा घोषित भएको छ । मनोनयन, छनोट प्रक्रिया र नतिजाको विस्तृत विवरण शिलापत्रले केही दिनपछि सार्वजनिक गर्नेछ ।

'अगस्त्य'

सौरभ चौधरी भन्ने गर्थे, ‘यस्तो फिल्म बनाउन मन छ, जसले केही हो भन्ने मानक बनाओस् । म निरन्तर प्रयास गर्दै छु । स्क्रिप्टमा घोत्लिएको छु ।’

उनले कथा लेखेर 'अगस्त्य च्याप्टर १' बनाए । आफैँले लेखेको फिल्म बनाउनुअघि उनले लभ डायरिज् फिल्म बनाएका थिए । सस्पेन्स थ्रिलर नेपाली फिल्मी क्षेत्रमा कम देखिने जनरा हो । यसको प्रयोग गर्न चाहन्थे सौरभ र गरे पनि । फिल्मले लगानी उठायो ।

२ करोड रुपैयाँको बजेटमा बनेको फिल्मले ४ करोडभन्दा माथि कलेक्सन गर्न सफल बन्यो । डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुति रहेको फिल्ममा निश्चल बस्नेत, विजय बराल, रवीन्द्र झा, शिशिर बाङ्देल, सिम्रन खड्का, प्रकाश दाहाल, प्रदीप ढकाल, गजेन्द्र त्रिपाठी, सचिन चन्द्रलगायतका कलाकारको अभिनय छ ।

सौर्य (सौगात मल्ल)लाई खोज्दै हुन्छन् निशान (नाजिर हुसेन) । मानसिक सन्तुलन गुमाएको अवस्थामा भारतको गोरखपुरमा दौडिरहेका हुन्छन् सौर्य । सेतो कुर्तासुरुवाल लगाएकी चाँदनी (मलिका महत) उनको सम्झनामा आइरहन्छिन् । सौर्य को हुन् ? उनलाई निशानले किन खोजिरहेका हुन्छन् ? उनी गोरखपुर कसरी पुगे ? उनको सम्झनामा आइरहने चाँदनी को हुन् ? भन्ने कुरामा सस्पेन्स राखेर अर्को भागलाई ठाउँ छोडिएको छ

गोदना गाउँमा छन् भवानीसिंह त्रिपाठी (प्रमोद अग्रहरी), जसले आफ्ना तीन भाइ पिन्टु/पिङ्कु र विवेकमार्फत अपराधको साम्राज्य चलाएका छन् । उनको साम्राज्य भत्काउने प्रयासमा लाग्छन् सौर्य देव (सौगात मल्ल) र निसान (नाजिर हुसेन) । त्यो समूहमा समावेश हुन आइपुग्छिन् चिकित्सक चाँदनी (मलिका महत) । यो अवस्थामा भवानीसिंहको अपराधको साम्राज्य भत्किने वा नभत्किने भन्ने नै फिल्मको मूल कथा हो । फिल्म १८ फागुनमा रिलिज भएको हो । फिल्म ‘अगस्त्य’को च्याप्टर २ लाई सन् २०२६ मा रिलिज गर्ने जानकारी पनि निर्माणपक्षले दिएको छ ।

प्रकाशित मिति: बिहीबार, चैत २९, २०८० १५:१८