प्रदीप भट्टराईलाई सफलताको सिँढी थपिदिएको 'महाजात्रा'

A+ A A-

फिल्म 'महाजात्रा' शिलापत्र वर्षव्यक्ति अनलाइन सर्वेक्षणबाट उत्कृष्ट सिनेमा छानिएको छ । १० फिल्मको सूचीबाट उत्कृष्ट ४ भित्र 'महाजात्रा' परेको हो । वर्षान्त अभियानअन्तर्गत शिलापत्रले २०७७ सालदेखि अनलाइन सर्वेक्षणमार्फत विभिन्न विधाका शीर्ष पात्र र सिर्जना घोषणा गर्दै आएको छ ।

विधाविज्ञको रायमा तयार गरिएको १० फिल्मको सूचीबाट एक वर्षसिनेमा र बाँकी ४ उत्कृष्ट सिनेमा घोषित गरिएका छन् । फिल्म 'जारी' वर्षसिनेमा घोषित हुँदा त्यसपछि बढी मत 'महाजात्रा'ले पाएको छ । मनोनयन, छनौट प्रक्रिया र नतिजाको विस्तृत विवरण शिलापत्रले केही दिनपछि सार्वजनिक गर्ने छ ।

'महाजात्रा'

प्रदीप भट्टराईले फिल्म 'महाजात्रा' बनाउनुअघि 'जात्रा' र 'जात्रैजात्रा' बनाए । त्यसपछि 'महाजात्रा' ल्याएका हुन् । ९ चैतमा रिलिज भएको फिल्मको आम्दानी बढिरहेको छ ।

फिल्मले नेपालबाट १४ करोड र विदेशबाट ९ करोड ग्रस कलेक्सन गरेको छ । फिल्म समीक्षात्क हिसाबमा 'वाह !' भन्ने खालको होइन । तर, स्थापित कलाकार र उनीहरूले निभाएको चरित्रले दर्शकलाई भरपूर मज्जा दिन्छ । 'जात्रा' र 'जात्रैजात्रा'को कथालाई तन्काएर भट्टराइले महाजात्रा बनाए ।

अघिल्ला सिक्वेलको तुलनामा फिल्ममा राजनीति घुसाइएको छ । ५० करोड थपिएको छ र कालो धनको गाडी लुकाउन पात्रहरू ९० लाखको लोभमा संघर्ष गर्छन् । त्यसमा छन् फणीन्द्र तिमल्सिना (विपिन कार्की), मुन्ना ठाकुर (रवीन्द्र झा) र जोयस (रवीन्द्रसिंह बानियाँ) । त्यसमा सहायक भूमिकाको रूपमा वर्षा राउत (सम्पू फणिन्द्रकी श्रीमती) उनले इमानदार बन्नुपर्छ भन्ने सन्देशलाई निरन्तरता दिएकी छिन् ।

'महाजात्रा'मा थप भएका पात्र हुन् इन्सपेक्टर खत्री (दिव्य देव) । उनी भाइरल इन्सपेक्टरका रूपमा देखिएका छन् । खलनायकमा थपिएका नयाँ पात्र पुण्यप्रसाद (हरिवंश आचार्य) नेता हुन् । भ्रष्टाचार स्वीकार्दै आत्मसमर्पण गर्न पुगेका उनी छोरालाई जाेगाउन तस्करी र हत्या आराेपमा पार्टीलाई अलपत्र पारेर जेल जान्छन् । फिल्ममा भएको पञ्चलाइनले दर्शक हसाउँछ । सिचुएसनल कमेडीमा सफलता पाएका भट्टराईले नयाँ पात्र जोडेर पुरानै कथा बेचेका छन् । समीक्षात्मक रूपमा सफल नभए पनि व्यावसायिक रूपमा फिल्मले सफलता नै पाएको छ ।

प्रकाशित मिति: बिहीबार, चैत २९, २०८० १५:१९