संघदेखि प्रदेश सरकारसम्मै अस्थिरताका कारक बनेका प्रचण्ड

A+ A A-

केही सकारात्मक र केही नकारात्मक कामले प्रधानमन्त्री पुष्पकमल दाहाल प्रचण्ड बितेको वर्षभरि नै समाचारको हेडलाइन बनिरहे । सुशासनका क्षेत्रमा भएका केही पहलमा प्रशंसा र बारम्बार सत्ता गठबन्धन हेरफेर गरेको भन्दै आलोचनाका पात्र बने उनी ।

बितेका १५ महिनामा तीनपटक सत्ता गठबन्धन हेरफेर गरेर उनी संघीय सरकारदेखि प्रदेशसम्मै अस्थिरताको कारक बने । प्रधानमन्त्री प्रचण्डले आफूले काम गर्न अनुकूल नभएकाले सत्ता गठबन्धन गर्नुपरेको स्पष्टीकरण दिँदै आएका छन् । उनले आफू जीवित रहँदासम्म यस्ता उथलपुथल भइरहने सार्वजनिक रूपमै भनिसकेका छन् ।

हुन पनि १० पुस २०७९ मा आफूलाई प्रधानमन्त्री बनाएको एमालेसहितको गठबन्धन राष्ट्रपति निर्वाचनसम्म आइपुग्दा सय दिनसमेत नपुग्दै किन बदल्नुपर्‍यो, त्यसको ठोस जवाफ प्रचण्डले अहिलेसम्म दिएका छैनन् । न त २१ फागुन २०८० मा पुनः पुरानै एमाले छाताको गठबन्धनमा फर्किनुको औचित्य पनि पुष्टि गर्न सकेका छैनन् । गठबन्धन दलबाटै काम गर्ने वातावरण नभएको प्रस्टीकरण पत्यारलाग्दो छैन । त्यसैले सत्ता लम्ब्याउने खेलबाहेक यो अस्थिरताको अर्को कारण सतहमा देखिएको छैन ।

प्रचण्डको भनाइ र गराइबीचमा अन्तर रहँदै आएको छ । सत्तारोणको एक वर्ष पुगेको अवसरमा देशवासीलाई सम्बोधन गर्दै उनले अत्यावश्यकबाहेक उद्घाटन र शिलान्यासमा नजाने, गल्ती कमजोरी सुधारेर काम गर्ने प्रतिबद्धता जनाएका थिए । तर, त्यसको भोलिपल्टै उनी पालिकास्तरीय पार्टी प्रशिक्षणमा भाग लिन गोरखा पुगे । जहाँ भर्खरै विवाह गरेकी नातिनीसँग उनले खिचाएको तस्वीर भाइरल मात्र भएन, प्रचण्ड नातिनीलाई भेट्नकै लागि सेनाको हेलिकोप्टर लिएर त्यहाँ पुगेको भन्दै चर्को आलोचना भयो ।

आफ्नै बोलीवचन र व्यवहारले पनि प्रधानमन्त्री प्रचण्ड विवादमा तानिए, प्रश्नहरूको घेरामा परिरहे । भारत भ्रमणका बेला बंगलादेश मोडलजस्तो जमिन सट्टापट्टा गरेर भारतसँग सीमा समस्या समाधानको विकल्प अघि सार्दा उनीमाथि प्रतिपक्षी दलहरू खनिए । सार्वभौमसत्तासँग जोडिएको विषयमा स्वदेशमा सामान्य छलफलसमेत नगरेर विदेशी भूमिमा आफूखुसी प्रस्ताव गरेको भन्दै संसदमा जवाफ मागियो ।

१८ असारको अर्को अभिव्यक्तिले पनि उनलाई विवादमा तान्यो । यातायात व्यवसायी भारतीय नागरिक प्रितम सिंहकी छोरी किरण दीप सन्धुले लेखेको पुस्तक ‘रोड्स टु द भ्याली’ विमोचन गर्दै दिएको अभिव्यक्तिले उनलाई आलोचित बनायो । उनले भनेका थिए, ‘मलाई प्रधानमन्त्री प्रितम सिंहले धेरै दुःख गर्नुभएको छ । धेरैपटक दिल्ली जानुभएको छ ।’

सो अभिव्यक्ति राष्ट्रिय स्वाधीनताविपरीत रहेको भन्दै एमालेले संसद अवरोध गरेपछि प्रधानमन्त्री प्रचण्डले संसदमा स्पष्टीकरण मात्र दिएनन्, ‘प्रचण्ड यस्तै भइदियो त गर्नुहुन्छ के ?’ भन्दै लाचारी पोखेका थिए ।

भारत भ्रमणकै बेला मध्यप्रदेशस्थित महांकालेश्वर मन्दिरमा गेरुवस्त्र लगाएर प्रचण्डले गरेको पूजापाठ पनि विवादमा पर्‍यो । स्वदेशमा मन्दिर नजाने प्रधानमन्त्री प्रचण्ड भारत भ्रमणमा गेरुवस्त्र धारण गरेर पूजा गरेको तस्वीर आफैँमा अस्वाभाविक थियो । आस्तिक–नास्तिक दुवै पक्षले आलोचना गरेपछि उनले स्वदेश फर्किएपछि भ्रमण दलका सदस्य मन्त्रीहरूसहित पशुपतिनाथ मन्दिर दर्शन गरेका थिए ।

कात्तिक तेस्रो साता जाजरकोट केन्द्रबिन्दु भएर गएको भूकम्पमा भोलिपल्टै घटनास्थल पुगेर उद्धार र राहतमा पहल लिँदा प्रधानमन्त्री प्रचण्डको प्रशंसा भएको थियो । तर, घरबारविहीन बनेका भूकम्पपीडितको पुनःस्थापनामा भने सरकारले ध्यान दिन सकेन । त्यस्तै, नक्कली भुटानी शरणार्थी ठगी प्रकरण र ललितानिवास जग्गा हिनामिना किर्ते प्रकरणमा हाई प्रोफाइल व्यक्तिलाई अनुसन्धानको दायरामा ल्याएको जस प्रचण्डले पाएका छन् । तर, सुन तस्करी प्रकरणमा आफ्नो पार्टीका नेताहरूलाई जोगाएर भरिया तस्करलाई मात्र पक्राउ गरेको जाँचबुझ आयोगको प्रतिवेदनले पुष्टि गरिदिएपछि सरकारको निष्पक्षतामाथि प्रश्न उठ्यो ।

वर्षको अन्त्यतिर आउँदा आफ्नै भाइ नातेदार नारायण दाहाललाई राष्ट्रियसभाको अध्यक्ष बनाएपछि उनको परिवारमोहको पार्टीभित्र र बाहिर चर्को आलोचना भयो । पुराना सांसदबाट उपाध्यक्ष उर्मिला अर्याल आकांक्षी थिइन् भने छवर्षे अध्यक्ष बनाउन भर्खरै झक्कुप्रसाद सुवेदी निर्वाचित भएर गएका थिए । तर, सत्ता गठबन्धन हेरफेर गरेर भागवण्डामा पाएको अध्यक्षमा प्रचण्डले भाइ नारायण दाहाललाई लगेका थिए ।

प्रकाशित मिति: शुक्रबार, चैत ३०, २०८० १०:४५