प्रहरीलाई काम गर्न दिएर अनुसन्धानको पद्धति सुधारेका नारायणकाजी

A+ A A-

गृह मन्त्रालयमा केही पद्धति सुधार, हस्तक्षेपरहित सरुवा–बढुवा र भीआईपी जोडिएका प्रकरणका अनुसन्धान गर्न प्रहरीलाई वातावरण बनाएर उपप्रधानमन्त्री नारायणकाजी श्रेष्ठ बितेको वर्षभर चर्चामा रहे । प्रधानमन्त्री पुष्पकमल दाहाल प्रचण्डको तेस्रो कार्यकालको प्रारम्भमा सुशासनका क्षेत्रमा देखिएका सुधारको अगुवाइ उनैले गरे ।

वर्षको आधाआधी समय वाहवाही कमाएका श्रेष्ठ सत्ता गठबन्धनका शीर्ष नेता र माओवादीका पदाधिकारी जोडिएका प्रकरणमा लचिलो बनिदिँदा लोकप्रियताको ग्राफ पनि ओरालो लाग्न पुग्यो । गृहमन्त्रीबाट बाहिरिनुपर्ने स्थिति आउँदा भने उनले अस्वाभाविक सत्तालिप्सा देखाए ।

एमाले–माओवादी गठबन्धन भत्किएपछि गत वर्ष १७ चैतमा भौतिक पूर्वाधार तथा यातायात मन्त्रालयबाट गृह मन्त्रालयको जिम्मेवारीमा आएका थिए श्रेष्ठ । त्यसको तेस्रो दिनमै सुराकी परिचालनका नाममा उपप्रधानमन्त्री र गृहसचिवले खर्च गर्ने प्रणाली खारेज गरेर उनले प्रशंसा बटुले । ३२ वर्षदेखि गृहमन्त्री र गृहसचिवले सुराकी परिचालनका नाममा बेहिसाब खर्च गर्न पाउने प्रावधान श्रेष्ठले मन्त्रिपरिषद्‌बाट खारेज गराएर उनी चर्चामा आए ।

लगत्तै, प्रहरी अनुसन्धानमा हस्तक्षेपरहित नीति लिँदा केही पुराना तर हाई प्रोफाइल जोडिएका प्रकरण सतहमा मात्र आएनन्, पूर्वउपप्रधानमन्त्रीदेखि गृहमन्त्री, सांसद र बहालवाला सचिव पक्राउ पर्ने स्थिति आयो । नेपाली नागरिकलाई नक्कली भुटानी शरणार्थी बनाएर अमेरिका पठाउने भन्दै पैसा असुल्ने गिरोहविरुद्ध नेपाल प्रहरीले अनुसन्धान गरिरहेको थियो । त्यसमा दोषी उम्किने गरी कुनै हस्तक्षेप नगर्ने भन्दै उनले प्रहरीको मनोबल बढाए ।

सो प्रकरणमा बहालवाला सचिव टेकनारायण पाण्डे र पूर्वगृहमन्त्री बालकृष्ण खाँण, पूर्वउपप्रधानमन्त्री एवं एमाले सचिव टोपबहादुर रायमाझी, उनका छोरा सन्दीप रायमाझी, पूर्वगृहमन्त्री रामबहादुर थापा बादलका सुरक्षा सल्लाहकार इन्द्रजित राईलगायतलाई पक्राउ गरी अनुसन्धान गराए । कोही धरौटीमा छुटे भने कोही अहिले पनि पुर्पक्षका लागि थुनामै छन् । त्यससम्बन्धी मुद्दा अदालतमा विचाराधीन छ ।

देशभरि फैलिएको मिटरब्याजको विरुद्धको संघर्ष समिति र सरकारी वार्ता टोलीबीच पाँचबुँदे सहमति गरे । मिटरब्याजपीडितहरूको समस्या समाधान गर्न पूर्वन्यायाधीश गौरीबहादुर कार्कीको नेतृत्वमा जाँचबुझ आयोग गठन गरे । पीडकलाई कानुनको दायरामा ल्याउन सरकारले अध्यादेश ल्याएको थियो । मिटरब्याजपीडितहरूले जिल्लाजिल्लामा उजुरी दिइरहेका छन् ।

मन्त्रीहरूले नै २६ जना आफ्ना पीएसओलाई बढुवाका लागि सिफारिस गर्दा उनले नियमले पुगेका आफैँ बढुवा हुने जवाफ दिएका थिए ।

ललितानिवास जग्गा हिनामिनाको किर्ते होस् वा बाँसबारी छाला जुत्ता कारखानाको जग्गा ठगीजस्ता अनियमितताका फाइल उनकै पालामा खोलियो । बाँसबारी छाला जुत्ताको जग्गा फिर्ता भएको छ । नक्कली भुटानी शरणार्थी प्रकरणमा सत्तारुढ गठबन्धनका शीर्ष नेतासम्म अनुसन्धान गर्न दिएका हुन्थे र सुन तस्करी प्रकरणमा माओवादी नेताको संरक्षण नगरेका हुन्थे भने उनको गृहमन्त्री कार्यकाल साँच्चीकै सम्झनालायक हुन्थ्यो ।

के हो वर्षव्यक्ति र समाचार निर्माता ?

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ ।

गत वर्ष गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट १५ चैतदेखि १० दिनको समय राखेर विभिन्न विधामा भर्चुअल्ली मत हाल्न पाउने गरी फारम राखिएको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई, वर्षसिनेमा 'जारी' र वर्षनाटक 'दमिनी भीर' घोषणा गरिसकिएको छ । वर्षव्यक्ति २०८० आज (शुक्रबार) घोषणा गरिँदैछ । वर्षव्यक्तिको सूचीमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ ।

वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । शिलापत्र वर्षव्यक्ति, समाचार निर्माता र अन्य विधाको मनोनयन, छनौट र नतिजाको विस्तृत विवरण केही दिनमा सार्वजनिक गरिने छ ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: शुक्रबार, चैत ३०, २०८० १४:५०